Friday, January 20, 2012

أحداث محمد محمود -6 - الأخيرة

الجمعة 18 نوفمبر : مليونية تسليم السلطة

السبت 19 نوفمبر : ضرب المعتصمين وبداية ما عرف باسم احداث محمد محمود

الأحد 20 نوفمبر : مجزرة ارتكبتها الداخلية في حماية الشرطة العسكرية

الاثنين 21 نوفمبر : استمرار المصادمات وسقوط الشهداء في شارع محمد محمود والاعداد لمليونية

الثلاثاء 22 نوفمبر : مليونية الشهداء وبيان طنطاوي بتسليم الرئاسة اول يوليو

الاربعاء 23 نوفمبر : استمرار المواجهات وبداية جهود تهدئة شارع محمد محمود

الخميس 24 نوفمبر : توقف المواجهات في شارع محمد محمود واعلان الجنزوري رئيسا للحكومة الجديدة

الجمعة 25 نوفمبر : مليونية الحكومة الانتقالية وتكوين مجلس رئاسي مدني

السبت 26 نوفمبر : بداية اعتصام مجلس الوزراء


********************

الخميس 24 نوفمبر

تثبيت التهدئة عنوان اليوم

وصلت الميدان بالليل كالعادة وما قعدتش فيه اكتر من ساعة

دخلت اولا على محمد محمود لقيته اتقفل من كل ناحية....سور حجري تم بناؤه من الليلة الماضية وواقف عليه جيش - مش شرطة

مداخل شارع محمد محمود كلها من كل ناحية حتى من الحواري واقف عليها سلاسل بشرية لشباب رأى انه يجب وقف نزيف الدم هذا فورا والاتجاه للحلول السياسية

فيه ناس كانت بتحاول تخترق السلاسل...بدعاوى مختلفة ...اللي عايز يتفرج...اللي بيقول انه موتور من الشرطة لانها قتلت اصدقاؤه او اخوانه...اللي بيهرج...اللي جاد

لكن في النهاية التهدئة اتثبتت والاشتباكات توقفت

النقطة الاخرى ان الميدان هذا اليوم تحول لشئ هلامي تماما....الميدان بقى حسين بالجنزبيل - عشان حمادة صاحبي بيزعل :)) - ناس كتييير جاية تهرج...ناس جاية تهيج...ناس جاية تتفرج وتشرب حمص

وعشان كده مشيت اليوم ده بسرعة

خلاص الاسبوع ده خلص والمهمة انتهت

مهمة لم يكلفنا بها احد...مهما كلفتنا بها ضمائرها...وطبقا لمرجعيتي....التي لا ارضى بها بديلا واسأل الله الثبات عليها حتى الممات ولا ارى ثواب في الآخرة لمن خارج هذه المرجعية فان هذه المهمة كلفني بها ديني ...على تقصير منا...ولعلها تكون شافع لنا

وغادرت الميدان آملا ان يكفينا الله شر القتال ولا نضطر للعودة اليه مرة اخرى وان يكون باقي اللعبة سياسة...ولكن ان اضطررنا للمواجهة مرة اخرى فسنفعل بأمر الله...حتى وان كنا لا نعرف بعضنا البعض لكن اثق انه في نقطة ما ان لم يفعل السياسيون ما يتوجب عليهم فعله...فالشعب - الكتلة الحرجة فيها
وليس ارباب الكنب والمؤامرات والمصالح الفردية الضيقة - سيعود للشارع مرة اخرى


أيضا في الميدان هذا اليوم كانت النقاشات السياسية هي سيد الموقف....اغلب اتجاه الناس كان ناحية الرحيل الفوري للعسكر وتشكيل حكومة انتقالية من الثورة

النقاشات دي كانت مستمرة طوال الاسبوع...ويمكن مرة كنت معدي وفي وسط الميدان ولقيت ناس بتتكلم عن الانتخابات وبتشتم في الاخوان...حاولت اعقل الناس وافهمهم ان ما نفعله هنا ضروري وما يفعله الاخوان ضروري لكن نظروا الي على انني نفسي اخوان ولذا بدافع عنهم...محدش اتخانق معايا لكن كلامي لم يلق قبولا


واقول لكم بكل امانة ...كنت ارى مسألة رحيل العسكر الفوري كلام رومانسي جميل لكن غير قابل للتحقق على ارض الواقع وليس المسار الافضل للبلد...مكنتش عارف آخرة اللي بيحصل في التحرير الاسبوع ده ايه....سياسيا اعني...لكن كنت عارف انه ضروري جدا...
انه يحصل وانه درس
من الضروري اعطائه للمجلس العسكري حتى وان كلفنا شهداء جدد...درس للمجلس العسكري ان الثورة مستمرة

اما كنت بأهدى وبأفكر بقول وعلى الرغم من ذلك فلا زالت الانتخابات هي الاساس...الانتخابات ليست مجرد كراسي او مطامع...ساذج او اعماه الغضب من يقول هذا...الانتخابات دي كانت مطلب اساسي اما نزلنا اول مظاهرة يوم 25 يناير 2011 فاما نكون على بعد ايام منها فلا يجب ان ننجر وراء افسادها مهما كان

موضوع الحكومة الانتقالية ده يصلح لو كان على بعد اشهر من الانتخابات ...لكن على بعد ايام فالافضل ترك القيادة الحالية مهما كانت...لكن على ان تعلم ان ما قبل احداث محمد محمود ليس كما بعدها ..وان فكرة الخروج الامن شبه انتهت...واننا لن نقايضكم مرة اخرى على الخروج
الآمن مقابل عدم اثارتكم للمشاكل...ستكملون الفترة الباقية حتى نهاية الانتخابات ثم تسلم السلطة لمجلس الشعب ...واذا اختار اهالي الشهداء محاكمتكم فيجب ان تتقبلوا المحاكمة


المثير للسخرية المريرة ...ان المجلس العسكري في الاعلام الحكومي - صحف وقنوات التليفزيون الرسمي وسي بي سي...اصبح يركز هو نفسه على الانتخابات ويمدح فيها ويدعو الناس بالمشاركة ويصفها بالخطوة الديموقراطية العظيمة التي ستنقل مصر نقلة كبيرة في اتجاه تسليم السلطة
...مع انه من اسبوع واحد كان بيسعى لتفريغ هذا المجلس النيابي من مضمونه وتحويله الى مجلس كراسي ومكلمة ونادي اجتماعي وحظيرة دواجن معارضة بوثيقة السلمي وبقراراتهم المنفردة- ولو لم تحدث مواجهات محمد محمود لاصبحت هذه عنده قناعة ولكانت هناك مواجهة وقتها ايضا على صلاحيات مجلس الشعب

بل ان ما كان يقال في الميدان ايام اعتصام مجلس الوزراء فيما بعد ان المجلس سيكون بدون صلاحيات وكان الرد سننتزع هذه الصلاحيات بإذن الله لا مشكلة



وعلى الرغم من نزولي الميدان في هذه الاحداث ومن يوم السبت ....إلا أني أتفهم بشدة موقف جماعة الاخوان المسلمين...وأيضا موقف حازم صلاح أبو اسماعيل من تراجعه عن دعوته للاعتصام الجمعة الماضية على الرغم مما سيخصم ذلك من رصيده ...ولا ارى انهم تخلوا عن الناس ولا
ازايد عليهما وعلى موقفيهما واسأل الله ان يكون اي قرار يتخذوه يزيد من رصيد الثورة ويصب في صالحها ايا كان اتجاه هذا القرار

لو نزل الاخوان لتحول الامر الى مواجهة شاملة بين قطاع من الشعب امام قطاع من ذوي المصالح...صحيح برضه نتيجة المواجهة في النهاية ستكون بأمر الله لصالح الثورة ولكن الخسائر ستكون كبيرة على البلد وعلى الشعب ولتأخرت الانتخابات الى اجل غير مسمى ونحن على بعد عدة ايام منها... فلم نذهب في اتجاه الخسائر طواعية ان كنا نستطيع تقليل الخسائر قدر الامكان ؟ ولا نضطر ان نذهب اليها الا ان اضطررنا اليها بالكامل- كما حدث مع مبارك حيث كانت الثورة الحل الاخير بعد ان انسدت كل طرق التغيير السلمية والقانونية ...
وكلا الفريقين : المتظاهر والسياسي فليحترما ويقدرا بعضهما البعض ويعلما انهما يكملان بعضهما البعض

هنا فيه اشكالية لا يفهمها العلمانيون والليبراليون....ان الاسلاميين عندهم مبدأ وقاعدة من حديث نبوي شريف


صحيح البخاري ....باب لا تمنوا لقاء العدو

.....إن رسول الله صلى الله عليه وسلم في بعض
أيامه التي لقي فيها العدو انتظر حتى مالت الشمس ثم قام في الناس فقال أيها الناس لا تمنوا لقاء العدو وسلوا الله العافية فإذا لقيتموهم فاصبروا واعلموا أن الجنة تحت ظلال السيوف ثم قال اللهم منزل الكتاب ومجري السحاب وهازم الأحزاب اهزمهم وانصرنا عليهم

اذا لا نتمى الحل الاعنف ولكن ان اضطررنا اليه نفعل

بمعنى ان وسيلة المواجهة العنيفة - مش ضروروي تكون حرب - الثورة والمظاهرات والعصيان المدني الشامل اللي حصل في ثورة 25 يناير وسيلة عنيفة للتغيير ولكن فرضت علينا..اما نضطر نعملها ....لكن اما نضطر

واشكالية اخرى...لاااااااااااابد من وجود قيادة للامة وللبلد...لا تترك الامور هكذا...لذا فالحرص على وجود المجلس العسكري حتى يتم انتخاب قيادة بديلة هو حرص على مقدرات الناس....ولو ان البعض ينظر لجرائمهم فالاسلاميون ينظرون لكم الدماء الاكبر اللي ممكن يسيل اذا فقدت القيادة وفقد الرابط

الفيصل هنا هي محاكمة من اخطأ في العهد الجديد ودي نقطة ان شاء الله هاتكلم عليها في نوت منفصلة ان شاء الله

على الناحية الاخرى يجب على الاسلاميين ان يحترموا من يقومون بالمظاهرات ومن قاموا بالثورة ....طلع بعض الاسلاميين يهاجموا من في التحرير - ومن في التحرير كانوا سابقين للطعن في الاسلاميين وفي كل من نادى بالانتخابات

هذا التخوين المتبادل ليس في صالح احد ولا يزيدنا الا فرقة على فرقة

اخوف ما يخاف منه اعداؤنا الخارجيين هو الاتحدا والاستقرار..وهذه الخلافات والتخوينات تقودنا لعدم الاستقرار


*********************************

ملاحظة ايضا يجب ان تقال

الثورة دي عرفتنا حقيقة ناس كتير..مش ضروروي بشكل بالغ في الشيطنة لكن فيه ناس كانت تحسب على المعارضة ايام المخلوع وسقطت بالثلاثة في اختبارات الثورة واحداثها

كمثال وليس حصرا : يحيى الجمل - خالد عبدالله - اسامة الغزالي حرب

واخيرا - واتمنى آخرا - سليم العوا بقى من الناس اللي سقطت في هذه الاحداث...او حاليا يسمى اللواء سليم العوا العضو المنتدب بالمجلس العسكري

سليم العوا كنت لأنتخبه رئيسا - قبل ان يظهر حازم ابو اسماعيل

عمل ايه سليم العوا

عندما جاء سليم العوا الميدان يوم الاثنين 21 نوفمبر ...هاج عليه بعض الشباب متهمينه بالموالاة للمجلس العسكري واعانته في مواجهة الثورة والثوار ....وبان على وجهه الضيق الشديد...كنت ساعتها في وسط الميدان وشاركت مع من شاركوا في تهدئة الشباب وابعادهم ومنح الفرصة له
كي يكمل كلامه حتى لا يخرج مطرودا

لكن بعد اللي عمله لو شفته بينضرب قدامي مش هأتدخل لصالحه مرة أخرى


عمل ايه بقى ولازال يفعل هذا الفعل

المشكلة اني ارى ان سليم العوا انتقم من هؤلاء باسلوب طفولي جدا....واسلوب لا يليق به بالمرة...يوم الخميس ده اما روحت وجدته في لقاء مع لميس الحديدي على
Cbc
ويقول انه عنده معلومات عن شباب يملأون كرات تنس بالبنزين وهيرموها على الجيش عند ماسبيرو وانه هيبلغ عنهم الجيش

وطبعا لو كانوا مسكوا حد كانوا اعلنوا ...اي تخريف واشاعات ومن مين ..من سليم العوا ؟؟؟

وكلام آخر عن ان المجلس العسكري اكتسب الشرعية للحكم في الاستفتاء ؟؟؟؟ وده كلام يناقض ما قاله المستشار طارق البشري نفسه

وقال كلام تاني كتير يثبت فيه موقف المجلس العسكري

شئ محزن - وده اقل لفظ مهذب- انه راجل زيه ينزلق هذا المنزلق

حازم صلاح ابو اسماعيل كمثال كان يتواجد في الميدان كل يوم على الرغم من ان البعض كان يهاجمه بسبب تراجعه عن الاعتصام يوم الجمعة لكن كان متواجد في وسط الشباب

...حازم صلاح ابواسماعيل اراه اعلى شخص في هذه الثورة بمزجه بين الفكرة الاسلامية النقية الصحيحة واسقاطها على الواقع الحديث بشكل عصري والروح الثورية السياسية العميقة الفاهمة

ولم ينزلق مثل العوا ..وربنا يثبته ويثبتنا جميعا

محمد البلتاجي ايضا خرج من الميدان بشكل عنيف لكن لم ينزلق لمثل هذا المنزلق

ومازال العوا يتبنى مواقف المجلس العسكري بشكل مثير للاشمئزاز


************************

الجمعة 25 نوفمبر : مليونية الحكومة الانتقالية وتكوين مجلس رئاسي مدني


الجمعة دي لم اتابعها من الميدان لاني كما قلت غادرت الميدان يوم الخميس عازما الا ارجع اليه الا لشئ يخص الانتخابات

والمشهد في هذه الجمعة كان مشهد اطلق عليه : كوميدي...مأساوي...ووطني ايضا

لسخرية الاحداث...البرادعي اللي هو سبب مباشر في كل اللي بيحصل دلوقت بأنه هو اول من فتح الباب الاسود المهبب بتاع المبادئ الفوق دستورية اللي بدات كل هذا الكلام - بحسن نية ده حصل لكن حصل - ولم يحترم نتيجة الاستفتاء الديموقراطي كما كان يجب ولم يستموت على احترام اختيار الناس وفتح النافذة للعسكر للقفز على الثورة والتسلل من خلالها ....بقى عند البعض دلوقت المنقذ المنتظر

البرادعي احترم جدا ما فعله ضد مبارك لكن ما حدث منه في موضوع المبادئ الفوق الدستورية واصراراه حتى بعد الاستفتاء على الدستور اولا وضغطه في هذا الاتجاه لهو سقطة كبيرة تثبت انه نعم يردي الديموقراطية لكنه يريد تحقيق رؤيته للاصلاح بأي شكل...هي رؤية مازلت اراها مخلصة للبلد ولكن مش ديموقراطية أوي :)

ايه اللي حصل يوم الجمعة

قوم الناس اللي ما شفنهاش طول الاسبوع ولا سمعنا حسها..ولا حضرت مليونية 18 نوفمبر اللي دعى اليها الاسلاميين...فاقت يوم الجمعة بعد احداث اسبوع محمد محمود ونزلت يوم الجمعة 25 نوفمبر فيما ارادوه مليونية للمطالبة بتنحي العسكر وتشكيل حكومة انتقالية بل واعلنوا اسماء مقترحة لها

