Tuesday, December 20, 2011

في الوقت الضائع

في خميس التنحي (10 فبراير) وانا داخل الميدان وبأتفتش واحد من امن البوابات لقى معايا قناع ومنظار صغير



سألني : ليه



قلت له الماسك عشان لو غاز انضرب ...والمنظار عشان لو اتكرر موضوع القناصة اقدر احدد مكانهم



ابتسم وقال لي : خلاص...مش هتحتاج الحاجات دي تاني خااالص

هزيت راسي ومشيت ومكنتش واثق في كلامه



******************



كنت بأهزر مع أهلي بعد التنحي بأسبوع وبقول لهم : واحشاني ريحة قنابل الغاز... نفسي اشم قنبلتين كده عشان اتكيف:))



بقيت اما بأشم ريحة دخان بيقفز ذهني بارتباط نفسي لريحة قنابل غاز يومي 25 و28 يناير



لكن كنت بأحس بالسعادة مش بالخوف او القلق



قالولي: هتجيبه منين ده ...خلاص بقى راحت وراحت ايامه



هزيت راسي...وكنت مصدقهم


**************************



البرادعي في حديثه مع منى الشاذلي بعد الثورة كان بيحكي عن رشه بالماية والضرب يوم 28 يناير في ميدان الجيزة



ودمعت عينه وقال : مش هننضرب تاني..ومش هيترش علينا ماية تاني



وكنت واثق من كده


****************************



واحد رابع اقترح عليا يوم 12 فبراير اني اغير اسم المدونة اللي كنت حاطه من ايام مبارك : الحض على كراهية النظام



لأن النظام سقط خلاص على حد قوله



وكسلت ومغيرتوش



هل هي فراسة وبصيرة من عند ربنا ؟



بس مكنتش شايف وقتها انها بصيرة وفراسة ....كنت شايف اني مكسل



********************************





كلنا كنا غلطانين



كلنا كنا غلطانين





**************************



لقد فقعنا في الوخ



لقد وقعنا في الفخ





اصوات كثير دلوقت بتصرخ على المجلس العسكري انه يكشف عن الايادي الخفية





من الثوار



والفصائل السياسية



وحتى من حزب الكنبة



و حزب تاني وهو حزب الانقياء المخدوعين

والكل متطلع



ونسينا ان المجلس العسكري الآن اصبح جهة خصومة وليس جهة نلجا اليها



جهة تزور باحتراف وتقلب الحقائق وترمي الاتهامات يمينا ويسارا



كان ينفع الكلام ده لو كان المجلس العسكري وما يديره من الاجهزة الامنية تعمل بشرف



لكن الآن ما ينفعش...واضح جدا انه ما ينفعش



بكرة المجلس العسكري يطلع بقائمة اسماء منتقاة باحتراف من اعضاء 6 ابريل والاشتراكيين والبرادعي والاسواني ونوراة نجم بتهمة التحريض على الاحداث الاخيرة ...ولن يمس الاسلاميين



(انا ممن يطلقون عليهم اسلاميين بالمناسبة - مستقل)



ثم بعد شهر يطلع بقائمة اخرى ولن يمس الاسلاميين



ثم بعد اسبوعين يطلع بقائمة تالتة - ولن يمس الاسلاميين



والناس بتصقف له وتهلل له ويقل العنف تدريجيا



العنف اللي هيقل عن طريق المؤشر اللي في ايده زي الراديو مش بسبب ان دول فعلا كانوا اطراف في العنف



لغاية اما يضرب ضربته قبل الاخيرة في السلفيين



ثم ضربته الاخيرة في الاخوان بعد ما يكون الكل كرههم - ده لو فاضل حد - ولن يأسى عليهم احد



وتعاد مأساة انقلاب يوليو 52





(المخطط ده مش هينجح برضه بأمر الله ولكن مثال لما يمكن ان يحاول المجلس العسكري فعله كما يحاول دائما للسيطرة على الثورة وتوجيه البلد في مسار مطلوب من قوى داخلية وخارجية)



***********



طب والحل ؟؟



الحل هو اجبار المجلس العسكري على ادارة المؤشر ووقف العنف بدون اسماء في المرحلة الحالية



اما المحاكمات فمهمة الحكومة القادمة على ان نعطيها وقت لاعادة الهيكلة ما نستعجلش زي ما استعجلنا في محاكمة المخلوع



لكن دلوقت على المجلس العسكري الكف عن التهريج والهطل والشغل الفاشل وعليهم ان يكونوا على مستوى الموقف والمسؤولية



حتى وان لم يكن عندهم قدرات لهذا ...مفيش رجوع...هما في الوسط ولابد ان يتعلموا





المجلس العسكري بكل اعضائه كان عندهم فرصة يدخلوا التاريخ من الباب الذهبي ويبقوا اعظم الشخصيات في تاريخ مصر



لكنهم اختاروا اننا نذكر ايامهم ان شاء لله فيما بعد مقرونة بمقولة : الله لا يعيدها ايام





ياترى مبارك كان بيربيهم فين؟؟ واضح جدددا نوعية اختياراته





..طلع علينا دلوقت منهم ييجي عشر لواءات ؟ مفيش واحد عدل ؟؟؟ مفيش واحد عنده مخ وعدل وبيفهم



يمكن ده شئ كويس عشان ما يطلعلناش حد يقول نختار فلان منهم رئيس ونرجع للحكم العسكري تاني



لكن البلد بتدفع بقالها 11 شهر تمن عدم كفاءة اختيارات مبارك



كنت بقول وقف العنف



وقف العنف بوقف التعامل مع الثورة على انها عدو وانها ثورة عيال



احترام الناس والعمل الحقيقي لاجل مصلحة البلد



النظر في اعادة هيكلة جهاز الامن بجد



الاعتراف بالخطأ وعدم تكراره



تعليم الجنود والضباط كيفية المحافظة على الامن بجد





اتسألت سؤال...لو انا مكان قائد القوة اللي بتحمي المجلس هاعمل ايه ؟





كنت بالقوة الكبيرة اللي معايا دي أولا هأهدي الناس واتكلم معاهم واكسبهم خاصة اما يكون رصيد الجيش عند الناس

كبير



(دلوقت الرصيد راح في داهية بس لانقاذ ما يمكن انقاذه)



ثانيا هاتعامل معاهم بالقانون...يعني اما واحد يشتم ظابط اما ان المعتصمين اللي حواليه هيغلطوه ويسكتوه وهنا الحكمة اني اسكت ...او يتقبض عليه ويتعامل وفقا للقانون كما شرحت

