Tuesday, June 20, 2006

ترتيب الأولويات في مصر..........1

في مصر ترتيب اولويات اتخاذ القرار كالتالي


1- الأمن القومي....أو ما يسمونه كذلك

2-الرئيس ورغباته واتجاهاته

3- العائلة والحاشية ورجال الأعمال والحبايب والقرايب (ومن طنط وعمو وخالتو لجيمي وعلاء وحمادة و و و

4-الحفاظ على الضغط الشعبي عند حد معين عشان ما يهددش اول ثلاثة بنود



نحفظهم كده عشان هأستخدمهم بالمنظر ده 1و2و3و4

اما الدين فـ....ففي المدونة الجاية إن شاء الله


المهم دلوقت



طبعا التنسيق عالي اوي بين 1 و2 بمعنى انه 2 لا تلغى اوامره ولكن قد تؤجل حتى لا تتعارض مع 1 حتى يكون ذلك ممكنا


يعني 2 مثلا عايز جيمي ...بس بتوع 1 يقولوله مش وقته ...يبقى نستنى شوية عشان 4 ما تفرقعش في وشنا....شوية كده ننيمهم وفي نفس الوقت عشان 1 ما تبوظش وامريكا ما تغضبش علينا يبقى لازم نقدملها فروض الولاء والطاعة الأول ...وبعدين هوب 2 يعمل اللي هو عايزه برضه



إتنين مثلا مش عاجبه الجنزوري ومن قبله ابوغزالة ...منافس قوي ل3 بل ول2 نفسه .....نعمل تمهيد وفرقعة للتغيير الكبير او ترقية تلفزيونية وهمية عشان 4 ما تفرقعش في وشنا ...وهوب ناكلهم ونمشي رأي 2 ...ونظبط 1 مفيش مانع عشان ما يتأثرش



لكن مش كل 3 مهم ....يعني مثلا عندي في 3 وزير أو مسؤول او رجل اعمال ريحته فاحت اوي لدرجة ان 4 خدوا بالهم..... او ان الوزير ده او رجل الأعمال خرج عن طوعهم ولازم يبقى عبرة.......يبقى مفيش مشاكل نضحي بيه و
أهو كلب وراح ....وطبعا لو خبط في 1 وقعته سودة أسود من من قاع الأطلنطي شخصيا .........وبتوع 1 بقى دول ما عندهمش تفاهم في دي و هيتقطع حتت ويترمي لأقرب كلب بحر معدي




أما حلة الضغط الشعبي الشهيرة ب4 ...فدي امرها سهل طالما من شعب تعداده 75 مليون ....منهم 50 مليون تقريبا بلا مبالغة نايمين في العسل...و5 مليون قوات مسلحة وشرطة ما لهمش إلا طاعة الأوامر (مع ان دول اذا صحيوا إذا صحي منهم مليون واحد بس هيفرقوا كتير بس 1 مش ممكن يسمح بكده ) ...يبقى عندي مشكلة فقط في 20 مليون من 75 .....



فيهم طلبة الجامعات اللي هما المفروض الحماسة مع عقل (قوة+عقل)...نشغلهم بالحب والغرام وقصص الهيام .......وهيفا وروبي ونانسي ونجلا ..... واتمشى على الكورنيش وعيش حياتك وبعدين تسيبك وتتجوز اول زكيبة فلوس معدية وتقعد فيها انت تعمل عبدالحليم في الوسادة الخالية .......أو يسيبك هو ويعيش في دور الشرف (ما بأتكلمش هنا عن التوبة النصوحة ...بأتكلم عن الندالة والتلاكيك).... ومش هأتجوز واحدة مشيت معايا عالكورنيش وتعيشي انتي في دور زبيدة ثروت .......يبقى كده نقدر نشيل 10 مليون مستريح