بالنسبة للبرادعي ما كانش عندي اعتراض انه يترأس المرحلة الانتقالية...ويمكن ده كان رأيي اما قابلت بالصدفة د.هبة رؤوف عزت يوم 28 يناير 2011 - جمعة الغضب - على كوبري أكتوبر في حين ان كان رأيها شخص تاني خالص - مش هأقول هو مين عشان هي ما تزعلش :)
والعبد لله بيقدرها جدا ومش عايز يزعلها
:)

لكن ده اختلف بعد ما طلع - البرادعي - بافتكاسة المبادئ الفوق دستورية اللي اظهرت انه عايز يحقق رؤيته للاصلاح حتى لو تجاوز هذا الديموقراطية


مش هاقول دي حركة انتهازية مثلا مثلا..لأ...هو مش انتهازي في حين ان بعض اللي نزلوا يومها انتهازيون ووجدوها فرصة لفرض وجهة نظرهم قبل الانتخابات...لكن بالنسبة له هاحسن الظن واقول ان هو سياسي يمارس السياسة زي ما الكتاب بيقول ...وعنده رؤية اصلاحية حقيقية لا شك ونية كويسة نظنها فيه ولكن نختلف معاه جوهريا في الايديولجية ...ووجد الفرصة لما يراه انقاذ للبلد وحب يستغلها بالامكانيات المتاحة بالظروف المتاحة...لعبة سياسية بحتة


كل ده كان يبقى كلام جميل ويجب مساندته اذا ماكناش على بعد ايام من الانتخابات...لكن طالما الانتخابات داخلة وعلى بعد يومين يبقى ان كنا نريد تنحية العسكر يكون هذا عن طريق السلطة الشرعية التي ستنتخب

لكن طبيعي لم تنجح المحاولة..في حين لم يفوت الاعلام الفلولي الفرصة كي يضرب بالثورة بعضها البعض ويلهي الناس عن الجرائم التي حدثت طوال الاسبوع

ومن نافلة القول بان حالة الفوضى اللي كان عليها الميدان وبدات تظهر من يوم الخميس وزيادة الشباب اللي جاي يهيص... تسببت في وقوع بعض حوادث التحرش - واحداها اذيعت على التليفزيون الفرنسي
:(
واسئ استغلال الكلام ده كالعادة لتشويه صورة الثورة والثوار


*******************
السبت 26 نوفمبر : بداية اعتصام مجلس الوزراء

بدأ الميدان يفضى تدريجيا

من البداية مجموعة من شباب الثورة كانت ترى خطا تركهم للميدان وثقتهم المطلقة في المجلس العسكري بعد 11 فبراير...وسيطر عليهم هذا التفكير طول المرحلة الانتقالية وكان سبب اساسي في اعتصام يوليو اللي انتهى بشكل اساء للثورة بسبب قلة خبرتهم الامنية ....فهذه المرة اختار مجموعة من هؤلاء الشباب الاعتصام في التحرير ثم لاحقا عند مجلس الوزراء كضمان من وجهة نظرهم لتحقيق مطالب الثورة واعتبارا لانفسهم الكتلة الحرجة التي ستنضم لها الجماهير ان حدث اي تلاعب في تسليم السلطة


هؤلاء الشباب عندهم وجهة نظر معتبرة حتى وان كنت اختلف معها وحتى وان كنت ارى التهدئة الواجبة خلال الاسابيع الستة التالية إلى ان تمر الانتخابات ونركز فيها ونمنع فيها اي تلاعب ...التلاعب الذي ان حدث فوقتها سيحدث ما يريدون..سيعود الناس للشارع

لكن احترم وجهة نظرهم

نية طيبة لكن تحرك سياسي غير سليم..ولكن برضه هذا لا يسوغ ضربهم وفض اعتصامهم بأي حال

وهم عروفا قواعد اللعبة واعتصموا على الرصيف

لكن تصاعدت الامور كما رأينا فيما بعد

سريعا سأمر على احداث مجلس الوزراء

من يوم السبت وبدا الاعتصام مبدئيا في التحرير ولكن لان العدد قليل وشباب الحركات الثورية تعلموا مما حدث في اعتصام يوليو ومع اعتراضهم على تولي الجنزوري للحكومة وعلى استمرار المجلس العسكري ..ارتأوا نقل اعتصامهم لمجلس الوزراء...والتزموا بقواعد الاعتصام قليل العدد حيث اعتصموا على الرصيف ورتكوا الطريق للمرور

لم يخل الامر من استفزاز جديد من قيادات الداخلية والجيش...حيث ارسلوا عن عمد كنوع من اثبات السيطرة ركب عربيات امن مركزي في تالت يوم للاعتصام كي يمر من شارع مجلس الشعب حيث يوجد الاعتصام وطبعا حركة مستفزة جدا ومهيجة جدا فتجمع عليها المعتصمين ظنا من ان هذا هجوم جديد ...وكما يبدو من الكلام اللي اتنقل عن الضابط قائد الركب انه قال في اللاسلكي لقيادته : هو فيه اعتصام ؟؟ انتم بتورطوني ؟

وانتهى بانه رجع وهرب وهما راجعين داسوا على شاب وموتوه - كما قلت من قبل حياة الناس عند القيادات رخيصة ويرونها خسائر مقبولة

في الميدان كان مسيطر عليه بلطجية مجهولي المصدر وامن دولة وتحريات عسكرية...شفت ده اما نزلت يوم كده في النص عشان اشوف ايه اللي بيحصل...وتدريجيا تم فتح الميدان اما المرور بعدما انكر شباب الحركات الثورية اي تواجد لهم في الميدان

لكن لم ار بعيني ما يحدث عند مجلس الوزراء...لكن من تجميع الرويات ورؤية الفيديوهات اقدر اقول

على ما يبدو انه حصل احتكاك ما بين الشاب عبودي وبين احد ضباط الجيش - اما بسبب الكرة او بسبب وجود العربية التي تختطف المعتصمين وهما خارجين كما قال عبودي

ولان ضباط الشرطة وقطاع من ضباط الجيش والشرطة العسكرية متربيين في وحداتهم على انهم نصف آلهة فمعندهمش تعامل بالقانون....فبدلا من ان يحتجزوا عبودي بشكل محترم ويعرضوه على النيابة وفي هذا ما يكفي - ده ان كان تطاول عليهم فعلا - ...لأ....خدوه نفخوه وهروه ضرب وخرج مدغدغ لزملائه...وطبعا ده هيج المعتصمين وده شئ طبيعي...فبدات المواجهات من الطرفين

اظن ان المواجهات حصلت بين الطرفين بالتساوي ...وفي غياب القانون وفي غياب القيادة الحكيمة - القيادة العليا اعني - تطورت الامور لمشاهد العنف التي رأيناها والتي يجب ان يحاكم فيها من لم يضبط جنوده ومن كان مسؤولا عن اعطاء الاوامر



اتسألت سؤال...لو انا مكان قائد القوة اللي بتحمي المجلس هاعمل ايه ؟





كنت بالقوة الكبيرة اللي معايا دي أولا هأهدي الناس واتكلم معاهم واكسبهم خاصة اما يكون رصيد الجيش عند الناس

كبير



(دلوقت الرصيد راح في داهية بس لانقاذ ما يمكن انقاذه)



ثانيا هاتعامل معاهم بالقانون...يعني اما واحد يشتم ظابط اما ان المعتصمين اللي حواليه هيغلطوه ويسكتوه وهنا الحكمة اني اسكت ...او يتقبض عليه ويتعامل وفقا للقانون كما شرحت

لكن الضابط ابى الا انه يتعامل معاه زي ما هو متعود بمبدأ السادة والعبيد...ازاي المدني العيل ابن الوسخة ده يكلمني كده)

ونسي ان العيل المدني الشجاع الكريم ده هو اللي بأمر الله عمل اكبر تغيير في تاريخ البلد من ايام الفراعنة





فيه تصرفات غلط من بعض الثوار وبعض المتظاهرين لا انكار...لكن فيه طرق قانونية للتعامل معاها - يعني عبودي لو شتم فعلا الظابط - ده لو لو - يبقى يتقبض عليه باقل عنف ممكن ويتحجز في اوضه ويتعرض على النيابة وياخد حكم (حبس او غرامة او كلاهما) من نص القانون وده يكفي جدا للعقاب...وده اقصى عقاب ان لم تتم تسوية الامر في مرحلة من المراحل تقديرا لهؤلاء الشباب مع اعتذاره العلني طبعا(ده اصلا اذا صحت الرواية ان عبودي شتمه وخدنا بالسيناريو الأسوأ وان كنت لا اظن ان هذا هو ما حدث)



مش يطلع مسحول ومتخرشم ومنفخ من كل حتة





السلاح اللي في ايد قوات الامن ده مش بابي جايبهلهم عشان ينتقموا بيه لنفسهم وكرامتهم



اما لو ان انا ظابط وشفت ان الدنيا باظت بقى ومضطر استخدم القوة يبقى ههاجم واستعمل القوة لكن باقل قدر ممكن احتاجه خاصة ان قوتي كبير مش صغيرة ...وادي تعليمات شديدة للجنود ان اللي يتقبض عليه ماحدش يضربه ولا يهينه يتحفظ عليه بس ولو قاومه - لو قاومه - يضربه بما يكفي فقط للسيطرة عليه



أخيرا...اي تجاوز من ناحية ضباطي وجنودي لأوامري الواضحة والصريحة او حتى بدون اوامر ومخالفة للقانون هأوقف الشخص ده وأعاقبه ...وأعلن ده على الملأ دون محاباة او خداع - مش هاقول عاقبته وانا ما عاقبتوش - والاعلان هنا مهمة المجلس العسكري





الموضوع مش كيميا



لكن من امن العقوبة اساء الادب وسفك الدم وده اللي حصل



بالنسبة للمجندين...لو المجند تعليمه على قده وما بيفهمش فالظابط المفروض يحكمه...لكن اللي شفناه واللي اتحكى ان الظباط نفسهم بيعملوا كده....ده غير انه تم شحن الاتنين - من قبل المجلس العسكري اللي بيكره الثورة في السر ويمدحها في العلن - بان هؤلاء خونة وعملاء



واللي بيقول ان العنف بيستخدم في كل حتة وفي دول أجنبية...فبالنسبة للدول دي ..الدول دي اصلا فيها مؤسسات وفيها قواعد وفيها قانون بيحترم ومن يتجاوزه يحاسب بشكل فوري وفيه حقوق وحريات وفيه فلوس دولة بتتصرف على رفاهية ومعيشة المواطنين ...فمفيش مجال نقول ان العنف اللي بيستخدم في مصر زي العنف اللي بيستخدم في الدول التانية الي هما عندهم قنوات كتير للتعبير عن رأيهم ولتنفيذ الصالح وللمراقبة على الحكوميين



ده غير ان استخدام العنف عندهم ليه قوانين وعمرنا ما سمعنا عن سقوط قتلي في فض اعتصام او شغب بعده



والا كانت اتقطعت رقاب المسؤولين


***************

بالنسبة لحرق المجمع العلمي...هقول رأيي واجري على الله...في الغالب نعم ممكن يكون ناس من المتظاهرين او المحسوبين عليهم هما اللي حرقوه لكن هنا حقيقتين هامتين

لو قارنا الفيديوهات بعين غير العين التي تريد اثبات العناصر الممولة الاجنبية....سنجد ان هناك شباب من اللي ظهر في فيديو المجلس العسكري دول تم القبض عليهم قبلها بأيام ...مين بقى اللي خرجهم واطلقهم في الميدان وسط المتظاهرين وبعدين رجع قبض عليهم وطلعهم في الفيديو ؟

دي واحدة


الحاجة التانية...اثناء الحريق....وجدنا في الفيديو ان المتظاهرين بيرموا طوب على المجمع العملي او حد جواه او فوقيه

في الغالب فيه من جنود وضباط الجيش وامن الدولة طلعوا فوق المجمع العلمي عشان يرموا طوب ومولوتوف على المتظاهرين زي ما عملوا بالضبط وشفناه في الفيديو من فوق مجلس الوزراء

وده يفسر الفيديو اللي فيه متظاهرين بيرموا طوب على المجمع العلمي...واضح انهم كانوا بيردوا الضرب على حد

ولان محدش يعرف اصلا المبنى ده ايه ولا حتى من اللي طلعوا في الفضائيات - وحرام يتقال عليهم بشر - وكانوا بيتباكوا على المجمع العلمي ويروه اهم من حياة البشر

ولان صعب السيطرة على جموع غاضبة في ظروف زي دي

فالمتظاهرين والمهيجين في وسطهم ردوا الضرب على مبنى بيتهاجم عليهم من فوقيه


مين بقى اللي يتحاسب هنا ؟

اللي طلع الجنود والضباط فوق المجمع العملي وخاطر بيه في مواجهة زي دي مع انه اكثر من عشر مواجهات مع الشرطة حصلت عند المجمع العلمي سواء اثناء ثورة يناير او احداث ابريل او احداث محمد محمود و كل واحدة فيهم اعنف من كده عشر مرات ولم يمس المجمع بشعرة ؟


واللا اللي منع - من العناصر المندسة فعلا والتي تريد التشويه - عربية الاطفاء انها تطفي وهرب بيها ناحية قوات الجيش ؟


واللا اللي ما طلعش عربيات المطافي اللي ناحية مجلس الشورى ؟


واللا اللي اصلا خاطر بالعلاقة بين الجيش والشعب ودخل الجيش في مواجهة زي دي ؟


واللا اللي ربى في ضباط الجيش شيطنة الثورة وان من قاموا بها عملاء وخونة عايزين يدمروا البلد لصالح جهات اجنبية ؟


*********************

نقطة مهمة جدا كي ابرئ ذمتي ..مش بأقول ان كل شباب الثورة ملائكة وانهم دائما على صواب وانهم لا يأتيهم الباطل ابدا....فيهم ناس كويسة جدا وفيهم ناس عندهم مشاكل واخطاء - حركية ولا أراهم خونة ابدا ...ولكن هم ليسوا بشياطين وليسوا كما يصورهم الاعلام ويصدق ذلك بعض الناس للاسف

واتمنى لمن فيه عوج فيهم ان يهتدوا....وان لم يهتدوا فالله قادر عليهم..وهم على اي حال ليسوا بتأثير السلطة الحاكمة...السلطة الاقوى التي بصلاحها وبصوابها تستقيم الامور بامر الله..وبإعوجاجها تتحول الاحداث الى كوارث

***************************


وبدأت الانتخابات

افضل انتخابات تمت في تاريخ مصر منذ زمن طويل...جدا

وكما قلت..الاعلام الحكومي والفلولي الان اصبح حريصا على الطنطة والترويج لها بعدما اصبحت مخرجهم السياسي والاعلامي من الازمة والكارثة اللي عملوها

وللاسف المغيبين الذين لا يستخدمون عقولهم...نسوا ما حدث وتسلسله ورجعوا للتسبيح بسحر - اعلام - من يحكم البلد


********************


ولكل من يلعنون ميدان التحرير أقول
:


١- لولا التحرير لكنت الآن بدون حق الإنتخاب لأنه ليس لديك بطاقة إنتخابية.
٢- لولا التحرير لكنت فشلت فى الوقوف فى طابور لجنة لأن بلطجية النظام كانوا سيمنعونك.
٣- لولا التحرير لما كنت رأيت ١٠٠ مرشح لمقعد واحد و كلهم يعتقدون أن لديهم فرصة.
٤- لولا التحرير لما تأكدت أن أمواتنا و مسجلى الخطر ليسوا من بين المنتخبين.
٥- لولا التحرير لرأيت أوتوبيسات النقل العام تنقل الموظفين الحكوميين بالإكراه لإنتخاب الوطنى.
٦- لولا التحرير لما تمكن المصريون بالخارج من استرجاع حقهم المسلوب فى المواطنة الصحيحة.
٧- لولا التحرير لكان خرج عليك ديوس النظام السابق ليقول لك: اليوم عُرس الديمقراطية.
8 - لولا التحرير لما أجبر المجلس العسكري على اعلان ميعاد انتخابات الرئاسة وقبلها ميعاد انتخابات مجلس الشعب نفسه
9-لولا التحرير لما تهافت الكلام عن وثيقة السلمي التي أريد لنا بها ان نكون نعاجا
10-لولا التحرير لما كان الكلام عن حكومة مستقبلية ان شاء الله تمثل الشعب عن طريق نسبة التمثيل في مجلس الشعب
وكل شئ بفضل الله أولا وأخيرا
أياً كانت نتيجة إنتخابات اليوم .. شكراً لميدان التحرير - قلب مصر النابض بالحيوية و الشرف لكل مصرى حر!