لكن الضابط ابى الا انه يتعامل معاه زي ما هو متعود بمبدأ السادة والعبيد...ازاي المدني العيل ابن الوسخة ده يكلمني كده)


ونسي ان العيل المدني الشجاع الكريم ده هو اللي بأمر الله عمل اكبر تغيير في تاريخ البلد من ايام الفراعنة





فيه تصرفات غلط من بعض الثوار وبعض المتظاهرين لا انكار...لكن فيه طرق قانونية للتعامل معاها - يعني عبودي لو شتم فعلا الظابط - ده لو لو - يبقى يتقبض عليه باقل عنف ممكن ويتحجز في اوضه ويتعرض على النيابة وياخد حكم (حبس او غرامة او كلاهما) من نص القانون وده يكفي جدا للعقاب...وده اقصى عقاب ان لم تتم تسوية الامر في مرحلة من المراحل تقديرا لهؤلاء الشباب مع اعتذاره العلني طبعا

(ده اصلا اذا صحت الرواية ان عبودي شتمه وخدنا بالسيناريو الأسوأ وان كنت لا اظن ان هذا هو ما حدث)



مش يطلع مسحول ومتخرشم ومنفخ من كل حتة





السلاح اللي في ايد قوات الامن ده مش بابي جايبهلهم عشان ينتقموا بيه لنفسهم وكرامتهم



اما لو ان انا ظابط وشفت ان الدنيا باظت بقى ومضطر استخدم القوة يبقى ههاجم واستعمل القوة لكن باقل قدر ممكن احتاجه خاصة ان قوتي كبير مش صغيرة ...وادي تعليمات شديدة للجنود ان اللي يتقبض عليه ماحدش يضربه ولا يهينه يتحفظ عليه بس ولو قاومه - لو قاومه - يضربه بما يكفي فقط للسيطرة عليه



أخيرا...اي تجاوز من ناحية ضباطي وجنودي لأوامري الواضحة والصريحة او حتى بدون اوامر ومخالفة للقانون هأوقف الشخص ده وأعاقبه ...وأعلن ده على الملأ دون محاباة او خداع - مش هاقول عاقبته وانا ما عاقبتوش - والاعلان هنا مهمة المجلس العسكري





الموضوع مش كيميا



لكن من امن العقوبة اساء الادب وسفك الدم وده اللي حصل



بالنسبة للمجندين...لو المجند تعليمه على قده وما بيفهمش فالظابط المفروض يحكمه...لكن اللي شفناه واللي اتحكى ان الظباط نفسهم بيعملوا كده....ده غير انه تم شحن الاتنين - من قبل المجلس العسكري اللي بيكره الثورة في السر ويمدحها في العلن - بان هؤلاء خونة وعملاء



واللي بيقول ان العنف بيستخدم في كل حتة وفي دول أجنبية...فبالنسبة للدول دي ..الدول دي اصلا فيها مؤسسات وفيها قواعد وفيها قانون بيحترم ومن يتجاوزه يحاسب بشكل فوري وفيه حقوق وحريات وفيه فلوس دولة بتتصرف على رفاهية ومعيشة المواطنين ...فمفيش مجال نقول ان العنف اللي بيستخدم في مصر زي العنف اللي بيستخدم في الدول التانية الي هما عندهم قنوات كتير للتعبير عن رأيهم ولتنفيذ الصالح وللمراقبة على الحكوميين



ده غير ان استخدام العنف عندهم ليه قوانين وعمرنا ما سمعنا عن سقوط قتلي في فض اعتصام او شغب بعده



والا كانت اتقطعت رقاب المسؤولين





*************





تتقطع رقبة المسؤول



ونافذة الخروج الآمن بتضيق ويمكن اتقفلت خلاص



والآن نريد تسليم السلطة فورا بعد الانتخابات...ثم المحاكمة لكل من اسال دم ...المحاكمة بجهاز قضائي جديد ونضيف ومحكم...مش الجهاز القضائي الحالي ومش زي



لكن الهيكلة في الجهاز القضائي الحالي سهلة ان شاء الله ودي قصة اخرى



طبعا ده هيزيد سيادة اللواءات والفريق والمشير شراسة في الدفاع عن نفسهم وتتحرق البلد



اقول لهم ومين قال ان العنف هيفيد..كان أفاد المخلوع



وتستطيع ان تخدع بعض الناس بعض الوقت لكن لا تستطيع ان تخدع كل الناس كل الوقت



وانتم تعلمون جديا كيف كانت ايام محمد محمود الاولى - باتكلم عن الايام الاولى - ومين اللي نزل



الشعب العادي اللي نزل وانتم عارفين...انتوا عارفين كويس انا باتكلم عن ايه



ومكنتوش متوقعين



وقطاع كبير من الشباب على اختلاف انتماءاته الفكرية والسياسية يتوعدكم الان ويتوعد كلابكم المسعورة بعنف شديد في المواجهات القادمة ان حدثت...لحماية المتظاهرين السلميين بكل الوسائل ان تم الاعتداء عليهم بالطرق الوحشية اللي استخدمتموها قبل كده


مظاهراتنا سلمية وذات مطالب مشروعة وضروروية لهذا البلد بعد ان علمتمونا انه للاسف الشديد لا اصلاح بدون مظاهرات

لكن ان حدث اعتداءات من جانب الامن فالسيطرة على الناس وعلى السلمية هتكون صعبة


فقط نصبر كي تمر الانتخابات



وإن جننتم وأفسدتم الانتخابات فلن يكون بينكم وبين الشعب حاجز ولا عاصم



ده غير الكتير من شرفاء الجيش اللي هينضموا لنا إن شاء الله




لكن نقول برضه



خلوها تونس احسن



والطيب احسن



وخافوا من ربنا



ما تخافوش من عقاب الدنيا



كونوا رجالا وواجهوا اختياراتكم ومصيركم بشجاعة



وبالشرف العسكري



عارفين طبعا الشرف العسكري





تطهروا في الدنيا قبل ان يأتي يوم القيامة



لا تخافوا من ضغوط خارجية ولا تركنوا لها



توبوا الى الله واصلحوا عملكم



لو هترسى على محاكم في الدنيا فليكن ...ولكن لا يكون في رقابكم ذنب ملايين يوم القيامة