بيتبقى اللي 10 مليون ....فرق وجماعات شتى ومنهم من هو صاحي للانتفاع او لفرصة الوثوب على السلطة ويبقى العن من 2 اللي موجود دلوقت (على الأقل 2 عنده خلفية شوية........استغلها غلط آه بس أهو احسن من للي جاي ينط عليها وهو مالوش فيها اساسا )..........فنستفيد منه شوية ونلمع بيه 1 شوية ونرميله العضمة ...ومافيش مانع نلمعه شوية أهو أسهل ل1و2 من الاسلاميين .......وبعدين مالوش لازمة ومالوش غير الجزمة القديمة



ومنهم من هو مخلص حقا ولكن واخد سكة غلط .......يبقى نحافظ على اللي واخد سكة غلط يفضل في الغلط ......او هو نفسه هيوفر علينا المجهود وتتجاذبه الأفكار والأهواء ويبذل مجهود خارق بجد ........لكن كما قيل في الحديث فيما معناه "لو استفتحوا من كل باب وجاءوني من كل طريق لم أقبلهم إلا من بابك (او من خلفك) يا محمد ..." او كما قيل لاني مش فاكر نص الحديث قوي وللأسف معنديش دلوقت وقت أدور ....

او يعني كما قيل في الآية الكريمة
قُلْ أَنَدْعُو مِن دُونِ اللّهِ مَا لاَ يَنفَعُنَا وَلاَ يَضُرُّنَا وَنُرَدُّ عَلَى أَعْقَابِنَا بَعْدَ إِذْ هَدَانَا اللّهُ كَالَّذِي اسْتَهْوَتْهُ الشَّيَاطِينُ فِي الأَرْضِ حَيْرَانَ لَهُ أَصْحَابٌ يَدْعُونَهُ إِلَى الْهُدَى ائْتِنَا قُلْ إِنَّ هُدَى اللّهِ هُوَ الْهُدَىَ وَأُمِرْنَا لِنُسْلِمَ لِرَبِّ الْعَالَمِينَ


يتبقى الاسلاميين ........ سلفي قاعد في الجامع+سلفي مش قاعد في الجامع (حبيب قلبي ده) + إخوان (حبيب قلبي برضه بس زعلان منه خفيف خفيف) + اسلامي قاعد في الجبل (ده وقعته اسود من اي حد )+ شيعة ومتصوفة و و و و


دول بقى حكاية تانية في المدونة القادمة ...إن شاء الله


المهم نرجع ل4 - حلة الضغط الشعبي - المهم نحافظ عليها بحيث ما تهددش 1 اولا و2و3 ثانيا ....يعني الناس زهقت من الكهربا وفواتيرها مثلا ....يبقى نركب الموجة ونطلع قرار تلفزيوني لا يسمن ولا يغني من جوع نحول بيه حلة الضغط الشعبي لحلة تهليل للزعيم واوامر الزعيم ورقة الزعيم وحنية الزعيم ....او مثلا نشغل حلة الضغط الشعبي بلقمة عيشه فميبقاش عنده وقت يبص جنبه ....او مثلا نطلعلهم بقضية كبيرة (نضحي مثلا بحد من 3 كطعم ) مقابل انهم ما يخدوش بالهم من اللي بيحصل حواليهم..........او نسوأ صورة الاسلاميين بحالة حمار (حالة حوار) وما شابهها طالما هما الوحيدين اللي بيثق الناس فيهم وممكن فعلا ينجذبوا لهم......... وكله يهون عشان خاطر عيون 1 و2



وآه يا بلد وآه يا دين محمد .......حد فاهم حاجة ؟؟؟؟؟؟؟؟



معلش بجد وأعتذر لأي حد بيقرا المدونة - ده ان كان حد بيقراها اساسا :)) - ان كان اسلوبي قاسي احيانا

3 comments:

eldoctor said...

لا انا ماسك دليل و كل شوية ارجع لواحد و اثنين وثلاثة و اربعة ...
اسلوب التدوينة خطير...

moro said...

لا اهو بنحاول نفهم بس فعلا لاسلوب خطير ولذيذ وخفيف خفيف كمان

أروي الطويل said...

انا كل ماادخل مدونة حضرتك ، أحس ان حضرتك ماينفعش تشتغل غير في مجال الاعلام ...بجد بجد