**********************

هذه الانتخابات أتتكم برعاية : شوية العيال اللي في التحرير


ولله الامر من قبل ومن بعد

والحمد لله رب العالمين

*************
يَا قَوْمِ إِنَّمَا هَذِهِ الْحَيَاةُ الدُّنْيَا مَتَاعٌ وَإِنَّ الْآخِرَةَ هِيَ دَارُ الْقَرَارِ

مَنْ عَمِلَ سَيِّئَةً فَلَا يُجْزَى إِلَّا مِثْلَهَا وَمَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَأُوْلَئِكَ يَدْخُلُونَ الْجَنَّةَ يُرْزَقُونَ فِيهَا بِغَيْرِ حِسَابٍ

وَيَا قَوْمِ مَا لِي أَدْعُوكُمْ إِلَى النَّجَاةِ وَتَدْعُونَنِي إِلَى النَّارِ

تَدْعُونَنِي لِأَكْفُرَ بِاللَّهِ وَأُشْرِكَ بِهِ مَا لَيْسَ لِي بِهِ عِلْمٌ وَأَنَا أَدْعُوكُمْ إِلَى الْعَزِيزِ الْغَفَّارِ

لَا جَرَمَ أَنَّمَا تَدْعُونَنِي إِلَيْهِ لَيْسَ لَهُ دَعْوَةٌ فِي الدُّنْيَا وَلَا فِي الْآخِرَةِ وَأَنَّ مَرَدَّنَا إِلَى اللَّهِ وَأَنَّ الْمُسْرِفِينَ هُمْ أَصْحَابُ النَّارِ

فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ

فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ

فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ

*******************

تمت بحمد الله

Monday, January 16, 2012

أحداث محمد محمود - 5

الجمعة 18 نوفمبر : مليونية تسليم السلطة

السبت 19 نوفمبر : ضرب المعتصمين وبداية ما عرف باسم احداث محمد محمود

الأحد 20 نوفمبر : مجزرة ارتكبتها الداخلية في حماية الشرطة العسكرية

الاثنين 21 نوفمبر : استمرار المصادمات وسقوط الشهداء في شارع محمد محمود والاعداد لمليونية

الثلاثاء 22 نوفمبر : مليونية الشهداء وبيان طنطاوي بتسليم الرئاسة اول يوليو

الاربعاء 23 نوفمبر : استمرار المواجهات وبداية جهود تهدئة شارع محمد محمود

الخميس 24 نوفمبر : توقف المواجهات في شارع محمد محمود واعلان الجنزوري رئيسا للحكومة الجديدة

الجمعة 25 نوفمبر : مليونية الحكومة الانتقالية وتكوين مجلس رئاسي مدني

السبت 26 نوفمبر : بداية اعتصام مجلس الوزراء

********************************

الاربعاء 23 نوفمبر

قبل ما احكي فيه احب اتكلم شوية - وبكل شفافية - عن موضوع طبيعة الناس اللي في الميدان وهل فيهم بلطجية ومندسين والكلام ده...والمناظر اللي عرضها على الاخص التليفزيون الحكومي وخيري رمضان لشباب صغير في السن بيرموا طوب

زي ما بدأت الكلام من اول حلقة عن ان من كان في الميدان شباب محترم على اختلاف طبقاتهم الاجتماعية

وان مقياس الاحترام هو مقياس العقلية وليس المستوى الاجتماعي او التعليمي

والكلام ده كان تحديدا عن يوم السبت والاحد

لكن بداية من يوم الاثنين بدأ يظهر ناس مختلفة شوية

مع مرور الوقت بدأ يظهر ناس جاية الميدان عايزة تتفرج - وده كان من اول يوم لكن زاد بشكل مضطرد...ناس واخدة الموضوع على انه خروجة...فرصة للعب...فرصة لحدف الطوب على الشرطة من باب المغامرة

وبدأ يظهر اطفال من نفس التركيبة السكانية ..اطفال ، طلبة ، وعمال...وأيضا وما يطلق عليهم اطفال شوارع وابتدوا يدخلوا في المواجهات وهما دول اللي اتصوروا في الفيديوهات الحكومية كدليل على "بلطجة وهمجية" الثوار

مبقولش ان دول كمان بلطجية وهمجية لكن انا عايز افرق بين حد نازل بالحد الادنى للمعرفة السياسية والدينية لكن عنده اساس اخلاقي وفكري حتى وان كان فطري...وبين حد نازل في الهيصة يهيص ويلعب..والنوعين موجودين

النوعية الاولى - صاحبة الحد الادنى ومستوى تعليمها اقل - هي ذات العدد الاكبر بطبيعة التركيبة السكانية والتعليمية والثقافية في مصر (نتاج 70 سنة من انقلاب يوليو 52، و30 سنة من حكم المخلوع) وهي اللي نزلت يوم 28 يناير وحولت الثورة لثورة شعبية (بفضل الله وبعون الله أولا وأخيرا) ...لكن يتم التركيز على تصويرهم في الاعلام والفلولي
)CBC وخيري رمضان)
على انهم مش الشباب الشيك الكول الهاي كلاس اللي نزل في 25 يناير وبقى هدف الاعلام الرسمي هو البحث عن شباب 25 يناير ويبدو انهم تاهوا واختفوا وما نزلوش في اي يوم بعد كده لا 28 يناير ولا موقعة الجمل ولا ماسبيرو ولا السفارة ولا 29 يوليو ولا محمد محمود ول - الظاهر انهم ماتوا او العدو خطفهم


لا لا...دول كمان واقفين في صف قبض الفلوس في السفارة الامريكية من 25 يناير اللي فات ! (ودي الرواية التانية لتشويه كل من شارك في الثورة فيا اما هو شكله هاي كلاس عشان بيقبض يا اما هو صايع وبلطجي عشان هو من منطقة شعبية)

لكن احنا في الميدان بنحترم بعض جدا وبنخاف على بعض جدا ومفيش ما بيننا هذه السفالات الاعلامية

ارجع للموضوع...وبمرور الوقت واتجاه الشباب الاكثر وعيا سياسيا من كلا التركيبتين المجتمعيتين الى التهدئة والحل السياسي للازمة سواء بالاتجاه لفكرة حكومة انتقالية وتنحي العسكر تماما وحالا وده رأي كان موجود بقوة في الميدان أو بالتركيز على الانتخابات وافساح المجال لها والصبر على جرح الشهداء واخواننا اللي ماتوا وده كان الاتجاه الاقل في الميدان وكان بيتهم بالفعل ارباب الانتخابات انهم باعوا الثورة عشان الكراسي (دي قضية اخرى)

لكن بدأت نوعية الجادين تقل في الميدان والهايصين تزيد من بعد خطاب طنطاوي (ليس اقتناعا بالخطاب طبعا) ...لكن لم تختف النوعية الاولى الجادين على الاطلاق حتى بداية الانتخابات واعتصام مجلس الوزراء - لكن قلوا جدا لاتجاه اغلبية الجادين للحل السياسي او التركيز على الانتخابات وافساح المجال لها

ووصلنا ليوم الخميس 24 نوفمبر الى ان الميدان اصبح مولد...مع محاولات الجادين لتثبيت التهدئة في شارع محمد محمود والتي بدات بشكل جدي من صبيحة الاربعاء 23 نوفمبر


والاعلام لم يكذب خبرا...ومرضى استكهولم - التوحد مع المجرم - لم يكذبوا خبرا ايضا..نسوا سبب المشكلة الاصلي...ونسوا من ماتوا من الآلة الشرطية الغاشمة...وتبقى فقط ان الشباب بيخش محمد محمود يموت نفسه في عبثية شدديدة وتدفعهم اطراف مندسة...وبقى اللي هناك بلطجية ومندسين

ومرضى استكهولم ريحوا نفسهم وضميرهم وخلاص

لكن الله الذي اعطانا العقل محاسبهم على اهانتهم لعقلهم هذه وعدم كونهم مع الحق

يقول النبي صلى الله عليه وسلم
إِنَّهُ يُسْتَعْمَلُ عَلَيْكُمْ أُمَرَاءُ فَتَعْرِفُونَ وَتُنْكِرُونَ فَمَنْ كَرِهَ فَقَدْ بَرِئَ وَمَنْ أَنْكَرَ فَقَدْ سَلِمَ وَلَكِنْ مَنْ رَضِيَ وَتَابَعَ قَالُوا يَا رَسُولَ اللَّهِ أَلَا نُقَاتِلُهُمْ قَالَ لَا مَا صَلَّوْا"

من رضي وتابع : اي من يعاقب هو من رضي بفعلهم وأعجب به ولم ينههم ولم ينكر عليهم ايضا

***********


من كتر ما اختلطت بشباب المناطق الشعبية في هذا الاسبوع في مواجهة الشرطة بطلت اقول شرطة وبقيت اقول زيهم : حكومة
:))

ده مش معناه اني ابن بارم ديله مثلا :)))...مسقط رأسي فيه ناس بتصنفه منطقة شعبية لكني باتكلم من منطلق ما يدور في الاعلام


****************************


مش هأقول برضه انه ماكانش فيه اشارات لوجود ناس مهيجة للوضع اثناء الاسبوع - وليس في بدايته - من تيارات سياسية معينة...عن نفسي لم ار ذلك تحديدا ولكن وصلتني اخبار مؤكدة من احد الاخوة الذين اثق بهم وكان لنا نقاش في الميدان يوم الاربعاء بالليل حول هذه الاطراف التي رأت في الوضع فرصة لفرض وجهة نظرها السياسية باستغلال اخطاء المجلس العسكري ودفع الامور للاشتعال...ولذا فان كثيرين كانوا حريصين على التهدئة والتصدي لاي محاولات - حدثت بالفعل - للتهييج من ناحية المتظاهرين سواء من نوعية "الهايصين" او التيارات السياسية المغرضة

لكن هناك حقيقتين

ان الاطراف دي تأثيرها في الشارع ضعيف جدا جدا وهي اضعف بكثير من انها تعمل حاجة

الحاجة التانية..قلت فوق : أخطاء المجلس العسكري ....أخطاؤه هي الانكى والافظع وهي التي تفسح المجال اما هذه المحاولات وهي اللي أوجدت هذه البيئة...هو من بدا كل هذا وهو المسؤول الاول والاكبر عما حدث..اما ما حدث من البعض فنتيجة ونتيجة صغيرة مقارنة بالخطا الاساسي ...وان بعض الاطراف المتهمة بالتهييج هي تفعل ما تفعل لانها عايزة التغيير (لكن مخطئة في عدم التروي حيث يجب التروي ومخطئة في بعض ايديولوجياتها ولكن هذه قضية اخرى)

ومش وقت حسابهم دلوقت...اما تبقى الحكومة المنتخبة تيجي تبقى تحاسبهم لان وقتها ستكون اكثر عدالة ومصداقية في اصلاح المؤسسات القضائية اولا.... لضمان محاسبة عادلة لهؤلاء...وعلى المجلس العسكري ان يتحلى بالمسؤولية وبالاحترف في التعامل السياسي والحل الامني احيانا بيكون مطلوب لكن آخر حاجة وبشكل سليم يتناسب مع حجم الموضوع...مفيش حاجة اسمها احنا جيش وهي دي طريقتنا ومنعرفش غيرها ...انتم في هذا الوضع وتقدمتم لحمل المسؤولية من انفسكم فيجب عليكم فعل ما هو صحيح في هذه الفترة ، وان اسأتم تحاسبوا

هذه سياسة الآن وليست حرب


************

ازاي تمت التهدئة في محمد محمود

عرفت من الاخبار - ولم احضر - بمجئ شيوخ ازهر شباب للكلام مع الشرطة والمتظاهرين والفصل بينهم....ولكن لم تفلح هذه الجهود وتضاربت الاقوال فيه ناس قالت الشرطة غدرت وضربت غاز مسيل على الشيوخ وهما بيصلوا...وفيه ناس قالت ان بعض المتظاهرين هما اللي حدفوا طوب الاول نتيجة لسيناريو الاستفزاز اللي شرحته قبل كده

المهم المحاولة دي باظت واستمرت المواجهات

وكان واضح جدا ان الموضوع لن يحل الا كما تم حل الامر في شارع الشيخ ريحان...يسحبوا خلقة الشرطة من وش الناس ويحطوا مكانهم جيش ويهدوا الوضع


لكن الحل ده تأخر لانه كما قلت كانت سياسة المجلس العسكري هي عودة هيبة الشرطة وثقتها في نفسها....لكن على حساب جثث الشهداء من الشباب مش مهم...ومش مهم مين السبب في البداية ومش مهم ايه هي الكيفية الصحيحة لعودة المؤسسة الامنية للعمل بهيبة القانون وهيبة العدالة اللي بتفرض احترامها وقوتها على الجميع من منطلق صحيح ...العقول القديمة لازم تستخدم الطرق البلدي القديمة الفاشلة


ويمكن لسه كنت بتكلم مع احد الاصدقاء في حل المشكلة بهذه الطريقة في وقت متأخر من الليلة قرب الفجر...وجاءت اخبار انه بالفعل اخيرا انه يتم سحب الشرطة الآن واستبدالهم بجيش وبدأ بناء جدار حجري

******************


من اطرف الحاجات اللي قريتها ايام محمد محمود


ان كل الشباب اللى فى الصفوف الامامية فى وسط ضرب الخرطوش والمسيل ، بيكلم أهله فى الموبايل ويقولهم كله تمام وزى الفل.....