ولعل هؤلاء الملايين يعفون عنكم ان عدت الفترة الجاية على خير



لكن سواء عفوا ام لم يعفوا



فلا تغامروا بالبلد لأجل سلامتكم الشخصية

ولا يركبكم الكبرياء كما ركب المخلوع



ولا تظنوا انكم من اسقط المخلوع...انتم وفرتم على الشعب العناء فقط



واظنكم شفتم البلاد الاخرى..طال الامر نعم لكن النتيجة واحدة





ولله الحمد في الاولى وفي الآخرة



فلا تنقضوا غزلكم وعملكم هذا بعد قوة انكاثا



واعلموا انكم ملاقون ربكم



وانه لا عاصم لكم في الدنيا والآخرة الا هو





اتقوا الله



اتقوا الله

Thursday, October 13, 2011

فيديو طنطاوي ومبارك

القصة الكاملة هي أنها كانت مجموعة سياح قد تم اختطافهم في سبتمبر 2008 أثناء رحلة سفاري بين مصر و السودان والتشاد وليبيا...ثم أطلق الخاطفون سراحهم دون اي اشتباك بين اي قوات امن والخاطفين

لكن تم التعامل مع الموضوع على انه نصر عسكري عظيم.. وقام المشير طنطاوي وقتها بإبلاغ الرئيس - المخلوع - مبارك كذبا انهم قتلوا نصف الخاطفين وساقوا الباقي اسرى (على الهواء مباشرة وهو يفتتح مشروع ما في كفر الشيخ).

ناقص يقولوا ان زيارة الرئيس و وزير الدفاع لكفر الشيخ كانت جزء من خطة الخداع الاستراتيجي لمفاجأة المختطفين

استعراض اعلامي بنفس الطريقة الكاذبة التي كانت يسير عليها اعلام المخلوع...
ولا مجال للخطأ هنا او ادعاء كذب التقارير...وزير الدفاع مرهوب الجانب جدا في الجيش ولا يجرؤ احد على اعطائه تقرير خاطئ سيذاع على الهواء ومع رئيس الجهمورية

والرئيس لا يجرؤ وزير دفاعه على اعطائه تقرير خاطئ فضيحة مثل هذا

ما يهمنا هنا هو طنطاوي....فيا طنطاوي ان كنت ناسي نفكرك....فالتفت لمصلحة شعب مصر ولا تنس فضل الثوار عليك وعلى المجلس العسكري وعلى البلد كلها فالفضل متبادل بين الجميع ...والحمد لله قبل وبعد كل شئ
ماكنتش عايز انشر الفيديو ده لعدم اثارة بلبلة حول المجلس وعشان نحافظ على وحدة البلد وصورة الجيش حتى تمر المرحلة الانتقالية لحكم مدني منتخب انتخاب حر بسلام ... لكن بعد فيديو البدلة فيجب ان نذكر البعض بما مضى

وكما قال الرائد احمد شومان عشية جمعة التنحي : طنطاوي انت كنت جزء من النظام السابق فاترك مكانك

فلا تطمح لأن تكون رئيسا....او ان نسير بك وبغيرك على النظام السابق
...
يا طنطاوي ان كنا سنكرمك انت والمجلس على انحيازكم للثورة - والله اعلم كان السبب ايه هل لوجه الله ثم مصر ام لغرض آخر - ولكن اذا أوصلتم البلد لحكم مدني منتخب انتخاب حر نزيه بالكامل فوقتها تكرمون وتتقاعدون بشرفكم العسكري وتؤجرون من الله على جماية البلد من الانقسام ومن المشاكل لعل الله يفر لكم ما سلف من أخطاء...غير كده فسآسى شخصيا على ضياع فرصتكم لدخول التاريخ من الباب الذهبي ومن الاجر الذي ستفقدوه عند الله .....والثورة مستمرة بعون الله

Sunday, July 10, 2011

أيام الثورة.....تفاصيل إقتحام الميدان يوم جمعة الغضب 28 يناير

بالمصادفة شاهدت حلقة شاهد على العصر بين احمد منصور وعمرو عز (عضو الائتلاف) وكان بيسأله عن اقتحام ميدان التحرير ...ردود الاستاذ عمرو عز ماكانتش دقيقة فلم يعرف التفاصيل ولا التوقيتات لهذه اللحظة الخاصة باقتحام الميدان...ولان الله ساقني لاكون حاضر لحظة وكيفية اقتحام الميدان بالظبط يوم جمعة الغضب 28 يناير ...ولأني لم أرى اي مقال في اي مكان يصف هذه اللحظة...وتقريبا لا احد من النشطاء المعروفين حضرها كي يصفها...ولاني من فترة طويلة عايز اكتب يوميات الثورة اللي عشتها لكن متباطئ في كتابتها للاسف فهأكتب دلوقت تفاصيل لحظة اقتحام الميدان ولعل ربنا يهديني واقعد اكتب باقي اليوميات


مش هاذكر تفاصيل ما عشته في جمعة الغضب بالكامل الآن لان ده هياخد مساحة طويلة اوي...واليوم ده بأعتبره بلا منازع أسعد يوم في حياتي في كل لحظاته وليس لحظة معينة اسأل الله ان يغفر لي بها ما بيني وبينه...لكن هأكتب مقدمات ولحظة اقتحام الميدان


العبد لله بدأ يوم جمعة الغضب من موقف عبدالمنعم رياض وبعد معركة قصيرة طلعت فوق كوبري اكتوبر وقضيت هناك حوالي 4 ساعات برضه لها تفاصيل كثيرة اكتبها بالكامل ان شاء الله في تدوينة اخرى...المهم بعد ان تمكن شباب المناطق الشعبية اللي كانوا معانا على الكوبري - ومكانوش بلطجية - من اصطياد واحراق المدرعة التي كانت تصيب وتقتل المتظاهرين فوق الكوبري اصبح الطريق مفتوحا لنا فوق الكوبري للنزول مباشرة على الميدان أو الانضمام بالاتجاه يمينا لمظاهرة كوبري قصر النيل اللي تمكنت في وقت مقارب جدا من النصر هناك بعد وصول مظاهرة ميدان الجيزة ومظاهرة فيصل ومظاهرة الهرم وانضمامهم لمعركة كوبري قصر النيل - تفاصيل النصر على كوبري قصر النيل عرفتها بعد ذلك بعدة ايام وكنت اظنها اثناء مشاهدتي لها من فوق كوبري اكتوبر نفس المظاهرة اللي بدأت وليست مظاهرات اخرى انضمت اليها)

