Saturday, June 03, 2006

هو بقى عادي ..........؟

هو بقى عادي ..........؟


امبارح مات جنديين مصريين على الحدود مع اسرائيل .......أخش المواقع الإخبارية ألاقي الخبر مقتضب جدا .......أخش المنتديات ألاقي مفيش حس خااالص ؟؟؟



هو الموضوع بقى عادي للدرجة .....زمان اما كان حد يعطس على الحدود تقوم الدنيا ولا تقعدش ....دلوقت جنودنا بيتم صيدهم زي العصافير ومفيش اي رد فعل

!


بغض النظر عن فرحي الشديد في حكومتنا الغير موقرة ....وده ما لوش علاقة بالشهيدين نحسبهم كذلك تقبلهم الله شهداء وأسكنهم جنته برحمته ، وربنا يصبر اسرهم ويأجرهم في مصيبتهم ويخلفهم خيرا منها ................



كنت بأقول بغض النظر عن فرحي في الحكومة وفي زبانية الأمن - بعيدا عن القلة المخلصة من رجال الأمن - وانهم يكال لهم الضربات تلو الأخرى فقد ينتقم الله من ظالم بظالم آخر ثم ينتقم من كليهما ولكن المفروض خبر يبقى رد فعله أكتر من كده



طبقا لأكثر الروايات وضوحا ان الجنديين على ما يبدوا كانوا يطاردون بعض مهربي المخدرات وتوغلوا بعض مئات الأمتار في الأراضي الإسرائيلية وصادفتهم هذه الدورية فأطلقت عليهم النار دون تثبت او سؤال بمنتهى الصفاقة والاستهتار - ده طبقة للرواية اياها



كان زمان دم الجندي المصري على الحدود ديه خط أحمر ...واضح دلوقت اننا فقدنا هيبتنا واصبح لا وزن لنا




يا ترى رد فعل حكومتنا الموقرة ايه ...واللا هيه خلاص انضمت لطابور العجزة .....ودلوقت هنناشد اسرائيل التقدم بـ...إعتذار ...ونقعد ندعي ربنا انهم يعتذروا لحفظ ماء وجهنا ...وكلها كام شهر وتتكرر الحادثة وتتكرر وتتكرر ومش بعيد نلاقي بعد كده الدبابات الاسرائيلية بتتوغل في سيناء بحجة مطاردة بعض الناشطين ونقعد ساعتها نندد ونندد ويتصدى لهم مجموعة من شباب العريش مثلا - ممكن يكونوا ممن كانوا معتقلين سابقا ظلما في احداث شرم الشيخ وطابا - هما اللي بيتصدوا لهم ببنادقهم وبعيدن تقوم السلطات المصرية باعتقالهم لاساءتهم لدولة مجاورة وصديقة وبحجة الإرهاب وقانون الطوارئ


السيناريو ده ما بيفكركمش بحاجة ؟









كان في هتاف ردده طلاب هندسة القاهرة العام الماضي اما تم اعتقال اتنين من زملائهم والاعتداء عليهم في مباحث أمن الدولة


كانت الحادثة دي بعد قتل 3 جنود شرطة مصريين (أسأل الله ان يتغمدهم برحمته ) على الحدود برضه بمدة قصيرة



"...عاملين فيها هنا أسود .....وبتتضربوا من اليهود ......وبتتهانوا على الحدود "

2 comments:

sham3a said...

والله يا اخي حاجات كتير اصبحت عادي ... ومش لاقي تعليق اقوله الصراحة

Leonardo said...

وإنت بتسأل يامحترم ؟!!

صحيح الواحد كان متوقّع إن يبقى فيه نوع من الحمشنه المرّه دى بما إن القتيلين ظبّاط مش بس عساكر ونناشد اسرائيل بالعتذار ونزوّد عليها الأسف وللا حاجه !!

أو حتّى من باب إن دول من قوّات الأمن المركزى اللى الحكومه اعتمدت عليها بشكل مهول طول الفتره اللى فاتت فيعنى الريّس يعمل حركة جدعنه معاهم ويقولّهم ده إنتوا غاليين علىّ والله ياولاد مش زى باقى الشعب اللى مالوش لازمه بس للأسف برضه طلعنا كلّنا كلاب ولاتسوى إن الريّس يكلّف خاطره ويلغى مقابلته مع أولمرت فى شرم الشيخ تانى يوم :(

طب حتّى كان يكشّر فى وشّه بدل ماهو طالع فى الصور بيهزّر معاه وللا كإنه أولمرت عبيد وللا إيهود أبو حسن ...

البنى آدم مننا بقى رخيص قوى فى البلد دى ياجدع ...

خدمت الحكومه وللا وقفت قصادها
فى كل الحالات ماتستاهلش حتّى وقفه تقول إننا ولاد بلد واحده احنا واللى ماسكيننا
باقول إيه؟
هوّه جنسية مبارك فى البطاقه إيه ؟
وللا ماشى من غير بطاقه !!