على اساس انه اللى بيسمعوه فى التليفون جنبه ده بمب العيد مثلاً ؟

الشباب بيخاف يقول لأبوه وأمه انه رايح المظاهرة اكتر من خوفه من الغاز والخرطوش والحي
:)

***********
ولتوضيح الصورة السابقة وكذب الاعلام الرسمي في بيان عملي عايز اشارك مع من سيقرأ المشهد الختامي بالنسبة لي في شارع محمد محمود مساء يوم الاربعاء 23 نوفمبر

بدأت يوم الاربعاء بالنزول مباشرة على مكان شراء الاقنعة الواقية من الغاز..كنت قررت شراء قناع غاز اصلي وشامل انف وعين لاصابتي بالحساسية وعدم قدرتي على التحمل

وسبحان الله اخوكم مبخت....وانا هناك شفت نموذج للانفلات الامني اللي المفروض تتوجه ناحيته الجهود بجد..خناقة بين عائلتين عرفت من الناس هناك اما سألت انهم من اكبر العائلات العاملة في مجال مواد الصناعة...الشارع اتقفل والمحلات اتقفلت وبعض الاكشاك
اتكسرت وانضرب
نار وخرطوش ومولوتوف - مش كتير بس شوية


لكن المشهد المبشر وانقله بكل امانة على الرغم من هجومي الشديد على الشرطة... انه بعد وقت مش طويل جاءت قوة يبدو انها من القسم...حوالي 20 - 30 ضابط وعسكري بأسلحة مختلفة وسيطروا على الموقف

فرحت بيهم جدا وكان منظر رائع ولم اتخيل انهم ييجوا بصراحة خاصة انه كان واضح على اصحاب المحلات واهل المنطقة انهم متعودين على اللي بيحصل ده وان لا وجود للشرطة


المهم جبت القناع...فيه انواع...فيه الامريكي - غالي اوي ولكن افضلهم في رأيي ....وفيه الالماني.... وفيه الروسي (أرخصهم) - محدش يشتريه لانه من مخلفات الجيش وبيبقى شارب كيماوي اصلا فضار صحيا وشبه بايظ

وفيه الأسباني - اللي اشترتيه - كويس اوي لكن عيبه انه ثقيل الوزن على الوجه

رحت على الميدان وقررت اجربه...دخلت من ناحية الفلكي خرمت على محمد محمود ووصلت لخط المواجهة

وكانت من امتع ليالي حياتي

اما دخلت هناك...اولا الشارع ضلمة جدا....العدد قليل...لكن فوجئت ان الشباب الرائع اللي هناك عامل مجتمع كامل

مكنش فيه حدف طوب من ناحية الثوار...كان جو مظاهرة سلمية بالكامل...هتافات...العاب نارية...جو احتفالي تحت امطار قنابل الغاز المحرم دوليا وبعض طلقات الخرطوش القليلة من وقت لآخر

فيه ناس كانت لابسة اقنعة كاملة زيي...وفيه اسود ...خير أجناد الارضٍ....بيتحركوا من غير اقنعة الناس الفرافير اللي زيي ....مستحملين الغاز مش عارف ازاي...مجرد لافين كوفية على وشهم وبيتعاملوا بالخميرة والابيكو جيل وبخاخة الربو لتخفيف تأثير الغاز

ده ما يمنعش ان فيه ناس كانت بتقع من وقت للتاني من اللي مش لابسين اقنعة كاملة وكان الموتوسيكلات بتخش تاخدهم وتوديهم على المستشفى الميداني ....خير اجناد الارض


من الحاجات الجميلة برضه....الدكتور - خريج شاب او حتى يجيب على طالب في السنوات النهائية مش دكتور كبير - لابس بالطو ابيض....ماشي بمنتهى الهدوء وسط الناس يعالجهم ويطمن عليهم ...يرش خميرة هنا...بخاخة صدر هنا...ابيكو جيل هنا...سألته انت مستحمل ازاي ؟
...جاوب عليا
بابتسامة هادئة وببساطة حسستني اني صغير أوي : بعالج نفسي
لو تعبت
:)

وشباب الالتراس كانوا عاملين اروع مظاهرة سلمية ...شباب الالتراس اللي بيتهموا على طول انهم همج وصيع...كانوا واقفين اما الشرطة مباشرة في اول خط وبيضربوا صواريخ نارية - لاعلى مش في اتجاه الشرطة - والصواريخ عاملة جو احتفالي جميل جدا

الشباب دول آه بيبهدلوا الدنيا وآه بيتجاوزاو في التشجيع وفي الالفاظ لكن اظن ان تم توظيفهم بشكل صحيح في مكان صحيح وتوعيتهم واتحطوا في منظومة احسن هنلاقي منهم نتيجة كويسة جدا ...ومثال للمنظومة الاحسن : الثورة نفسها واللي عملوه فيها

صحيح هما بيبهدلوا الدنيا في الماتشات...لكن تخيلوا كده اما الناس دي تتحط في منظومة محترمة تصلح ما بهم من خطأ وتوجه ما بهم من طاقة في اتجاه صحيح

بدا ما نقعد نشتمهم ونقول قلالات الأدب

ومن وقت للتاني كنا بنرقص على الايقاع رقصة جماعية ونهتف : الشعب يريد اسقاط المشير


وكنا بنتسابق على مسك قنابل الغاز والقائها بعيد عن المتظاهرين..والحمد لله بالقناع ده كان الواحد بيحط وشه في الغاز عشان يدور على القنبلة ويرميها

المجتمع الجميل ده أشعرني بالندم الشديد لاني لم اشتر هذا القناع قبل ذلك واللي أتاح لي الوقوف معهم تحت امطار الغاز المستمرة


مساكين والله من لم يعيشوا هذه الاحداث ويخوضوا هذه التجربة..مساكين اللي قاعدين في البيوت مكتفين او حتى يرددون بأنفسهم اهازيج البلطجية والمندسين والعملاء اللي بيخربوا البلد وبينفذوا المخطط الماسوني الصهيوني الشيعي السلفي الوهابي الصربي الامريكي الخزعبلي

الاحداث دي صعبة من بره لكن اذا دخلتها بايمان وعارف انت بتعمل ايه وليه وكانت بشكل صحيح ومشروع سببيا واستراتيجيا لصالح البلد هتشعر فيها بمتعة كبيرة


يمكن فيه نقطة بتلفت نظري من زمان في أحاديث علامات الساعة الكبرى...هي جنة المسيح الدجال التي يراها الناس من الخارج جنة ولكن اذا دخلوها عرفوا انها النار...والعكس نار المسيح الدجال التي يراها الناس من الخارج نار لكن اذا قاوموا المسيح الدجال ولم يطيعوه ودخلوا ناره...عرفوا انها من الداخل هي الجنة

الملاحقة السياسية....الاحداث الصعبة....مواجهة جنود الظالمين....بشكل أكبر : الجهاد في سبيل الله...صعب وشاق ويبدو جحيم من الخارج

لكن من يدخله يعرف انه جنة


كان خير ختام لهذه الايام الجميلة...اعتبر هذا الوقت القليل اللي قضيته الليلة دي في المقدمة هو نعمة كبيرة من الله


***************

يتبع ان شاء الله...الحلقة الاخيرة في الوصف التفصيلي...ويلي الحلقة القادمة ان شاء الله حلقة اخرى للوصف التحليلي للاسباب وتعامل المجلس العسكري

Wednesday, January 11, 2012

احداث محمد محمود - 3 - 4

الجمعة 18 نوفمبر : مليونية تسليم السلطة



السبت 19 نوفمبر : ضرب المعتصمين وبداية ما عرف باسم احداث محمد محمود



الأحد 20 نوفمبر : مجزرة ارتكبتها الداخلية في حماية الشرطة العسكرية



الاثنين 21 نوفمبر : استمرار المصادمات وسقوط الشهداء في شارع محمد محمود والاعداد لمليونية



الثلاثاء 22 نوفمبر : مليونية الشهداء وبيان طنطاوي بتسليم الرئاسة اول يوليو



الاربعاء 23 نوفمبر : استمرار المواجهات وبداية جهود تهدئة شارع محمد محمود



الخميس 24 نوفمبر : توقف المواجهات في شارع محمد محمود واعلان الجنزوري رئيسا للحكومة الجديدة



الجمعة 25 نوفمبر : مليونية الحكومة الانتقالية وتكوين مجلس رئاسي مدني



السبت 26 نوفمبر : بداية اعتصام مجلس الوزراء



********************************



أغلب الناس بتقدس جيش مقدرش يطلق رصاصة واحدة في وجه عدوه على الحدود..عدوه إللي قتل منه حوالي ٣٠ واحد على مدار ٣٠ سنة، لكن الجيش ده قدر يقتل ٣٠ واحد من شعبه في يوم واحد ويرمي جثثهم في الزبالة



******************





الاثنين 21 نوفمبر : استمرار المصادمات وسقوط الشهداء في شارع محمد محمود والاعداد لمليونية





قبل ما ابدأ....فيه مبدأ برضه عايز اشرحه عشان اتقال كتير في الاعلام وكان بيتقال في الميدان بعد المذبحة بساعات...





وكان بيتقال من باب ان فيه ناس بتدفع الشباب للموت





وقبل ما اقول في النقطة دي نفسها عايز أوضح نقطة شخصية خاصة بالعبد لله عشان ما يحصلش فهم خاطئ عند من يقرأون هذه المذكرات



في اغلب المواجهات ما بأخشش الصف الاول - الا قليلا ونادرا



اول صف يعني بمعنى اول صف خالص قدام



بأحسبها كتير أوي أوي...وبأحجم كتير...وبأحمي نفسي وبآخذ اكثر التدابير أمانا في المواجهات



وعشان كده بأحترم اكتر مني ميت مرة اللي بيخش اول صف...لان دول معندهمش الحسابات المعقدة زيي



لكن بالطبع مبقولش ولم اقل وان اقول لأحد خش في الامام...كل واحد عارف لوحده هو عايز ايه وكل واحد حر فيما يفعله...على ان يتوخى فيه الحلال والحرام طبعا

وأجزم بأن الله سبحانه وتعالى يمهلني لاني لا استحق الشهادة بعد...ويمهلني عشان ما أموتش موتة تتحسب عليا شهادة في الدنيا ولكن في الحقيقة هي ليست شهادة في الآخرة



الكلام اللي فات ده عشان ما يحصلش

Over-estimation

لكاتب هذه السطور





ومن هذا المنطلق عايز اعلق على الشئ اللي أشرت ليه في البداية ...كان بيتقال : بيموت منكم كتير والناس بتخش تموت فعايزين نوقف الدم ده باننا نهدي مع الحكومة (الجيش والشرطة)



وعلى آخر الاسبوع... تحول الكلام من ان الشرطة رجعت تقتل المتظاهرين...الى ان المتظاهرين هما اللي بيخشوا محمد محمود عشان يموتوا...ده هما عايزين فوضى...ده هما بيموتوا نفسهم ....وبقت هي دي المشكلة من اولها وآخرها وانتهى الاسبوع على كده....المتظاهرني بيحطوا وشهم أدام مسدس الشرطة ...ضرب برأسه وعينه الرصاصة اللي طلعت من مسدسي يا بيه



متهيألي المفروض نغير اسم مرض استكهولم لمرض القاهرة...لان عندنا في مصر مرضى استكهولم بالعبيط





لو كان اللي بيقول كده فاهم غلط وحريص علينا فجزاه الله كل خير وربنا يبارك فيه ويثبت قلبه الطيب الحريص على حياة الشباب



ولكن أقول له : وهل يستويان ؟



وهل اشتكى أحد ؟



هل سنخنع ونخضع لهم ونقول يا حرام دول بيموتونا خلاص خلاص نتحايل عليهم انهم يوقفوا؟



الشباب الثائرين دول خرجوا اصلا رافضين الخنوع والخضوع



الجيل ده جيل هد الحيطة ومشي عليها وبيقول اللي يخاف يروح (او يقف بعيد مفيش مشكلة) ....مش جيل ماشي جنب الحيط او جوه الحيط





مفيش حد - في كل ما رأيت - بيحث الناس على انها تدخل او تخرج او تطلع او ترجع



اللي بيدخل بيدخل بمزاجه...واللي بيطلع بره ويرجع ورا ما حدش بيمنعه او يبص له بصة مش كويسة...واللي بيفتح صدره للخرطوش والحي عارف كويس اوي هو بيعمل ايه وعايز ايه من حياته ومن آخرته



عايز اوضح كمان ان الثوار سواء على الارض او في الاعلام اما بيقعدوا يجرسوا ويصيحوا بجرائم النظام هما مش بيعيطوا وبيقولوا الحقونا وشيلوهم من فوقينا



لأ...هما بيفضحوهم وبيسيطوا لهم وبيجرسوهم ...وبيفضحوا جرائمهم



تمهيدا للمحاكمات ان شاء الله



واستنفارا لكل بني آدم عنده دم وعنده نخوة وبيرجوا الله واليوم الآخر بس يمكن قاعد في البيت ومش فاهم او مش مقدر اللي بيحصل



لكن هما مش بيستنجدوا بحد - الا بثوار أو أشخاص ما زالت فيهم الانسانية والعقل ويريدون الحق والعدل مثلهم لكي ينضموا لهم





وبالنسبة للدم المدفوع...هاتكلم عن في حكاية مليونية الثلاثاء

22 نوفمبر لكن الدم ده اختصارا هو ثمن الحرية وثمن تحقيق العدل



****************



المهم وصلت يوم الاثنين 21 نوفمبر قبل المغرب بقليل ...دخلت مباشرة على محمد محمود



مبدئيا في الشارع الجانبي اللي كان فيه اعنف المواجهات الليلة الماضية بين المتظاهرين والشرطة العسكرية ....لقيت نفس المنظر اللي شفته الليلة اللي فاتت في شارع الشخيخ ريحان...حاجز واقف عليه "لجنة شعبية" مؤلفة في قوامها من التحريات العسكرية...بتهتف مع الناس الهتافات العامة وبتوجه الهتافات في هذا الاتجاه وبتمتص غضبهم



ازاي بأعرف ان دول تحريات عسكرية ...مش هقول

:)



وشفت ناس بتلوم على اللي بيخرجوا بالهتافات عن السيطرة وبيهاجموا المشير والمجلس العسكري - ناس عادية هي اللي بتلوم



ومع ذلك فيه ناس كانت من وقت للتاني بتوجه الهتافات "خارج الخط" وبتهتف ضد المشير والمجلس العسكري او بتقول هتافات بتلوم الجيش على مساندته للشرطة وأيضا بتذكر الجيش بمهمته الاساسية وأفعاله النبيلة وأخوته للشعب



واما الهتافات كانت بتخرج عن الخط بتوع التحريات العسكرية كانوا بيبصوا بغيظ شوية :)) لكن بيتعاملوا بكياسة برضه ...تعليمات بقى :))



لكن الظباط والعساكر دول لازم يسمعوا الحقيقة عشان هما بيتقال لهم في وحداتهم وهما نازلين كلام تاني وبيتقال لهم دول خونة وعملاء ومأجورين ....وبالتالي ردود افعالهم بتبقى بناء على الأكاذيب اللي بتتقال لهم





اما بالنسبة للمتظاهرين ... لكن كل واحد هنا عارف هو نازل ليه وعايز ايه ومحدش بيجبر حد على حاجة....فإذا كنا مش هنهيج المواضيع على الحاجز المعمول ده فده حفاظا على الناس ...حفاظا عليهم لان مفيش حد هياخد لهم حقهم دلوقت ولان كده كده الانتخابات بعد اسبوع والبلد فعلا محتاجة تهدأ



الخروج لهذا الاسبوع اتفرض علينا وكان لابد منه...وبنثبت وجهة نظرنا يوم بعد يوم....لكن اللي كان في ذهني مثلا... ان على نهاية الاسبوع - اسبوع محمد محمود -متوقع انه طبيعي ان الامور هتهدأ عشان الانتخابات تتم والعقل الجمعي للعاقلين وهم الاغلبية هيفكر كده وهيعمل كده..وحتى اللي هيكمل اعتصام هيكمل بعقل


وده اللي حصل فعلا زي ما شفنا كلنا



********************



على الناحية التانية داخل محمد محمود نفسه قدام شوية في اتجاه شارع نوبار لقيت المنظر المستفز اللي هو السبب الحقيقي للمواجهات اللي استمرت لايام بعد كده



عدد كبير جدا من الامن المركزي واقف سادد الشارع وقدامه واقفة الناس بتهتف والاعداد كبيرة جدا جدا



هنا لنا وقفة



اللي بيتقال ان الناس كانت بتحاول الوصول لوزارة الداخلية من شارع محمد محمود فعشان كده الشرطة كانت بتضرب فيهم وعشان كده الشهداء استمروا في التساقط



مع ان شارع محمد محمود ما بيصبش على وازرة الداخلية خاااالص...بل بيصب على قدام على شارع نوبار وبعدين تخش في شارع نوبار شمال وتمشي شوية محترمين لغاية اما توصل لركن سور مجمع وزارة الداخلية



لكن اللي بيصب على وزارة الداخلية مباشرة هو شارع الشيخ ريحان...فاللي عايز يوصل الوزارة يوصل لها احسن من شارع الشيخ ريحان اللي واقف عليه جيش...او يلف لها من السيدة زينب مثلا يعني :))





وزي ما قلت على جبهات الجيش اللي هدى الامور مش ان الجيش اقوى وانه بيضرب حي ولا الكلام الفارغ ده - واظن واضح ان الثوار ما بيهمهمش الكلام ده



ولكن بسبب التهدئة الممنهجة اللي حصلت



ولان رصيد ضباط وعساكر الجيش - مش المجلس العسكري - لم يكن قد نفد بعد



هو شبه نفد دلوقت بعد احداث مجلس الوزراء





بالنسبة بقى لموضوع محمد محمود



مبدئيا للتسجيل العددي...يوم الاحد صابح الانتين فجرا انتهى العدد على 16 شهيد



آخر اسبوع محمد محمود - الخميس ...انتهى على حوالي 42 شهيد



وبعدين فيه حوالي 4- 5 ماتوا في المستشفى لاحقا - واحتمال يكون لسه فيه ناس في غيبوبة او في العناية المركز لغاية يومنا هذا