ابتدينا نجمع نفسنا كي نهجم على العساكر الباقين بعد غياب المدرعة لكن الشباب اصروا على صلاة المغرب اولا - كانت لحظة الآذان - وهنا كنت اخشى ان تأتي مدرعة اخرى بديلة فنعود لنقطة الصفر او ان نتأخر على مظاهرة قصر النيل- ومكنتش اعرف ما يحدث في باقي القاهرة وكنت ارى انه حتى يجوز جمع الصلاة ان اضطررنا (وكنت بالفعل جمعت العصر مع صلاة الجمعة في وقت مبكر هذا اليوم - جمع فقط وليس جمع وقصر) لكن يجب الا نضيع هذه اللحظة اللي ضعفت فيها قوات الامن على الكوبري (وفيما بعد اما شفت فيديو
مظاهرة كوبري قصر النيل
اما وقفوا وقت صلاة العصر
لقيت من وجهة نظري ان الخطأ التكتيكي في وقوفهم للصلاة لحظة ما كانوا مكتسحين الكوبري هي اللي ادت فرصة للامن للكر عليهم ...ولكن لان نيتهم سليمة ولان الله اراد لنا النصر هذا اليوم فجاءهم المدد وانتصروا آخر النهار كما سنرى
)



المهم

اما لقيت الاصرار على صلاة المغرب قلت في الغالب كده مش هنعرف نخش التحرير من اكتوبر لاننا قعدنا 4 ساعات عليه وإتطحنا مصابين وقتلى محتملين ووقت ما جت الفرصة بنتأخر ...فقررت الانضمام لمظاهرة كوبري قصر النيل وكان في ذهني قول النبي صلى الله عليه وسلم للصحابة بعد انتصارهم في غزوة الخندق انه من كان يؤمن بالله واليوم الآخر فلا يصلين العصر الا في بني قريظة - او كما قال صلى الله عليه وسلم يستحثهم على الذهاب بهمة وسرعة الى هناك - فقلت لنفسي لن اصلي المغرب الا في ميدان التحرير بإذن الله حتى اذا صليته جمع مع العشاء

نزلت من منزل كوبري اكتوبر على جزيرة الزمالك ومشيت لغاية مدخل كوبري قصر النيل من ناحية الاوبرا (واشتريت ازازة كوكاكولا في السكة لزوم القنابل المسيلة للدموع)

عايز اقول اشارة لضخامة الاعداد...ان العبور على كوبري قصر النيل بدأ حوالي عشر دقائق قبل آذان المغرب ومسافة ما مشيت من منزل اكتوبر لغاية مدخل كوبري قصر النيل كانت الاعداد مازالت مهولة سواء اللي عبروا او لسه بيعبروا او اللي لسه ورا معبروش

اما وصلت لنهاية الكوبري لقيت الناس للغرابة تقريبا برضه مدخلوش ميدان التحرير ومبعترين على جانبي نهاية الكوبري من الناحيتين...وناس منهم بتقول ياريت تخشوا قدام يا جماعة احنا تعبنا والناس اللي قدام تعبت


ليه ؟

لان كان في ضرب هيستيري بالقنابل المسيلة للدموع وبطلقات الخرطوش من القوات اللي تراجعت للميدان..انا شفت الضرب يوم 25 يناير بالليل وقلت عمري ما شفت ضرب زيه...وشفت الضرب نهار يوم 28 يناير وقلت ان اللي حصل يوم 25 كان نزهة مقارنة بيه...الضرب بقى اللي كان الاتنين السابقين نزهة مقارنة باللي شفته على نهاية الكوبري المرة دي


واول ما وصلت لنهاية الكوبري لقيت ضغط شديد اجبر الناس للانسحاب والتراجع لحظيا (طول اليوم الناس كانت بتكر وبتفر وبعدين بتنتصر بفضل الله) ...وبضغط الكتلة البشرية اثناء الفر وعشان ما اقعش تحت الاقدام اضطريت انزل يسار الكوبري

يسار الكوبري نقطة خطيرة جدا لأن الهواء بيجيب الغاز المسيل للدموع في اتجاهك وكانت من اصعب اللحظات عليا في الثورة بأكملها وحسيت باختناق شديد...ففكرت اني لازم اكون عكس اتجاه الهواء حالا...وبعينين لا تريان تقريبا نزلت النفق اللي تحت الكوبري وعديت للاتجاه العكسي


انا مش عارف عديت ازاي لاني كنت بأكح وعيني بتدمع بشكل هيستيري..لكن فاكر ان فيه ايادي كانت بتوجهني احيانا لابعد عن السيارات في النفق اللي فاكر اني شفتها ضوئها طشاش اثناء ما كنت بأعدي من النفق


ليه حكيت كل ده....لان الحركة دي هي اللي ساقتني للحظة دخول الميدان


وصلت لنهاية النفق ومشيت على غير هدى وانا مش شايف فساقتني قدماي بقدر الله لأجد نفسي عندما هدأ السعال والدموع ونجحت نظرية اتجاه الهواء بفضل الله...لقيت نفسي عند اول نقطة لمدخل ميدان التحرير يمين مسجد عمر مكرم...ولقيت عدد قليل - حوالي تلتميت شخص هناك ....وقوات الشرطة اللي قدامهم بدأت في التراجع


وهنا تبدأ لحظة اقتحام الميدان


بشكل تلقائي خدت طوب في ايدي وانضميت للناس وابتدينا نضغط لندخل الميدان...كانت الساعة تقريبا ستة الا ثلث...القوات اللي قدامنا كانت تراجعت ووقع في ايدي الناس عربية امن مركزي احرقوها ووقع في ايديهم آخر امين شرطة لابس مدني ومتبت في عربية بوكس شرطة ومش عايز يسيبها


على الرغم من كل ما حدث لم اكن اتحمل فكرة قتل انسان خاصة اما يكون في موقف ضعف - وعلى كوبري أكتوبر لم اشارك في صنع القنبلة اللي حرقت المدرعة لكن في المقابل لم اعترض بكلمة على من صنعوها ولقيت ان ده حقهم الطبيعي بعد اللي عملته المدرعة

وايضا لأن امين الشرطة ده كان يبدو عليه انه باصص للعربية على انها عهدة لا يمكن تركها وده شئ بشكل تلقائي احترمته فيه لانه شايف انه هيموت ومع ذلك متبت في عهدته ففي الحالة دي ممكن يكون من القلة القليلة الشريفة في جهاز الشرطة...ممكن...ممممكن
:(


كل ده دار في ذهني في لحظة واحدة ...فشديته من العربية وانتزعته منها انتزاعا وقلت له ان ما جريتش دلوقت الناس دي هتقتلك...قاللي المفاتيح...طلعتها من الكونتاك وقلتله أهيه خدها واجري - فيما بعد متأخرا اثناء المعركة الثانية للوصول لمجلس الشورى تمكن الشباب من تدوير العربية دي بدون المفاتيح واستخدموها للهجوم على مجموعة من الامن المركزي
( كان فيهم مواطن متظاهر ميكانيكي :)) )