يعني في مواجاهت شارع محمد محمود مات حوالي 31 شهيد...يعني اكتر من اللي ماتوا في مذبحة يوم الأحد



ليه بقى



اللي بيحصل كان خليط من حاجتين ...ودي وجهة نظري وتجميع لما رأيته وما سمعته



اولا



ان الداخلية كانت بتحاول في الايام الاولى الوصول مرة اخرى للميدان وسواء كان ده صحيح ام لا ولكن المتظاهرين كانوا بيعتبروا نفسهم حائط الصد لاخوانهم في الميدان وهما اللي بيحموهم ان الشرطة او حتى قنابلها توصل للميدان





الحاجة التانية وهي الاهم



هي ان الناس مش طايقة تشوف الشرطة قدامها



وده السبب الحقيقي في رأيي



ان المجلس العسكري كان مصر ان الشرطة تستعيد هيبتها



(وأنا هأروقهم ان شاء الله في نوت اعادة هيكلة الشرطة على الكلام ده)



وعشان تستعيد هيبتها وتقوم من "النكسة" اللي حصلت لها فمش مهم ان يقع اربعين شهيد جدد او حتى مائة او الف



نفس نظام مبارك اللي كان بيتعامل مع حياة المصريين على انها لا شئ



ده غير مفهوم الثورة نفسه المختل عند المجلس العسكري...التي يمدحونها جهرا ويلعنوها ويحرضون عليها ...جهرا برضه



الثورة اللي قامت في عيد الجهاز اللي كان ذراع بطش المخلوع



الجهاز اللي اسقطه الشعب ودلوقت عايزين يقوموه من "النكسة" ؟؟؟ عشان يرجع فوق رقبة الشعب تاني ؟؟؟ ويفوق من "النكسة" على جثث الشعب ؟؟؟



وعشان تستعيد هيبتها - الشرطة - لازم تفضل الشرطة واقفة في محمد محمود ولا يجب ابدا ان يتم استبدالها بجيش



وده اللي كان مسيطر على تفكير جنود وضباط الشرطة...انكم مش هتكسرونا تاني



ده طبعا طبعا غير فكرة الانتقام من الشعب ابن الوسخة اللي ركب على اسياده- في تفكيرهم - في يناير



وفرصة نقتل فيهم عشان يحرموا يعملوا ثورة تاني



القليلين اوي اللي بيفهموا في الشرطة كانوا شايفين ان المواجهة دي خطأ كبير لانها تصدر-بتشديد الدال - الشرطة مرة اخرى في المواجهة امام الشعب ليتحمل اخطاء النظام اللي حاكم



دول القليلين اللي بيفهموا



لكن اغلب الشرطة كان فرحان باللي بيحصل



لذا فالمواجهات في محمد محمود استمرت بين طرفين...طرف لا يتحمل ان يرى القتلة امامه مرة اخرى خاصة انهم عملوا جريمة جديدة طازجة...وطرف ينتقم ويريد استعادة سلطة وسطوة وكبرياء اغلبه بالباطل



وعشان كده زي ما هأحكي لاحقا ان شاء الله اما اتعمل السور الحجري ووقف عليه جيش الامور هدأت





حاجة اخيرة ان اما الداخلية تقتل 16 شخص في يوم و42 شخص في اسبوع ويبقى اعادة الهيكلة شئ يسخر منه كلا المجلس العسكري وجهاز الشرطة ...يبقى الوزارة فعلا تستحق تتولع وتتهد على دماغ اللي فيها ودماغ اللي مصر يخليهم فيها



*****************



فيه شوية تعريفات نسيتها في خير أجناد الارض...حاجة يمكن لم يشير أحد لها قبل كده



خير أجناد الارض هما برضه ظباط الشرطة من الرتب الصغيرة اللي نزلت تنظم المرور...رتب ملازم وملازم اول اللي كانوا واقفين بزيهم الرسمي في شارع النيل عند كوبري الجامعة..النقيب اللي كان واقف بزيه الرسمي أيام بعد التنحي وفي عز اضطهاد الشرطة بينظم المرور في شارع الهرم عند الدائري





الظابط الصغير من القوات الخاصة اللي كان واقف يوم الاثنين 31 يناير بوحدته في ميدان الجلاء في الدقي جنب اللجان الشعبية



الشباب دول زينا احنا ....وتبعنا ومننا ...مش منهم



مش كل شبابهم كده طبعا طبعا...فيه في شبابهم كتير اوي زي الشناوي صياد العيون ودول الاغلبية...لكن فيه قلة منهم زينا ومننا



*****************



ارجع لمحمد محمود ....المهم شفت المنظر ده شرطة قصاد شعب والشعب بيهتف ما بيحدفش حاجةوقفت شوية اهتف معاهم وبعدين قلت اكمل جولة في كل النواحي عشان اشوف اللي بيحصل ايه في كل حتة



بمجرد ما رجعت شوية لقيت ناس بتجري وبترجع عشان قنابل غاز جديدة انضربت



معرفش تحديدا ليه انضربت



اما حد حدف حاجة - وعنده الف عذر



او ان الشرطة كل ما بتشوف العدد بيكبر بتخاف وبتحب تقلله حفاظا على سلامتهم فبتضرب الغاز عشان ناس تجري وتهجم هي - الشرطة - وتضرب ناس وتخطفهم وبعدين تقف والناس تتجمع وهكذا



لكن اللي بيحصل بعد ضرب غاز ان ناس كتير ما بتجريش وبترد على الغاز بطوب...والشرطة بترد بخرطوش



وهكذا



******************



اليوم ده ماكانش فيه احداث جديدة غير اني قابلت نور ايمن نور ابن ايمن نور - عن طريق صديق مشترك - الشاب اللي انضرب دفاعا عن فتاة لاحقا في اعتصام مجلس الورزاء

(مش الفتاة اللي اتعرت ولكن اللي قنفد على فتاة وخد الضرب على ضهره بدلا منها)



واما شفته...احترمته جدا الولد ده وحسيت انه فعلا ولد متربي



**********



وروحت بدري اليوم ده عشان ارتباطي بعمل هام نهار اليوم التالي وقلت هأرجع على المليونية ان شاء الله - مليونية الثلاثاء 22 نوفمبر



*****************



مليونية الثلاثاء 22 نوفمبر





تحولت لكائن ليلي ....بأسهر الليل في الميدان...أنام شوية الصبح واروح شغلي



وعشان كده ما شفتش محمد محمود في نور النهار الاسبوع ده - ولا الميدان بالتبعية



وصلت الميدان على المغرب....كان اشبه بمليونية يوم الجمعة ...العدد كبير جدا من مختلف الاطياف وحضور السلفيين كبير أوي



التقيت ببعض الاصدقاء ...قعدنا شوية...طبعا رحت بصيت بصة على محمد محمود لقيته زي ما هو



لسه فيه ناس بتتصاب وبتموت فيه يعني



والموتوسيكلات رايحة جاية جايبة مصابين - او شهداء



ولاني ابتديت اصاب بحساسية في عيني بسبب الغاز وبقى احتمالي ليه ضعيف جدا جدا فمكنتش بأقدر اروح ناحية محمد محمود كتير من الليلة السابقة...وكنت باتحين الفرصة اني اشتري قناع غاز محترم عشان احل المشكلة دي لاني ما بقيتش قادر اقف في الصفوف الاولانية بسبب هذه الحساسية



المهم...قعدنا شوية وبعدين خرجنا ناكل وفي الوقت ده كان بيان المشير طنطاوي شغال



شفناه على آي-باد احد الاخوة وشفنا نقطة الاستفتاء اللي نهى بيها وطبعا كانت مثار تعليقات مننا



وهنا فيه وقفات



اولا....هو مين قال ان المجلس العسكري جاء باستفتاء عشان يمشي باستفتاء ؟



اما خرجنا نستفتي في 19 مارس كنا بنستفتي على مواد المرحلة الانقتالية وكيف سيتم نقل السلطة للمدنيين...واما ركبوا عليها اعلان دستوري...كان في رأيي ورأي كثيرين خطوة صحيحة ولا بأس بها لانها حددت هيكل عام تمشي عليه البلد في مرحلة انتقالية ...خطوة

لا بأس بها طبعا

في اطار نقل السلطة في اسرع وقت ...والدستور على مهلنا المهم نقل السلطة من العسكر خاصة ان العسكر دول اختيار مبارك فلا نثق في كفائتهم ولا في امانتهم مع مرور الوقت وبريق السلطة



وتركيبة العسكر في كل مكان هو ان يأمر فيطاع فلا يملكوا مرونة التعامل مع المدنيين ولا مع السياسة اللي هي اساس الحكم....واللي عايز يخش السياسة فيهم يجب ان يتجرد من رتبته ويخوض غمار الحياة المدنية لفترة وبعدين يشتغل سياسة



او يكون مدني احتك بالعسكرية مثلا....زي ظباط المخابرات





في الاعلان الدستوري والاستفتاء ...اهم بند من بنود هذا البند انه يرحل في خلال 6 اشهر او اقل



او اقل مش أكتر



مش يقعد يمد في خيوط المرحلة الانتقالية وبعدين يقول انا مش ماشي عشان لسه مفيش سلطة مدنية تستلم الحكم



اما ييجي المجلس العسكري يحاول انه "يقرطسنا" ويقول لنا اننا كنا في 19 مارس بنستفتي على ان المجلس العسكري يحكم البلد وانه ما يمشيش الا باستفتاء نبقى هبل ان صدقناه



النقطة التانية...عشان المجلس العسكري والمشير يهزوا طولهم وينزلوا بيان ويقيلوا الحكومة أخيرا - وان كانت اقالة الحكومة حركة زي بتاعة مبارك اما ضحى بالحكومة يوم 28 - وهزوا طولهم برضه وهو الاهم وهو لاول مرة تحديد ميعاد انتخابات رئاسية ومات الكلام ضمنيا عن وثيقة السلمي



يبقى يحصل كده كان فيه تمن لازم يندفع...ثمن الحرية امام اي نظام ديكتاتوري قمعي ظالم...ثمن المبادئ وعدل الله في الارض يكون بأنيتخذ الله سبحانه وتعالة منا شهداء



اسأل الله ان تنصلح نياتهم واعمالهم لتكون خالصة لوجه الله تعالى وحده لا شريك له... ليست حمية ولا وطنية طينية ولا جاهلية ولا ابتغاء متاع الحياة الدنيا وزينتها ورغدها



لكن بعض الاسلاميين - سلفيين واخوان - بعض أقول - عندهم رأي تاني...بيقولوا ان ده حصل بسبب مليونية الجمعة 18 نوفمبر !!!!!!!!!!



بعد كل اللي حصل ده ؟؟؟؟؟؟؟





احب اقول لهم صحوا النوم !!!!!!!!!



مليونية 18 نوفمبر اترمت في وشكم ووش الثورة اما صدر بيان مجلس الوزراء بان الوثيقة باقية واما انضرب المعتصمين تاني يوم واما انضربت المظاهرة اللي نازلة تساندهم





ان شاء الله هآجي بتفصيل اكتر للموضوع ده



****************



نيجي بقى لموضوع الغاز اللي ظهر في الميدان بعد خطاب طنطاوي وما فيه من مبالغة وما فيه من حقائق - والله اعلم





المهم واحنا خارجين ورايحين ناكل كنت اول من احس بحاجة غريبة في الجو - نتيجة للحساسية اللي جت لي - لكن كنا خارجين فالاحساس ده راح بسرعة



وشفت خبر عالسريع عالموبايل ان فيه حالات اختناق في الميدان بس اتشغلت في حاجة تانية ومركزتش



ثم رحنا كلنا في دهاليز شارع القصر العيني ...وبعدين اما بدأنا نرجع ابتديت برضه احس بحاجة غريبة في الجو



على الفيس بوك شفت اخبار ان فيه مصادمات في شارع الفلكي وشارع نوبار ...وفيه حالات اختناق كتير في الميدان



ورجعنا من شارع القصر العيني وبدأ الموضوع يتضح ...ناس كتير أوي خارجة ..الجو معبق ريحة غاز خانق مسيل للدموع ومهيج للصدر على الرغم من اننا لا نرى شئ في الجو...واضح انه غاز شفاف لا يرى بالعين



ولأني زي ما قلت ابتدى ييجي لي حساسية من الغاز كنت اول من احس وكنت برضه اول من وقع من مجموعة الاصدقاء...ابتدت عيني تدمع جامد وتحرقني ومش شايف قدامي...محسوش بيا وانا بأبطأ واتراجع لغاية اما بعدت عنهم وبقيت مش شايف حاجة



قلت لازم ابعد بسرعة في نفس الوقت مش هأروح البيت ومينفعش أسيب الميدان ....ذهني كان صافي وشغال على الرغم مما يحدث وابتديت افهم الموضوع



واضح ان فيه واحد اهبل في المجلس العسكري أو في سلطات الامن جات له الفكرة دي...فكرة ستيناتي اوي اوي (زي الاجانب اللي بيصوروا والايدي الخفية وما الى ذلك)...ان الميدان يفضى بعد خطاب الزعيم الملهم وكأن الجماهير ارتاحت لخطاب الزعيم الهمام وذهبت لبيوتها آمن مطمئنة



والناس تمشي بانه تتولد رائحة مثل هذه طاردة للناس في الميدان فيبدو فيه الناس بتقل



فكرة جهنمية مجتش حتى على بال مبارك بعد خطاب 1 فبراير...لا دي جت على باله ولا فكرة الاستفتاء على الرحيل جت على باله





والغاز ده ممكن نشره بكذا وسيلة



فهي ناس قالت كان فيه طيارة معدية...متهيألي ده مستبعد جدا لانه ان كانت طيارة كانت مساحة نشر الغاز لتكون اكبر بكثير



ممكن يكون فيه ناس وسط الميدان تبع المجلس معاهم شنط فيها عبوات الغاز وقاموا بفتحها (وهم حاميين نفسهم بطريقة او بأخرى عقار - اقنعة معينة)...وده في رأيي اكثر اتساقا مع طبيعة اننا نتعامل مع مجلس عسكري يملك من الامكانيات الاستخباراتية دي





او فتحات تهوية المترو وده مش بعيد برضه



الحقيقي ان كان فيه غاز غريب فعلا في الميدان



وليه وقف ...الله اعلم...هل بسبب انتشار الاخبار بسرعة - جيل الستينات ده لا يتواكب ولا يعمل حساب السرعة في انتشار الفضائح .....هو بيستخدم وسائل الستينات وبس -



الله اعلم





برضه الناس كانت قالت غاز سام...لا اظن أبدا انه غاز سام..هو مجرد غاز خانق ...لكن في فترة زي دي ومع سقوط قتلى فطبيعي جدا ان تتجه اذهان الناس للاحتمال الاسوأ



نزلت انا شمال من شارع القصر العيني وقلت الف قوس طويل عشان اخش الميدان من الناحية التانية خالص



المشكلة ان الهواء كان ساكن الايام دي...يوم 28 يناير في الميدان بعد اقتحامه بعد المغرب كنا بنشتغل مع اتجاه الهواء في تفادي القنابل...لكن الفترة دي كان الهواء قليل جدا وقليل جدا ما استطعنا أن نستفيد باتجاه الهواء...لكن عموما النزول شمال احسن



وصلت لعمر مكرم من ورا ...الموقف لم يتحسن ...ناس كتير مختنقة والاسعاف والموتوسيكلات عمالة تشيل ناس وانا شبه مش شايف...خرجت تاني ولفيت لفة اكبر ودخلت الميدان من عند قصر النيل



اللفة دي خدت وقت طويل فعقبال ما وصلت الميدان كان الموضوع بدأ يخف...لكن ما زال مستمر



قررت اتجه لشارع الفلكي قلت فيه احتمال ضئيل ما يكونش غاز متعمد ولا حاجة ويمكن الهواء جاب الغاز من شارع لاالفلكي...لكن رجعت قلت ومن امتى ده بيحصل ان الهواء يجيب الغاز كل المسافة دي وبالسرعة دي انه يبقى مؤثر....وعمرها ما حصلت الايام اللي فاتت اشمعنى انهاردة...ده غير ان مفيش اي رياح اساسا !!



بس على اي حال رحت شارع الفلكي...ولقيت هناك بدايات معركة لوز لوز لوز :)



خلاصة المعركة...الشباب المرة دي كانوا متألقين..عارفين ان الطرف اللي قدامهم مجرم سفاك فكانوا بيحموا نفسهم كويس من الخرطوش....التعامل مع الغاز واتجاهه بشكل قلل خسائرة بشكل كبير - وبرضه العبد لله شرب له قنبلتين لوز ولعوا عينيا لكنت كنت لابس القناع الصيني فقلل

التأثير على صدري)



المهم استمر الموضوع كأسلوب ضغط على الشرطة اللي بتهاجم وسياسة النفس الاطول واستيعاب ضربهم والضغط من الاجناب ومن الامام بشكل تلقائي ...كل ده بدون اتفاق مسبق او تنظيم ممنهج...لغاية اما نفذت ذخيرتهم وتراجعوا لمحمد محمود...وسيطر الشباب على ميدان الفلكي



وتقريبا ما رجعتش الشرطة للفلكي تاني خلال الايام التالية



مش بسببنا طبعا مارجعوش ولكن بأذكرها كملاحظة زمنية فقط





********************



يتبع ان شاء الله

Sunday, January 08, 2012

أحداث محمد محمود - 2

وقفت اليوم السابق عند صلاة الفجر ليوم الأحد 20 نوفمبر....صليت الفجر وابتديت استعد اني امشي لشعوري بالارهاق الشديد مع هدوء الامور في الميدان ، ولاني في الميدان من الساعة اربعة عصر اليوم السابق ومانمتش لحظة ده غير اني كان بقالي كذا يوم بأنام قليل جدا...فقلت هأروح انام شوية واغير وبعدين ارجع تاني بعد كام ساعة



لم أتابع اوي ايه اللي بيحصل ناحية محمد محمود ووزارة الداخلية ...متهيألي الاشتباكات اندلعت تاني في محمد محمود ومش عارف مين بدأها للامانة هل هم المتظاهرين ام الشرطة ....لكن الاكيد ان كان فيه لسه قنابل غاز بتنضرب والاكيد ان الناس ماكانتش طايقة تشوف الشرطة خاصة اما نزلوا اليوم اللي قبله ضربوا المعتصمين واستشهد 2 من المتظاهرين



نرجع لنظرية تحضير العفريت وصرفه





فيه معلومة لسه عارفة امبارح فقط...أذكرها للأمانة .... وهي انه احتمال يكون الاشتباك بدأ يوم السبت 19 نوفمبر من ناحية المعتصمين مش من ناحية الشرطة



عموما كده كده انا كنت ناوي أنصف الشرطة والمجلس العسكري في آخر تدوينة في السلسلة دي في التعليق العام ان شاء الله، وسأذكر ما لهم وهو غير قليل وما عليهم وهو غير قليل ايضا، فهبقى آجي بالتبعية للنقطة دي





قبل ما ابدأ عايز ارجع افكر الناس تاني ايه اللي بدا كل ده





كان فيه مليوينة جمعة 18 نوفمبر لتحديد ميعاد قريب لتسليم السلطة للمدنيين ولسحب وثيقة السلمي...ثم لم تنتهي باعتصام وانصرف الناس الا قلة قليلة جدا حوالي 200 واحد معتصمين....انا معرفش المعتصمين دول معتصمين ليه تحديدا وهل لهم حق ام مدعين...هما بيقولوا اهالي شهداء وماخدوش حقهم....فيه ناس بتقول لأ دول خدوا حقهم وبيستهبلوا..فيه ناس بتقول اهالي مجرمين...فيه منهم من كان معتصم بسبب موضوع تسليم السلطة....فيه ناس بتقول مدسوسين لافتعال مشكلة...فيه رواية قوية دلوقت بتقول ان الاستفزاز كان متبادل ما بينهم وبين الشرطة



لكن الاكيد ان عددهم كان قليل اوي....وانهم كان معتصمين في الصينية الوسطى في الميدان وماكانوش معطلين الميدان...



يعني بعد ثورة 25 يناير ماكانش فيه مسوغ لضربهم بأي حال...وغير مقبول على الاطلاق ضرب متظاهرين او معتصمين سلميين بعد الثورة خاصة ان الشرطة لم تعاقب بعد على ما فعلته ومفيش حد اتعاقب اصلا ...لكن اللي حصل انهم انضربوا وبوحشية شديدة شفناها بالصورة وبرواياتهم...واتقال لهم عشان تبقوا تعملوا ثورة تاني



والموضوع ده ظهر فيه غل الشرطة الدفين ورغبة الانتقام في صدورهم من الشعب الرغبة اللي بتطلع اما ييجي لهم فرصة





حاجة تانية عايز اتكلم فيها الاول...وهي ضرب المتظاهرين



طبعا طلع علينا اللي بيقول ما هو في كل دول العالم بيضربوا متظاهرين...آه يا حبيبي بس دول العالم دي فيها حريات وحقوق ونظام قضائي ونظام سياسي محكم وديموقراطية وفلوس بتتصرف على البشر اللي عايشين في البلد ورقابة برلمانية قضائية دستورية وهامش مسموح من التظاهر والاعتصام م كل ده



بعد كل ده لو حد تجاوز حده بيتم التعامل معاه بشكل محترف لا يوقع ضحايا وطبعا لا خرطوش ولا غاز محرم دوليا ولا الهبل ده...واللي يتقبض عليه ليه حقوق وتعامل محترم وعقوبته بتبقى غرامة ...واللي بيتجاوز من الشرطة في حقهم بتتقطع رقبته ويتدمر مستقبله المهني





ما سمعناش عن مظاهرات - خاصة بعد ثورة من اجل الحرية والتخلص من الديكتاتورية بتوقع 50 - 60 قتيل !!!!!!!!!



******************

ابدأ بقى في احداث اليوم ده...الأحد 20 نوفمبر ...اللي وقعت فيه مجزرة مؤلمة مات فيها 10 مبدئيا...ثم انتهت الليلة على 15 شهيد



انا ماكنتش مع التصعيد ناحية الوزارة مش خوفا منهم ولكن كفاية عليهم الليلة اللي فاتت - ومالهاش لازمة مهاجمة الوزارة خلينا نشوف الحكومة المنتخبة هتعمل معاهم ايه الاول



لكن بكل حال احترم رأي وفعل كل من كان مع التصعيد وارى له ما يبرره وبشدة...الشرطة في مصر هي ذراع البطش والديكتاتورية...وفيه ناس ماتت الليلة اللي فاتت..وطبيعي الناس ما تبقاش طايق تشوفهم



بعض الناس اللي حضرت اليوم بتقول ان سبب المواجهات هي ان الشرطة كانت بتحاول تطلع من شارع محمد محمود على الميدان بشكل مستمر وده اللي كان مشعلل المواجهات طول اليوم





مهما كان عنف الناس فمش هيوصل لعنف ما حدث في لندن مثلا...ومع ذلك لم يسقط قتلى من الشعب وقتها





انا روحت على الشروق زي ما قلت وعرفت فيما بعد ان ناس كتير جدا نزلت ....اتحول الموضوع لمواجهة كبيرة زي ما كلنا شفنا ودخل على الخط الكثير من الشباب السلفي المحترم اللي اتعلم مما حدث في ثورة يناير وفهم ان الموضوع ليس خروج على الحاكم ولا يحزنون..بالاضافة الى شباب مستقل كتير لا ينتمي لتيار فكري او سياسي معين مع بعض شباب الاخوان





مش عايز انسى ان حركة 6 ابريل كانت مشاركة في مظاهرات الجمعة واللي عفته انهم رحوا مع اللي روحوا الا ناس فضلت بشكل فردي تماما ومن عدة حركات سياسية واسلامية ايضا... وعموما هما التزموا الانضباط ي المشاركة في المظاهرات وتعلموا مما اتخدعوا فيه في اعتصام يوليو ...وبعضهم ايضا كان متواجد من بعد ضرب المعتصمين ...بس مش شعللة وتوليع والكلام الفاضي بتاع المؤامرة....الموضوع كان مشعلل شعبيا وليس بسبب فئة معينة



المهم ...صحيت ساعة واحدة في وسط اليوم قبل آذان العصر... صليت الظهر ثمالعصر وشفت الاخبار بسرعة ...استمرت المواجهات التي لا اعلم تفاصيلها طيلة اليوم في شارع محمد محمود..وبدا واضحا انتصار الشباب الثائر وتفوقهم على قوات الشرطة على الرغم من استخدام الشرطة الغاز والخرطوش بكثافة ووقعت اصابت كثير في الرأس وفي العين وفي الصدر..عيون كتيرة طارت اليوم ده...لكن الشباب كانوا منتصرين



ونمت ساعة واحدة وبعدين صحيت على آذان المغرب على تليفون صديق بيقول افتح الجزيرة بسرعة



وهالني ما رأيت



شفناه كلنا



وبدلا من ان يتكرر مشهد الجمعة 28 يناير اما نزل الجيش بشكل محترم واحترم الشعب فكان نزوله بردا وسلاما وهدأ الامور (من حيث المواجهات والعنف) بشكل كبير وفصل بين ما تبقى من الشرطة وبين الجماهير المتظاهرة...المرة دي وبعد الثورة يبدو ان البعض - الغبي - في المجلس العسكري خد قرار بنزول الجيش ولكن المرة دي في صف الشرطة ولضرب الشعب





والناس بتسأل ليه احنا شايفين الامور أسوا بعد الثورة

:(



الداخلية بتهجم تحت جناح الشرطة العسكرية بقوة كبيرة جدا جدا وكانهم داخلين حرب



وكأن الموضوع ده أمني وعسكري مش سياسي



وتحت هذا الجناح قتلت الداخلية وقت صلاة المغرب عشرة شباب طاهر



الداخلية الحقيرة عاثت فسادا فقتلت وسحلت وحرقت واختطفت وفعلت ما لم تستطع فعله طول اليوم



تحت جناح الجيش



ولاول مرة يدخل الجيش المصري في مواجهة مع الشعب



ياللعار



في اول طلعة مات عشرة + اتنين الليلة اللي قبلها يبقى اتناشر



واكثر ما آلمني هم شهيدين



واحد مات في المستشفى الميداني في شارع محمد محمود بسبب قنابل الغاز...الواضح انه مالحقش يمشي بسبب اصابته فاختنق بالغاز...لان المستشفى ده بيتحول لجحيم - ومكان غلط جدا جدا ويجب ان نكف عن استخدام هذا المكان - اما القنابل بتتضرب فيه فبيبقى مصيدة مميتة



وشهيد آخر وجدوا جثته بعد ساعتين مات مخنوقا ايضا على الارجح في شارع جانبي



زي ما قلت النوت اللي فاتت...اللي بيقع في وسط الغاز وما بيقدرش يهرب او حد بيشيله يبعده بيموت حتما





عموما قتلانا في الجنة بأمر الله...وقتلاهم عليهم من الله ما يستحقون...ولا نهن ولا نحزن ونحن الاعلون

بإذن الله





بالنسبة لي نزلت مسرعا من غير ما اصلي المغرب على الميدان مباشرة..وقلت اصلي المغرب والعشاء جمع حتى



وصلت الميدان لقيت الناس بتغلي...الشرطة انسحبت من الميدان...ومواجهات عنيفة جدا في شارع محمد محمود واصابات كتير عمالة تقع ولكن الشباب كان مولعين ومتألقين على الآخر



و انسحاب الامن من الميدان المرة دي برضه له عندي تحليلين



اما لانهم عايزين الامور تستمر في التصاعد



او بسبب الفضيحة اللي انتشرت على الهواء ولو الميدان فضل فاضي فالغضب هينتقل لكل شارع





المهم المواجهات كانت عنيفة جدا



انا مش عارف الشباب ليه اصلا اما حصل الهجوم بتاع المغرب أغلب الناس جريت وماهجموش بشكل مضاد



هل بسبب المفاجأة وعدم توقعهم ان الجيش يعمل كده ؟



فيه مشهد شفناه على الفضائيات والفيديوهات في الاقتحام وهو اتنين عساكر جيش مثبتين بعصاية حوالي 30-40 شخص وعمالين بيضربوا فيهم والعيال مزنوقة وعلى بعض ومحدش بيحاول يهاجم العساكر عشان يفكوا من الزنقة المنيلة دي



يمكن عشان هما اصلا مدنيين ومعندهمش الفكر ده....ولا ألومهم



وجه شاب من الجنب نط مقص طاير على عسكري فيهم ووقعه وهنا الشباب فكت ونزلت ضرب في الاتنين وبعدين قدروا يهربوا كلهم



وللاسف بقينا نتكلم على جيشنا بهذا المنظر...لكن هما اللي حطوا نفسهم وحطونا في الموقف ده



هما اللي حطوا نفسهم وحطونا في الموقف ده





لكن طبعا لا الوم الشباب انهم جريوا واكيد الموضوع كان فوق قدراتهم...وممكن جدا لو كنت مكانهم كنت جريت انا كمان





المهم ارجع لمحمد محمود...كنت عايز انزل اجيب قناع غازات الاول لكن كنت مصر اني اشوف الاول ايه حكاية المذبحة فعشان كده نزلت على التحرير الاول...واما وصلت اشتريت من هناك قناع صيني ودخلت محمد محمود



زي ما قلت المتظاهرين كانوا مولعين من الغضب....كانوا حاسين بحقد وغل وغضب شديد نتيجة للناس اللي ماتت



قبل ما اخش محمد محمود شفت فيديو للجثة المسحولة على لابتوب زميل متظاهر وشفت اخبار اعداد الشهداء وكيف تم قتلهم





الشباب هناك كانوا بيهاجموا تحديدا وحدة شرطة عسكرية مزنوقة في محمد محمود نازلين فيهم مولوتوف وطوب وصواريخ ناريه في اتجاه افقي وناس طلعت على العمارات وبتحدف طوب ومولوتوف عليهم





وهما (جيش +شرطة) كانوا بيردوا برصاص حي وخرطوش وطوب وغاز



الداخلية كانت ورا الشرطة العسكرية ومش باينة



لاول مرة وعلى الرغم من الكراهية وعدم الاحترام التاريخي من ناحية الجيش تجاه الشرطة وامن الدولة......لأول مرة : الجيش والشرطة إيد........وسخة

:(



المهم استمرت المواجهات دي لغاية اما الشرطة العسكرية ضربوا بكثافة غاز من المحرم اياه + رصاص حي من مدفع آلي سريع الطلقات ...فانفض العدد شوية- بسبب الغاز - ورجع يتجمع تاني



ودي كانت البداية الحقيقية لاحداث شارع محمد محمود اللي سمعتوا عنها واللي استمرت 4 ايام متواصلة من الأحد بالليل لخميس فجرا



والاصابات والقتلى استمروا لكن الشباب كانوا مكملين



والاصابات كانت تنقلها موتوسيكلات





والموتوسيكلات دي ملحمة لوحدها



************************************





خير اجناد الارض هو شاب صنايعي لقوا في جيب جثته وصل شاش وقطن بقيمة يوميته للمستشفى الميداني



**************************

الموتوسيكلات



ايه حكايتها



فيه كلمة عجبتني اوي للصديق اللدود المهندس الصحفي عمرو عزت...انه في التحرير في تمثال لشاب راكب موتوسيكل ووراه مصاب