واما أمين الشرطة ده جري الناس سابوه وأما جري ومحدش جري وراه عشان يموته مثلا
:)


كنا في اللحظة دي تقدمنا لما بين مسجد عمر مكرم ومجمع التحرير...الشباب وقتها اخترعوا تيمة الدق على الحديد بتاع سور الرصيف وعواميد النور - فاكرين دقوا الطبول بتاعة فيلم الناصر صلاح الدين وواسلاماه :)) - والدق كان لبث الرعب في قلوب قوات الامن اللي كان باين عليها الخوف والانهيار بعد الصلف والغرور اللي بدأوا بيه اليوم


وسبحان الله... معظم الشباب الاول ماكانوش عايزين يدقوا خوفا من اتلاف الحديد - آدي الشعب يا عم :) - ولكن اما جربوا واتأكدوا ان الحديد قوي ويستحمل كملوا الدق


المهم ان كل الناس دي اللي شفتها اليوم ده ولا اعرفهم اصلا وناس اغلبهم شباب عادية جدا فيهم من يبدو من مستوى اجتماعي مرتفع ومنهم من يبدو رقيق الحال لكن الكل كان وحدة واحدة بفضل الله


وفي ظل صوت مهيب من قرع الحديد تقدمنا للضغط على قوات الامن...وسبحان الله اللي ساقني - وانا مش شايف كما شرحت سابقا- لأكون من اول عشرة أشخاص يدخلوا الميدان نفسه وتطأه أقدامهم...ميدان التحرير يوم جمعة الغضب...كانت القوات مركزة على ناحية قصر النيل وبيضربوا مسيل للدموع وخرطوش...فبدأنا نهاجمهم من يسارهم- ناحية المجمع- وانشغل بضعة منهم بينا وكنا بنتحامي من طلقات الخرطوش وراء الكراسي وعواميد النور وسور منزل المترو اللي قدام المجمع نضرب وننزل وراها...واستطاع البعض الاشجع مني الوصول لمدخل شارع القصر العيني مباشرة على الميدان


ولقيناهم بيبصوا لناحيتي الهجوم بشكل قلق....ناحيتنا ناحية المجمع وناحية كوبري قصر النيل


الشرطة اتزنقت وحان وقت الحساب

الشرطة اتزنقت وحان وقت الحساب


واذ فجأة جاء الفرج .... وعلى ما يقارب الساعة السادسة وفي مشهد مذهل تاريخي خسارة انه لم يسجل استطاع شباب قصر النيل اقتحام الميدان مصحوبين بصيحات عالية جدا سمعتها وكأنها تخترق عنان السماء وكل الآفاق

(عارفين مشهد الهجوم في فيلم القلب الشجاع - ميل جيبسون اما الجيشين بيجروا على بعض وبيصرخوا بصوت عالي :))..أهو زيه كده بالظبط ...غير ان طرف بيجري وطرف تاني بيتراجع)

وفي مشهد تاريخي لن يمحى من ذاكرتي لقيت حوالي ألف من قوات الشرطة...من قوات الامن المركزي الظباط والجنود .... بيلفوا بزيهم الاسود الكئيب اللي طالما كان رمز للقبضة الامنية السلطوية القمعية الغاشمة...بيلفوا ويدونا ضهرهم....ويجروا

ايوة يجروا

ايوة حوالي الف فرد أمن ادونا ضهرهم وجريوا


بيجروا قدام الشعب اللي ياما ضربوه وقهروه وظلموه

يا مصريين ياللي قهروكم...يا مصريين ياللي غبنوكم...يا مؤمنين ياللي ساموكم سوء الخسف بالمعتقلات


بيهربوا


كلاب الليل السوداء اللي كانت بتضرب الناس بكل صلف وغرور....وبكل غباوة وعدم تفكير....بتجري

وكان بيزين مشهد هذه الكتلة البشرية المتلفعة بالاسود الحالك نجوم رتب ضباطهم وهما بيلفوا ويدونا ضهرهم ويجروا

نجومهم كانت بتلمع وهما بيلفوا..او كأنها لمعت في عيني خصيصا في هذه اللحظة كضوء مبهج للشعب المنتصر


تخيل اما تشوف المنظر ده...الف ضابط وعسكري بزيهم الاسود الكئيب ومدرعاتهم ونجومهم وسلاحهم بيدوك ضهرهم بعد سنين من القهر وبطش النظام...وبيجروا قدام الشعب


منظر بديع رائع مذهل...يمكن مفيش مراسلين كانوا في المنطقة دي في اللحظة دي ...لكن انا متأكد ان فيه كاميرات مرور ومراقبة في البنايات المحيطة صورته ويجب ان نبحث عنها ونكشفها ونذيعها


وعشان كده بقول الموضوع مش ان الشرطة انسحبت...لأ...الناس مثلا بعد ده بدقائق تقريبا ناحية عبدالمنعم رياض شافت عربيات الشرطة بتمشي بسرعة وفاكرين ان ده بسبب قرار الانسحاب المزامن لنزول الجيش...في حين اني ارى ان ده بفضل الله ثم ضغط الناس وهجومهم هو اللي هزم الشرطة ...ولو فرضنا جدلا انهم انسحبوا فهم هزموا واضطروا للانسحاب وكان قرار الانسحاب نتيجة لضغط المظاهرات الشعبية الشديد


ارجع للحظة ما جريت الشرطة...في اللحظة دي اصابتني هستيرية غير طبيعية ...بقيت بأتنطط وبأصرخ بهيستيريا ...صرخات غير مفهومة اولا ثم الله اكبر بعدها....وبقيت بأرددها بلهجات اخواننا في فلسطين والعراق وحتى باللهجات الافريقية....فرحة عارمة طاغية -عيني بتدمع وانا باكتب الكلمات دي - لا ابالغ ان قلت انها اسعد لحظة عشتها في حياتي...اذا كان اليوم ده كما قلت هو اسعد يوم في حياتي فاللحظة دي هي اسعد لحظة في هذا اليوم


تذكرت كيف طردونا بسهولة يوم 25 يناير بعد منتصف الليل وكلام العادلي انه بمزاج الشرطة وصلنا للميدان - ولم يكن بمزاجها ولا حاجة كانت غلطة وعدم توقع للاعداد يوم 25 يناير- وقال انهم وقت ما قرروا يطردونا من الميدان طردونا...طب اهه بفضل الله اقتحمناه رغم كل ما فعلمتموه وكل ما وضعتموه من قوات


اما هديت من الهيستيريا...لقيت الشباب كانوا لحقوا عربيتين امن مركزي ...نزلوا اللي فيهم وضربوهم - لكن ما ماوتوش اي منهم على حد ما رأيت - ثم احرقوا العربيتين...وبدأ الناس بشكل تلقائي في تنظيم انفسهم بالميدان لمواصلة الهجوم ولهدف مشترك لم يتكلم به احد ممن في الميدان لكن قفز للاذهان في وقت واحد بشكل تلقائي وهو عدم عودة الشرطة للميدان وتثبيت انفسنا بيه ومحاولة الوصول لمجلسي الشعب والشورى واحتلالهم


***********************

فيه ناس قد تتسائل طب ما انتم - المتظاهرين - كمان وعلى حد كلامي كنا بنستخدم العنف...ايوة استخدمنا العنف اما الشرطة بدأت باستخدام العنف...موضوع مظاهرة سلمية سلمية ده موضوع رومانسي لا يصلح للواقع...واما جهاز غاشم ظالم متكبر بما في يديه من سلاح فيجب مواجهته بشكل مناسب كي تستمر المظاهرة السلمية نفسها

غير ان سلاحنا في العنف اخف كتير من سلاحهم في العنف ... وأيضا غير انه كما حكيت - وفيه مواقف زي كده كتير لكن يضيق المجال بذكرها - الناس اما كانت بتمسك حد من الشرطة ماكانتش بتموته


تعليق أخير على هذا اليوم حتى هذه اللحظة تحديدا واحقاقا للحق...لم ارى طلقات حية - 9 مم - او طلقات كلاشينكوف - حتى هذه اللحظة - فيما بعد رأيتها - وهذا يدل على انهم مانزلوش بهذه الاسلحة الميدان على الاقل....الاصابات والقتل كانت إما بضرب القنابل المسيلة للدموع في مستوى رأس الناس فتصيب الرأس وتشج الجمجمة.. أو بطلقات الخرطوش التي تصيب بشدة وممكن تقتل اذا كانت من مسافة قريبة وكانوا بالفعل بيطلقوها من مسافة قريبة



والسؤال مين اللي منزلهمش بالسلاح الحي في الميدان وليه
؟

عندي اجابة جزئية لليه...عشان صورتهم-النظام- امام الغرب ولا تصبح الحكومة المصرية حكومة قمعية تقتل الناس بالرصاص...حفاظا على صورتهم خاصة انهم ماكانوش توقعوا الثورة بهذا الحجم وهذا الزخم الشعبي وظنوا انها ستكون مظاهرات عادية فلا داع للاساءة لـ "صورتهم" امام الغرب الذي يخشونه أشد خشية من الله....وخوفا من تعريض انفسهم للمحاكمة الجنائية الدولية...ليكن المواجهة بالرصاص وقت آخر - يوم موقعة الجمل مثلا


لكن اقول برضه...ولو نزلوا بالسلاح الحي..ولا كان هيفرق...وكنا هنكسب برضه بفضل الله


وفي ناس ماتت بأسلحة حية عند الاقسام وعند وزارة الداخلية....ومن قتلهم يجب ان يعاقب..لانه ماكانش بيحمي مرفق للدولة ملك للناس...بل كان يحمي مكان ملك لمبارك وحاشيته...كان بيحمي سلخانة للدولة ومكان التعذيب ومكان القمع


هذا غير الناس اللي ماتت باسلحة وعناصر فرق مكافحة الارهاب المتطورة يوم موقعة الجمل.....الاسلحة والعناصر اللي لم تكن لتتحرك ولا تستخدم الا بقرار سيادي رئاسي


**************

منذ هذه اللحظة والميدان ملك لنا الشعب لا يطأه جندي من الشرطة الا بإذننا...وياريت ما نضيعش ده بتفرق الكلمة او بأهداف سياسية خاطئة تفقدنا الدعم الشعبي او بإغضاب الله

وبدأت معركة ضارية اخرى في داخل الميدان نفسه للحيلولة دون رجوع الشرطة ليه مرة اخرى ( منين بقى انسحبت ؟ :)) ) والتقدم باتجاه مجلسي الشعب والشورى.... استمرت هذه المعركة من السادسة والنصف تقريبا حتى العاشرة ونصف تقريبا مساء جمعة الغضب 28 يناير


واستخدمت فيها الطلقات الحية من ناحية الشرطة- ضباط من امن الدولة طبقا لشهادة الشهود


لكن هذه قصة اخرى

يارب اكتبها
:)

Tuesday, January 18, 2011

الإسلاميون ....والتغيير

فكرة الكلام القادم في ذهني منذ فترة طويلة ..... لان هذا الموضوع يتصاعد والامر يتحول كما قال الاستاذ فهمي هويدي الى انه بشكل متدرج يترسب الان في الوجدان الجمعي في طبقة من المتعلمين والمثقفين ان الدين هو المشكلة وأنه يجب اقصاء الدين من المعادلة السياسية والاجتماعية لأجل التغيير الذي ننشده في مصر وأننا نعاني من تدين سطحي لا حل له على الاطلاق وان الدعاة مالهمش اي لازمة في الحياة بل واصبحت كلمة شيوخ الفضائيات لبانة يتشدق بها البعض وتستخدم كسبة للدعوة ولاصول الدين




هناك فريق من الكتاب والمعارضين السياسيين - وبعضهم محترفي سياسة بحق - ولكن شغالين "عجن" في الدين وتهزيق في الشعب المصري بتدينه الفطري وافتاء بدون علم في الشرع واتحافنا بآرائهم في التاريخ الاسلامي والصحابة وسب وتخبيط مباشر في الصنف الأخير - الصحابة - بكل برود





ابراهيم عيسى



علاء الاسواني



بلال فضل



احمد خالد توفيق



نوارة نجم





وغيرهم







وعلى الجانب الآخر...حركة سلفية تتشدد في البعد والغياب عن الواقع السياسي لسببين...الاول هو انها اول من اشتغل بالسياسة وللاسف بدأوا من حيث كان يجب ان ينتهوا - الجهاد المسلح كان يجب ان يكون الحل الأخير وليس الأول وبعد محاولات ومحاولات من نشر الدعوة والتغيير السلمي - فاكتووا بنار ما حدث واكتوت الدعوة واكتوى عامة الناس بتبعات هذا التسرع وترسب ايضا في وجدان البعض لفترة طويلة سيئات ما حدث بالاضافة الى التضخيم الاعلامي من اذناب الظالمين المتعمدين او المخدوعين بدورهم...فكانت النتيجة ان آثروا الابتعاد عن الشأن العام