موضوع الموتوسيكلات ده بدأ من اليوم اللي قبله...من مواجهات الليلة السابقة...فيه من شباب المناطق الشعبية اللي جم الميدان كانوا جايين بموتوسيكلاتهم فبشكل تلقائي بقى اما حد يقع ياخدوه على الموتوسيكل للمستشفى الميداني اللي بدا يتكون في جامع عمر مكرم



وتصاعدت الفكرة وواضح انهم حكوا لبعض وناس شفتها على الفضائيات فناس حبت تعمل خير وكبرت الفكرة وجاء شباب اكتر بموتوسيكلاتهم



وتحولت لمنظومة كاملة على مدى الايام التالية...منظومة تلقائية بدون اتفاق مسبق...شباب بيبدلوا مع بعض كل عدة دقائق ناس داخلة وطالعة بمصابين وبقى الطقم اتنين على الموتوسيكل عشان يحطوا المصاب وسطهم وما يقعش...ويوصلوه لاقرب مستشفى ميداني



خير أجناد الأرض



بيتعلموا على الارض ومن التجربة



عشان كده شفنا في اقتحام الميدان هذا اليوم عساكر بيحرقوا موتوسيكلات...نكاية في هؤلاء الشباب





ومع هذا الحرق لم يكف الشباب عن المجئ بموتوسيكلاتهم اللي الله اعلم كلفتهم أد ايه من دخلهم...واللي في الغالب شئ اساسي بيستخدموه في باب رزقهم





وانا رايح في الطريق للميدان اليوم ده شفت شاب بسيط الحال بيجر موتوسيكله النصف محترق والناس بتواسيه





وفيما بعد ندمت اني ما ساعدتوش بأي حاجة..ماجاش في دماغي وقتها اني اعوضه بأي مبلغ عما حدث لموتوسيكله







ودلوقت فيه ناس هتقول : ناس بتدفع فلوس أهه ...هه



ربنا يهدي

:(





****************************



ارجع تاني ...لفيت انا تاني ناحية شارع الشيخ ريحان اللي كانت فيه مواجهات اليوم السابق ...وشفت فيه شئ ظريف جدا



الشارع ده ماكانش محطوط فيه داخلية لكن وحدة جيش في آخره لانه بيصب مباشرة على وزارة الداخلية



وقبل 300 متر من وحدة الجيش فيه حاجز اسلاك شائكة واقف عليه شباب لابسين مدني وشكلهم من المتظاهرين...واقفين كلجنة شعبية عاملين حاجز بدعوى عدم الاحتكاك بالجيش لعدم اثارة مواجهات جديدة وللحفاظ على

ارواحنا""



والناس كانت واقفة تهتف ضد حكم العسكر وضد المشير وضد الجيش احيانا ومطالبين بالحرية....الناس اللي واقفة على الحاجز كانت بتهتف معاهم الهتافات العامة لكن اما تيجي سيرة الشتيمة للجيش بيهدوا الدنيا وبيمتصوا الغضب وبيوجهوا الهتافات للهتافات العامة





وقفت شوية اتفحص فيهم وفهمت ان دول فيهم تحريات عسكرية محطوطين لتهدئة هذه الجبهة وامتصاص غضب الناس ...وبصراحة اعجبت بالفكرة ولقيتها فكرة عاقلة جدا...وفيها شئ من الشعور بالذنب لما حدث





عالفجر وقبل ما امشي من الميدان لقيت على نفس الشارع ناس جايبة طوب ابيض كبير عشان تدعم الحاجز



وسبحان الله الطوب ده جاء منين :)





المهم

على الرغم من اني كنت في منتهى الغل من الشرطة العسكرية الا اني كنت بقول في نفسي ان اللي قتل هو الشرطة وان جنود وضباط الشرطة خدعوا الجيش وضربوا تجت جناحهم ...ومهما كان فاللي شفناه ان الجيش كان بيضرب بعصي فقط وفيه فيهم اللي ما هجمش على الناس اللي بتصلي ومحدش فيهم حرق اي شئ اللي حرقت الشرطة الجيش كان بيفضوا بس



وده فضل في ذهني الى ان اختلف كل شئ مع احداث مجلس الوزراء الاخيرة ...هأجيلها ان شاء الله





سبت الناحية دي

..ورحت ناحية المستشفى الميداني...لان الداخلية كانت بتتقدم بقنابلها ناحية شارع طلعت حرب وفيه بلطجية ابتدوا يظهروا مع الداخلية والناس مسكت واحد منهم وعدمته ضرب...قلت اروح على المستشفى الميداني في الشارع الضيق في طلعت حرب واقول لهم يفضوه





وصلت هناك عند المستشفى الميداني والضرب كان قرب عليه اوي....لقيتهم بالفعل لموا كل حاجة وشبه بيمشوا وقفت مع مجموعة من الشباب نساعدهم ونأمن خروجهم ...وعلى آخر ده الداخلية وصلت وبدات تضرب خرطوش وغاز ناحيتنا من المدخلين...خرجنا بسرعة من الناحية الأأمن في وسط الغاز...واتبهدلنا غاز طبعا وفيه ناس اتصابت من الخرطوش



واحد من الشباب شاف عربية مدنية 128 بيضاء بتولع بسبب قنبلة غاز مشتعلة جت فيها...حاول يروح ناحيتها عشان يطفيها شفقة بصاحبها...لكن الشرطة ضربوا عليه خرطوش واتصاب





برضه في شارع الفلكي بسبب قنابل الغاز المشتعلة واحدة منهم جات في بلكونة شقة في العمارة اللي فيها كشري التحرير والبلكونة عبارة عن برجولة خشب....المرة دي لا همنا غاز ولا يحزنون ....الشباب ضغطوا جامد جدا عشان نسيطر على الشارع ده...ومنه قعدنا نخبط بهيستيريا على باب العمارة وننادي عشان سكانها يصحوا...لغاية اما صحيوا والجار اللي فوقيهم قعد يدلق مياة لغاية اما طفا النار دي





طبعا الشرطة ولا همهما ولا فكرت اصلا في حاجة زي كده





وفضلت الليلة ما بين كر وفر وهنا لازم احكي حكاية بنادق الخرطوش اللي ظهرت مع المتظاهرين





********************



موضوع الخرطوش اللي انضرب



الموضوع ده انا ماكنتش قريب منه وشفته من بعيد...كنت في الميدان ساعتها ناحية هارديز والموضوع حصل في محمد محمود



شفت خيالات - لان الدنيا كانت ضلمة والمسافة بعيدة - ناس يبدو انهم من كتر الضرب والشهداء اللي بيتساقطوا على طول الليلة جابت بنادق خرطوش...شخصين او تلاتة ...ضربوا كام طلقة من فوق سور الجامعة الامريكية في محمد محمود....لكن لان الاغلبية

فاهمين وعايزين السلمية

سواء شباب كلاس او شباب صنايعي

اللي سمعته ولم اراه بنفسي لبعد المشافة انهم طلعوا نزلوهم وقالولهم متشكرين وروحوا ومش عايزينكم تاني





ومحدش ظهر ببنادق خرطوش تاني في هذا الاسبوع كله - ولا بعد كده طبعا



لكن اعلام المجلس العسكري زي اعلام مبارك تمام...يبدو انه خد الحادثة دي وبنى عليها اكذوبة كبيرة كي يدافع بها عن نفسه...قال ان المتظاهرين كان معاهم اسلحة..وان الشرطة دافعت عن نفسها بناء على هذا (ولا كأنهم هم من بدأ بالقتل)

وقالوا ان الشرطة هما اللي قبضوا على ناس كان معاها

سلاح...يا سلااااااااااام





في رأيي انا بقى في كل ده... اما جهاز عسكري في بلد - شرطة او جيش - يهاجم سكان البلد دي اللي بيطالبوا بمطالب مشروعة...فيكون العساكر آداة بطش للنظام ...شئ مشروع جدا ان تواجهه وتدافع عن نفسك بكل وسيلة ممكنة



لكن بما ان اغلبية الثوار- والشعب- مش عايزين ده فأكيد أنا مع رأي الاغلبية



وتفاصيل اكتر عن النقطة دي - سلمية الثورة - في التدوينة دي لنوارة نجم - هي نوارة نجم مهبوشة شوية لكن احيانا كتير بتقول كلام مظبوط...وهي عموما شخصية مخلصة جدا لما تؤمن به وهي تريد الحق على اي حال وان تطرفت في الايمان بما تراه هي من وجهة نظرها الحق ولا تضع هامش الى انها قد تكون مخطئة ومن هنا تأتي هيستيريتها في التعبير



http://tahyyes.blogspot.com/2011/12/blog-post_09.html





المهم بدات الامور تهدأ قليلا قرب الفجر برضه...ولاني عندي عمل مهم تاني يوم...اضطريت اروح...على ان اعود اليوم اللي بعده بأمر الله



*******************

هذا ما رأيت وما فهمت ...والله اعلى وأعلم





يتبع ان شاء الله...وهأتكلم عن نقطة المولوتوف ..... ونوارة برضه اتكلمت عنها في اللينك المذكور

Friday, January 06, 2012

أحداث محمد محمود - 1

ليه باكتب الموضوع ده

عشان لقيت اننا عمالين نكلم الناس العادية اللي مش متابعة سياسة ونقول لهم اللي انتوا شايفينه غلط اللي انتوا سامعينه غلط من غير ما نفهمهم بشكل ممنهج وصحيح ترتيب الاحداث فبقينا بننتقد عامة الناس اللي مش فاهمة اللي بيحصل وممكن تكون معذورة لما تسمعه من اكاذيب ضخمة دون ان نبين لهم الحقيقة بالترتيب والتسلسل الصحيح خاصة انه لفهم الوضع الحالي يوجد تفاصيل كتيرة جدا تؤثر على الحكم العام على الاحداث

هذا هو ما اريده بسلسلة المواضيع اللي هأكتبها ان شاء الله...اعذارا الى الله..وان كنت بالخبرة اللي بتتكون مما اراه من طبيعة البشر غير متفائل بتغير فكر عدد كبير من الناس ولكن كما قلت اعذارا الى الله وبعد كده وبعد تاكدي من قرائتهم لما كتبت ومعرفتهم بالحقائق التي نعايشها على الارض - على الاقل في الدائرة المحيطة بي - فلن اسامح اي شخص بعد هذا يسئ لاي من الثوار او يسئ للثورة

والسرد هيبقى بالعامية بأسلوب التحدث الشخصي...خليط بين التجربة الشخصية كما عاصر كاتب هذه السطور الاحداث ....وتعليقات عامة على الاحداث

نبتدي منين الحكاية

المفروض ابدأ من بداية ما قبل الثورة او من يوم الخميس 10 فبراير ....لكن لما يجري من احداث افضل اني ابدا من جمعة تسليم السلطة 18 نوفمبر ثم احداث اسبوع محمد محمود ثم اعود للخميس 10 فبراير واختم بمجلس الوزراء ...على ان اكتب يوميات الثورة فيما بعد ان شاء الله

***************************************

دي أجندة أيام اسبوع محمد محمود هأخذهم ان شاء الله بالترتيب يوم يوم


الجمعة 18 نوفمبر : مليونية تسليم السلطة

السبت 19 نوفمبر : ضرب المعتصمين وبداية ما عرف باسم احداث محمد محمود

الأحد 20 نوفمبر : مجزرة ارتكبتها الداخلية في حماية الشرطة العسكرية

الاثنين 21 نوفمبر : استمرار المصادمات وسقوط الشهداء في شارع محمد محمود والاعداد لمليونية

الثلاثاء 22 نوفمبر : مليونية الشهداء وبيان طنطاوي بتسليم الرئاسة اول يوليو

الاربعاء 23 نوفمبر : استمرار المواجهات وبداية جهود تهدئة شارع محمد محمود

الخميس 24 نوفمبر : توقف المواجهات في شارع محمد محمود واعلان الجنزوري رئيسا للحكومة الجديدة

الجمعة 25 نوفمبر : مليونية الحكومة الانتقالية وتكوين مجلس رئاسي مدني

السبت 26 نوفمبر : بداية اعتصام مجلس الوزراء

**************************


البداية للأسبوع ده هي وثيقة السلمي اللي ازاحت الستار عما يريده المجلس العسكري من رؤية تفرض على الناس وضع خاص للمجلس الاعلى للقوات المسلحة لا يوجد في اي دساتير العالم المحترمة ...واكيد احنا قمنا بالثورة عشان محدش يصادر على حقنا تاني ويمارس الديكتاتورية بدعوى ان الشعب
مش فاهم


قبل 18 نوفمبر كان الوضع كالتالي

تقرر تسليم السلطة بالكامل بعد كتابة الدستور - في مخالفة صريحة للاستفتاء والاعلان الدستوري

ومع ذلك لا يوجد ميعاد واضح لتسليم السلطة والكلام المعلن الصريح عن ابريل 2013 !!!!! وكمان قالوا لو الدستور خلص ولو ما خلصش هما قاعدين لـ 2016 حتى
!!!!!!!!!

ومين قال انهم هيمشوا بعد الرئاسة ؟؟؟ برضه هما قاعدين (بدعوى الخوف على مسار البلد) ولهم وضع خاص في الدستور اشبه بالفيتو على الرئيس وعلى مجلس الشعب وميزرانيتهم مستقلة ومجلسهم مستقل هم من يختاره ويختار تشكيله

البلد في انهيار اقتصادي...لان الخريطة السياسية غير واضحة ووضع الحريات في بعض النقاط اسوأ من قبل الثورة حيث المحاكمات العسكرية فيما لا يجب ان يكون...فالاستمثارات الخارجية هربانة والاستثمارات الداخلية متوجسة...والسياحة بتعاني

البلد في انهيار امني بسبب رفض خطة اعادة هيكلة الداخلية اللي قدمت للمجلس العسكري مرار وتكرارا واصراراهم على الاستعانة بنفس العناصر القديمة

(المحاكمات العسكرية والانهيار الامني هاكتب ان شاء الله نوت لهم وحدهم)

الشغل مع الفلول بقى عيني عينك وعلى المكشوف...وأبناء المخلوع اتحدوا مع العسكري على الرغم من ناه اللي حبس المخلوع ولكن لأن عدوهم الاول هم ومن ورائهم هو الثورة

التشويه المتعمد للثورة وللثوار على أشده في خطة ممنهجة لتفريغ الثورة من مضمونها وانهائها تماما

فريق من الثوار والمعارضين آلوا على أنفسهم تشويه التيار الاسلامي كمان :))

ده كان الوضع

اذا يوم الجمعة 18 نوفمبر ...وبعدما بان اصرار المجلس العسكري على فرض وجهة نظره في الطريق الذي ستسير فيه البلاد قررت القوى الاسلامية النزول في مليونيةالدولة المدنية وكان مشهد فريد ان تنزل القوى الاسلامية للدفاع عن مدنية الدولة في حين ان بعض - بعض - القوى الليبرالية والعلمانية رفضت النزول وانحازت للمجلس العسكري في انتهازية سياسية حقيرة نكاية في الاسلاميين - ونزل هذه الجمعة ايضا الكثير من الشباب النقي المعتدل المتزن ثوريا اصحاب 25 و28 يناير و2 فبراير... المستعد للتواصل مع كل الاطياف طالما اتفقنا على اطر معينة


وكان المطلب الرئيسي هو انتخابات الرئاسة قبل نهاية ابريل 2012 ...والغاء وثيقة السلمي التي تصادر على رأي الشعب ...وايضا تجعل من الجيش دولة داخل دولة بشكل سيهدد استقرار البلد وتوازنها السياسي في المستقبل وكأننا نعيد السيناريو التركي بحذافيره اللي هما نفسه في تركيا يا دوب بعد 80 سنة بدأ يتخلصوا منه فالمفروض اننا نبدأ من حيث بدأو من 80 سنة !!!!!