والسبب الثاني هو انهم لا يريدون تقديم الدين للناس كحل وسبيل للرفاهية فماذا يكون الحل ان أبتلينا في هذه الحياة الدنيا بسبب تطبيقنا للدين والعدالة وحاربنا من لا يرجو الله واليوم الآخر.... وفي هذا عندهم كثير من الحق وليس كل الحق







نقطة ومن اول السطر ونقول







اولويات الدين الخمس بالترتيب من الاكثر اهمية الى الاقل اهمية هي



الدين



العرض



العقل



النفس



المال





اول واحدة هي

:

الدين



الدييييييييييييييين



الـــديـــــــــــــــــــــــــــن





وتاني حاجة العرض



والنفس والمال تأتي في الذيل







يقول الله سبحانه وتعالى في القرآن الكريم





وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ



مَا أُرِيدُ مِنْهُم مِّن رِّزْقٍ وَمَا أُرِيدُ أَن يُطْعِمُونِ



إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ







الشعب المصري المنتقد في حميته لدينه مع سلبيته وقلة وعيه في مواطن اخرى في مقاومة الظلم لايزال

يحتفظ بدينه كخط احمر يثور لسببه على الرغم من عدم ثورته - او لنقل تاخرها - في مواضع أخرى



لأجل هذا يخرج في مظاهرات بكل حماس لاجل الرسوم الكاريكاتورية المسيئة للنبي صلى الله عليه وسلم وللقرآن بشكل اكثر كثافة بكثير من مظاهراته لاجل لقمة عيش او شهيد تعذيب





ولأجل هذا يخرج في مظاهرات لاجل اخت اسلمت وتم خطفها وحجزها لدى من لا يؤمن بالله ورسوله وبمعاونة الحكومة الظالمة



فيه خلل في هذه المعادلة نعم....لكن لا تزال هناك فطرة سليمة ولله الحمد...لم نصل لنقطة الصفر ولله الحمد...مازال شعبنا يملك أهم مقوم من مقومات النفس الحية ولله الحمد...لنبن عليها إذن ولا ننتقدها ولا نهدمها ولا نحقر ونسخف منها





هؤلاء الكتاب لم نرهم انتقدوا خروج الشباب لاجل مساندة تامر حسني بقدر ما انتقدوا

خروج الناس لمظاهرات ضد الدنمارك



أويهيئ لهم شيطانهم ان دين الله هو المشكلة

؟





هم يرون انه من الاولى ان يخرج الشعب لأجل "لقمة عيشه" ويتميزون غيظا لاجل هذا





المم والامبو



وغير كده يبقى متخلف متأخر همجي جاهل أحمق متعصب هيستيري متطرف لدينه.....وكأنها سبة ان يغار الانسان على دينه







المطلوب ليس هدم او انتقاد او كبت او مسح هذه المشاعر من عموم عامة الشعب - الذي يعيش في الأمور العامة بالفعل كزهور الحائط وينظر لمصلحته الفردية فق في امور الدنيا....ولكنه لا يزال يتبع مشاعره الفطرية عندما يهان دينه او عرضه





المطلوب هو البناء على هذه المشاعر الدينية الجياشة واضافة بعد جديد لها وهو مقاومة الظلم





مقاومة الظلم فريضة



يقول الله سبحانه وتعالى



وَمَا لَكُمْ لاَ تُقَاتِلُونَ فِي سَبِيلِ اللّهِ وَالْمُسْتَضْعَفِينَ مِنَ الرِّجَالِ وَالنِّسَاء وَالْوِلْدَانِ الَّذِينَ يَقُولُونَ رَبَّنَا أَخْرِجْنَا مِنْ هَـذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا



ويقول أيضا



إِنَّ الَّذِينَ تَوَفَّاهُمُ الْمَلآئِكَةُ ظَالِمِي أَنْفُسِهِمْ قَالُواْ فِيمَ كُنتُمْ قَالُواْ كُنَّا مُسْتَضْعَفِينَ فِي الأَرْضِ قَالْوَاْ أَلَمْ تَكُنْ أَرْضُ اللّهِ وَاسِعَةً فَتُهَاجِرُواْ فِيهَا فَأُوْلَـئِكَ مَأْوَاهُمْ جَهَنَّمُ وَسَاءتْ مَصِيرًا

إِلاَّ الْمُسْتَضْعَفِينَ مِنَ الرِّجَالِ وَالنِّسَاء وَالْوِلْدَانِ لاَ يَسْتَطِيعُونَ حِيلَةً وَلاَ يَهْتَدُونَ سَبِيلاً





والنهي عن المنكر فريضة...باليد - للقادر على ذلك دون ان يسبب فتنة أكبر وبعد اتباعه سنن التغيير..وباللسان وهو الشائع ...وبالقلب بأن يكون القلب عارفا للحق منكرا للمنكر منتظرا الفرصة لتطبيق الصواب بصدق ما استطاع الى ذلك سبيلا





لو اننا اقمنا ثورة عشان المم والامبو (باستخدم لفظ المم والامبو لبيان استحقار الجهاد من اجل الاكل والشرب-لقمة العيش) وجاءت حكومة وطنية لاصلاح المم والامبو فماذا سيكون الحال ان حوصرنا وحوربنا من الدول الغربية بسبب وجود حكومة وطنية

؟



لماذا نلوم على محمود عباس اذن ونآزر حماس وشعب غزة في حصار غزة

؟



ارى بعضكم وقتها سيتراجع ويقول لنعش في سلام وامان اولى من ان نعيش في حرية وقوة وعزة وكرامة



ولله العزة ولرسوله وللمؤمنين







والحال لم يعد مجرد حاكم مستبد قليلا...مخطئ قليلا...يحتاج لتقويم... يرعى مصالح البلاد والعباد بالفعل ولكن على عوج



ليس هذا هو الحال



تحول الامر لحاكم ظالم غاشم يسرق الناس وينزل جنده بالناس سوء العذاب والظلم ويصد عن دين الله ولا يأبه للمستضعفين والمساكين في شعبه وفي الشعوب التي حوله ويمنع من يريد مساعدتهم فقط لاجل كرسيه وحكمه...بل ويريد قبل موته وضع من يكمل سيرته هذه في الناس فقط كي لا يذكر بسوء بعد موته







لذا فإنكارنا للوضع الحالة من حاكم ظالم مستبد وحكومة ظالمة غاشمة يجب ان ينبع من مبدأ مقاومة الظلم والامر بالمعروف والنهي عن المنكر ما استطعنا



لو فهمنا هذا ستنضبط تدريجيا مفاهيم مثل المواطنة والتعايش وتطبيق الشريعة في عقولنا



لو فهمنا التغيير انه على مبدأ ....وليس طريقة عيش ومقدرات عيش ستختلف نظرتنا للحياة ...وللتغيير نفسه...للأفضل بإذن الله





الله سبحانه وتعالى وعد عباده المصلحين بالاستخلاف في الارض ...وبفتح عليهم من بركات السماوات والارض



ولكن ابدا لم تكن هذه الثروات هي غاية العباد المصلحين الربانيين



كانت مسألة مبدأ



بل انها فتنة يخشى منها على المؤمنين







أخرج البخاري رحمه الله بسنده عن عمرو بن عوف المزني رضي الله عنه أن رسول الله صلى الله عليه وسلم بعث أبا عبيدة بن الجراح إلى البحرين يأتي بجزيتها ، وكان الرسول الله صلى الله عليه وسلم هو صالح أهل البحرين وأمر عليهم العلاء بن الحضرمي ، فقدم أبو عبيدة بمال من البحرين ، فسمعت الأنصار بقدوم أبي عبيدة ، فوافوا صلاة الفجر مع النبي صلى الله عليه وسلم فلما انصرف تعرضوا له فتبسم رسول الله صلى الله عليه وسلم حين رآهم ، ثم قال : ( أظنكم سمعتم أن أبا عبيدة قدم بشيء ) . قالوا : أجل يا رسول الله ،

قال

: فأبشروا وأملوا ما يسركم ، فوالله ما الفقر أخشى عليكم ، ولكني أخشى أن تبسط عليكم الدنيا ، كما بسطت على من كان من قبلكم

(فتنافسوها كما تنافسوها ، وتهلككم كما أهلكتهم )



وفي رواية عند مسلم

( وتلهيكم كما ألهتهم )









ليس الغرض من هذه الحياة هو تسهيل لقمة العيش ومقدرات العيش ...والعيش في امان نسبي وكفى





الله سبحانه وتعالى يقول



وَالَّذِينَ كَفَرُوا يَتَمَتَّعُونَ وَيَأْكُلُونَ كَمَا تَأْكُلُ الْأَنْعَامُ وَالنَّارُ مَثْوًى لَّهُمْ





بل ان الله سبحانه وتعالى يقول عن التعلق برغد ومقومات الحياة الدنيا



قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ وَاللّهُ لاَ يَهْدِي الْقَوْمَ الْفَاسِقِينَ





لكن الغرض هو عبادة الله سبحانه وتعالى وتنفيذ اوامره والجهاد في سبيله ...بالقول واللسان والعمل - نشر الدعوة وغيرها



ومنها توفير بيئة آمنة للناس كي يعرفوا الله عز وجل ...ويؤمن من يؤمن وقتها ويكفر من يكفر



ولا يكون هذا بالتخلي عن بعض مبادئ الدين ظنا منا اننا بهذا نقيم هذه البيئة بهذه الطريقة



ان تخلينا عن مبادئنا...لن نصل لما نرجو فلا يمكن ان نصل لطاعة الله بمعصيته



وسننسى ان وصلنا ماذا كانت مبادئنا من الاساس ...واظننا نرى نماذج مصغرة هذه الأيام لمثل هذا النسيان





والتخلي عن مبادئ الدين يختلف عن التدرج في تطبيق شرائع الدين ولكن هذا تفصيل آخر





اما من يخافون على الطوائف الأخرى من تطبيق الشريعة - وبعض من هؤلاء يلبس قميص الطوائف الاخرى فمشكلته هي الشريعة وليس الطوائف الاخرى - فان الله سبحانه وتعالى وضع سنته في الأرض ان من يطغى ويتكبر باسم الدين يقصمه الله ويذله ولو بعد حين



فمن اقام باسم الدين امبراطوريات تكبرت وبغت وحادت عن مسار الدعوة بالحكمة والموعظة الحسنة واذلت الشعوب الاخرى ونقضت غظلها من دين سمح قوي بعد ان مكن الله لها في الارض..ضرب الله عليها الترف وحاد اهلها عن صحيح الاسلام ...ففسقوا فيها...فحق عليها القول فدمرت تدميرا



وما حدث في المسلمين في الاندلس بعد ان تحول ملكهم لاباطرة يسومون اهل البلاد المفتوحة سوء الخسف ونسوا كيف كان يعامل الرعيل الاول من حملة الدين اسراهم واهل البلاد المفتوحة .... ثم تبعهم قوم هادنوا ائمة الكفروركنوا للدعة فأذلهم الله



وما حدث في الدولة العثمانية من تمزق وتشتت بعد ان تحولوا لأباطرة على الرغم من بدايتها الاسلامية القوية ببعيد



وما حدث لاهل بغداد بعد قرون من الدعة والترف والغيبة والغيبوبة عن امور دينهم وامور المسلمين وامور الناس من حولهم وتركوا ةالفساد يضرب في الارض يمنة ويسرة وتركوا الجهاد لاجل اقامة العدالة والامان لخلق الله





فمن اذل خلق الله المسالمين في ارضه...يذله الله...فمن يقول بعودة الشريعة وعودة الدين للحياة - وهو ليس بخيار بل فريضة - يجب ان يكون ايضا على مستوى اوامر واحكام الدين والشريعة والدعوة لدين الله باستخدام القوة في مواطن القوة واللين في مواطن اللين









اردت عرض الامور من الوجهتين ....ورب مبلغ اوعى من قائل او سامع







وَيَا قَوْمِ مَا لِي أَدْعُوكُمْ إِلَى النَّجَاةِ وَتَدْعُونَنِي إِلَى النَّارِ



تَدْعُونَنِي لِأَكْفُرَ بِاللَّهِ وَأُشْرِكَ بِهِ مَا لَيْسَ لِي بِهِ عِلْمٌ وَأَنَا أَدْعُوكُمْ إِلَى الْعَزِيزِ الْغَفَّارِ



لَا جَرَمَ أَنَّمَا تَدْعُونَنِي إِلَيْهِ لَيْسَ لَهُ دَعْوَةٌ فِي الدُّنْيَا وَلَا فِي الْآخِرَةِ وَأَنَّ مَرَدَّنَا إِلَى اللَّهِ وَأَنَّ الْمُسْرِفِينَ هُمْ أَصْحَابُ النَّارِ





فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ



فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