شخصيا بدأت اليوم من صلاة الجمعة في مسجد مصطفى محمود وبعد خطبة رائعة لامام المسجد شرح فيها الآيات

إِنَّ اللّهَ يَأْمُرُكُمْ أَن تُؤدُّواْ الأَمَانَاتِ إِلَى أَهْلِهَا وَإِذَا حَكَمْتُم بَيْنَ النَّاسِ أَن تَحْكُمُواْ بِالْعَدْلِ إِنَّ اللّهَ نِعِمَّا يَعِظُكُم بِهِ إِنَّ اللّهَ كَانَ سَمِيعًا بَصِيرًا

يَا أَيُّهَا الَّذِينَ آمَنُواْ أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ مِنكُمْ فَإِن تَنَازَعْتُمْ فِي شَيْءٍ فَرُدُّوهُ إِلَى اللّهِ وَالرَّسُولِ إِن كُنتُمْ تُؤْمِنُونَ بِاللّهِ وَالْيَوْمِ الآخِرِ ذَلِكَ خَيْرٌ وَأَحْسَنُ تَأْوِيلاً


مع اني ازعم اني من اهل القرآن او من محبيه على الاقل - ولا ازكي نفسي أبدا على الله - الا اني اول مرة كنت اخد بالي من آية تأدية الامانات جاءت قبل آية طاعة اولي الامر والخطيب شرح ارتباط الايات ببعض وليه جاء واجب الحاكم في تأدية الأمانة قبل طلب الطاعة من المؤمنين ...ثم اسقط ذكل على الوضع يومها من الطلب للمجلس العسكري بتأدية امانة نقل السلطة للمدنيين في اسرع وقت والحفاظ على امن البلاد واستقرارها بشكل عادل حتى يتم هذا

وهكذا يكون العلماء الربانيين... وكما علمنا الشيخ وجدي غنيم : فيه عمم قمم وفيه عمم رمم

والخطيب ده أحسبه من العمم القمم...فلم يقص الآية من سياقها كما يفعل كثير من العمم بأن يقولوا
يَا أَيُّهَا الَّذِينَ آمَنُواْ أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ مِنكُمْ
ويطلوها على عواهنها


بدأت المسيرة بعد خطبة الجمعة مباشرة للتحرير ...في الطريق للتحرير من مسجد مصطفى محمود...بان الفرق عن احداث الموجة الاولى يوم 25 يناير...يوم 25 يناير كان الناس اللي في البيوت وفي الشوارع على طول المسيرة بتبص لنا بدهشة وتعجب...وانبهار اعجاب وتشجيع ايضا ....لم نر اعتراض او استهجان


هذه المرة بعد شهور من تسميم المجلس العسكري واعلامه للثورة وما حدث بعدها كان هناك عدد غير قليل من المعترضين علينا نراه في طريقنا- وكان أيضا هناك مؤيدين كثر ...لكن كان فيه خوف ...توجس من تكرار المأساة التي عاشوها الشهور الماضية ولا يفهمون انه ليس ذنب الثورة ولكن ذنب من يتعمد تشويهها

وشفت حتى في الطريق شخصية احترمها جدا، شخصية ممتازة اعرفها في حياتي ودار بيننا حورا سريع على هامش المسيرة... كان معترض بشدة على مسيرتنا وبيقول هتخرب اكتر ...واحنا كشعب بلطجية في أنفسنا نستحق اللي بيحصل لينا وقال مثال انه هو نفسه بيسوق عكسي احيانا

عن نفسي انا مش بلطجي وما بأسوقش عكسي (الا في مكان مافهوش يافطة واضحة ان ده اتجاه واحد) وحتى في احلك اوقات الانفلات الامني ايام ثورة يناير وماكانش فيه شرطة كنت بألبس الحزام وبأتحرج اني اركن في مكان ممنوع فيه الوقوف


ربنا يغفر لي وله ويهدينا ويهديه...ويكمل لنا جميعا ما بنا من نقص


المسيرة كانت كبيرة نسبيا ...وصلنا التحرير ومر اليوم وعلى الساعة خمسة انصرفت القوى الاسلامية - الاخوان والسلفيين - كما اعلنوا من قبل وبقي الشباب المستقلين في انتظار الشيخ حازم ابو اسماعيل الذي نوه بالاعتصام قبلها باسبوعين

وان كان للحق نوه بعدم الاعتصام قبل الجمعة 18 نوفمبر بيومين - هأشرح ان شاء الله ملابسات الاعتصام وعدم الاعتصام بعد ما اخلص وصف اسبوع محمد محمود


العدد اللي كان منتظر لم يكن عدد قليل ابدا كان ممكن تقديره بالفعل بحوالي عشرين الف او اكثر وكان واضح استعدادهم الفعلي للاعتصام وجاء الشيخ حازم وبدا يتكلم وكانت الخطبة ثورية رائعة ولكن قال فيها بعدم الاعتصام(كان الواضح انه لم يستطع اكتساب اجماع القوى السياسية على الاعتصام بسبب دخول الانتخابات وده هييجي تفصيلا برضه ان شاء الله)...وبدات الاعتراضات وناس هتفت ضده

وكالعادة للاسف اتهمه البعض - مش من الاسلاميين - بالخيانة والعمالة ....كعادة بعضنا السيئة المتخلفة عند الاختلاف في الرؤى


انا ماكنتش مؤيد للاعتصام برضه وكنت اؤيد التصعيد ضد المجلس العسكري لكن التصعيد المتدرج التكتيكي ..والانتخابات نقطة محورية هامة جادة في رأيي لايمكن ان نضيعها او نخاطر بها باعتصام سيقلب البلد رأسا على عقب...مش وقته

لكن بعد ما شفت كمية الاحباط على وجوه المخلصين حتى الذين رضخوا لفكرة عدم الاعتصام وهم الاغلبية....انصرفوا ولكن على وجووهم احباط شديد...بعدما رأيت هذا صعب عليا احباطهم


في الطريق وانا ماشي مع اخي المؤرخ محمد الهامي قلت له...تفتكر ايه اللي ممكن يصحي الناس العادية من الوهم والتشويه اللي بيعمله المجلس العسكري ؟ كعصف ذهني سألته...وجاوبت انا نفسي ايضا في نقطتين : فضيحة بأنه يقوم بارتكاب خطأ فاحش يفضحه بالظبط زي خطا مبارك في موقعة الجمل اللي يعيد التعاطف مع الثوار...أو فضيحة أخرى انه يظهر دليل يشير الى تنسيقه مع قوى خارجية لتوجيه الثورة في مسار تريده الوقى الخارجية بما لا يهدد مصالحهم في المنطقة...او كلا الفضيحتين معا

لكن كلا الشيئين مش بإيد الثوار ويحتاج ذلك لتدخل رباني وغباء منقطع النظير - او لنقل تهور - من المجلس العسكري

المشكلة انه ارتكب فعلا مجزرة...لكن..وكالعادة ايضا....تنقلب الامور مرة اخرى لصالحه ويتحول الناس العادية للائمة على الثوار
للمرة التالتة وكانهم لا يتعلمون


المهم انصرف المتظاهرين وبقى عدد قليل جدا معتصم....وزي ما قالوا مرة في كتب التاريخ ..وبات الفريقين في خير حال...وبات المجلس العسكري وازلام النظام السابق في شر حال يخططون ويدبرون لكيفية السيطرة على الامور كما يريدونها هم


اليوم التالي - السبت 19 نوفمبر - كان عندي توصيل لزميل فجرا الى المطار...وسمعت في راديو السيارة وانا راجع بعد الشروق في اخبار الصباح نفي رئاسة الوزراء لاي تأجيل في وثيقة السلمي وانها مستمرة كما هي ...على الرغم من انه جاءت اخبار اليوم
السابق اثناء المليونية
بأن وثيقة السلمي تم تأجيلها، ولم يرض هذا المتظاهرين طبعا لانهم ارادوا اولا تسليم السلطة في ابريل...وثانيا الغاء الوثيقة نهائيا


فيعني مش مجرد التأجيل...لأ....مستمرة ولو عاجبكم

قلت لنفسي هذا اول تصعيد من المجلس العسكري

نمت ثم استيقظت وسمعت اخبار بضرب المعتصمين في التحرير...قلت هذا ثاني تصعيد..ما شاء الله المجلس العسكري واخد في وشه وقازح...اضمرت في نفسي اني لازم اروح التحرير ..لبست ونزلت وفي الطريق سمعت اخبار ان الناس بدات تنزل وتتجمع للتظاهر في التحرير ...رحت نقابة المهندسين لاجل تسديد الاشتراك لاجل الانتخابات ...ثم اخذت المترو للتحرير
واثناء ما انا في المترو كنت شايف الاخبار على الموبايل ان فيه مظاهرة اتجمعت في التحرير لمساندة المعتصمين وانها بتتضرب دلوقت

قبل ما اخش في اللي حصل في التحرير عايز اتكلم عن ضرب المعتصمين....انا معرفش المعتصمين دول معتصمين ليه...هما بيقولوا اهالي شهداء وماخدوش حقهم....فيه ناس بتقول لأ دول خدوا حقهم وبيستهبلوا..فيه ناس بتقول اهالي مجرمين (لاحظوا ان الاعلام الحكومي هو اللي متزعم الكلام ده وهو اللي قال كده - الاعلام الحكومي المعروف بكذبه المستمر)...فيه منهم من كان معتصم بسبب موضوع تسليم السلطة....فيه ناس بتقول مدسوسين لافتعال مشكلة

لكن الاكيد ان عددهم كان قليل اوي...وانهم لم يبدأوا الاعتداء على أحد...وانهم كان معتصمين بأدب في الصينية الوسطى في الميدان وماكانوش معطلين الميدان

يعني بعد ثورة 25 يناير ماكانش فيه اي مبرر ولا ومسوغ لضربهم بأي حال...وغير مقبول على الاطلاق ضرب متظاهرين او معتصمين سلميين ...لكن اللي حصل انهم انضربوا وبوحشية شديدة شفناها بالصورة وبرواياتهم...واتقال لهم : عشان تبقوا تعملوا ثورة تاني

اذا الموضوع كان مقصود لاثارة الدنيا ودي هي البداية الحقيقية والسبب الرئيسي فيما حدث بعد ذلك...وظهر في فض الاعتصام غل الشرطة الدفين ورغبة الانتقام في صدورهم من الشعب الرغبة اللي بتطلع اما ييجي لهم فرصة

والاخطر...ان ظهر فيما بعد ان الضرب ده كان مقصود لرمي القفاز في وجه الثوار والتيارات الاسلامية...آدي جمعتكم ومليونيتكم اهيه اترمت في وشكم ...مفيش سحب للوثيقة...مفيش استجابة للمطالب ...مفيش ميعاد محدد لتسليم السلطة ...وكمان اللي هيتظاهر هنطحنه

الثورة ماتت يا غجر

هي دي الرسالة اللي كانوا بيوصلوها



بمجرد ما خرجت من عربة المترو واقتربت من السلم شميت ريحة الغاز وعيني بدات تحرقني..سألت اللي نازلين في ايه ؟ قالولي شغالين غاز مسيل للدموع فوق

طلعت ...رأيت المنظر التالي...عدد كبير جدا من المتظاهرين مماثل لعدد 25 يناير - حوالي عشرة آلاف - متجمعين في الميدان وعند مدخل شارع محمد محمود والداخلية عمالة تضرب عليهم خرطوش

أيوة خرطوش

وعلى الرغم من اني كنت سامع الاخبار من الصبح كما شرحت ...ولاني مكنتش لسه محدد البوصلة ولاني كنت مسافر الفترة الماضية خارج مصر ولم احضر فعليا على الارض احداث
ماسبيرو والسفارة واعتصام يوليو
ومتأثر بالكلام عن البلطجية والمندسين
خاصة مع ما رأيته بعد حادثة ضباط 8 ابريل وما رأيته من بلطجية ومأجورين وضعتهم فعلا جهة ما

ولاني مكنتش مع التصعيد الفترة دي وكنت ارى التهدئة حتى تمر الانتخابات الهامة...فلم اندفع

لأني تهمني جدا فقهيا ودينيا مسألة الراية - السبب والناس - اللي هحارب - أو هأعارض أو هقاوم - تحتيها وهل هي راية سليمة ترضي الله ورسوله ام اني ان اصبت او قتلت في اثناء هذا او حتى خطواتي ومشيي فيها سأكون مأزورا(مذنبا أمام الله)غير مأجورا...فلم اندفع مباشرة للمواجهات بل توجست وتأنيت وقلت أقف أفهم الاول مين دول - المتظاهرين - وايه اللي بيحصل دلوقت

شفت ناس خارجة من محمد محمود ووشها ماليان دم وبعضهم مصاب في عينيه...عربية الامن المركزي لم تكن احترقت بعد ...كان الناس واقفة محاوطاها - وده اللي سمعته في الاخبار ان فيه عربية اتمسكت آه لكن الناس اتصرفت بعقل ولم تحطمها او تحرقها

لكن بعد دقائق من المواجهات بقى اللي بحكي عنها وضرب الخرطوش والاصابات الكثيرة اللي بدأت تخرج وقنابل الغاز شفت الناس اتنرفزت وحرقت العربية كرمز للشرطة - وعندهم الف حق واقدر مشاعرهم


بدات الصورة تتضح ان الشرطة بتستخدم نفس الاساليب القديمة وعايزة ترجع لما فات + ضرب المعتصمين الصبح اللي سمعنا عنه وشفنا صوره... بدات الصورة تتضح قدامي وبدأت انوي المشاركة ولو خفيف

لم يكن معي اي من الادوات اللي اتعلمت استخدمها في المظاهرات من ايام خمسة وعشرين يناير - فرحت اشتريت قناع جراحي محترم زي اللي كنت بشتريه وكولا - طبعا ولا نفعت الحاجات دي المرة دي وهأحكي ليه

رجعت والعدد كان بيزيد لان الاخبار بدأت تنتشر ولقيت الموضوع بيتطور زي 28 يناير بالضبط....ناس شكلها عادية جدا ومن اهالي بولاق وماسبيرو والسبتية اتضايقت من اللي الشرطة بتعمله + اللي سمعناه وشفناه عن ضرب المعتصمين وناس راجعة من اشغالها ومعدية على التحرير - وناس معدية تتفرج برضه - وبدا العدد يزيد....ثم بدأ هجوم كااااسح على الميدان بالخرطوش والغاز

المشكلة الاكبر كان في الغاز وفي الوقت ده محدش فاهم ليه الوسائل القديمة ما بتنفعش والغاز عمال يحرق فينا كده وناس بيغمي عليها وبتقع وبنشيلهم نرجعهم ورا بسرعة....ونجحت الشرطة وفضت الميدان بسرعة عجيبة

فيه مشاهدة هنا عايز احكيها اني شفت شخص اوروبي - وطلع مسلم كمان - واقف وبيدي الناس مياة....قربت منه وسألته انت ليه بتعمل كده...قال لاني شفت ثورتكم اول مرة واعجبت بيكم جدا وتمنيت في نفسي اني اكون معاكم....وماكنتش مصدق اني هتيجي لي الفرصة دي...انا دلوقت موجود في شغل وجيت الشغل ده في مصر بالصدفة ولفترة صغيرة لكن الله قدر لي ان ده يحصل وانا موجود عشان احقق امنيتي...قلت له فيما معناه صدق الله فصدقه الله - حديث النبي صلى الله عليه وسلم

والحمد لله العبد لله مش اهبل عشان يتضحك عليه...بفضل الله بعرف أميز الى حد كبير الصادق والكاذب والمخبر والثائر والعميل ممكن اعرفه (وقدرت اتعرف على مخبرين للامن كذا مرة في الميدان وطلعت توقعاتي صحيحة)....فكلمتين من دول مش هيدغدغوا مشاعري ...لكن وقفته والطريقة اللي بيساعد بيها وهيئته العامة توحي بأنه بالفعل كما يقول - والله اعلم في كل حال

ده مش زي ما بيقول المتخلفين الاغبيا جاسوس وعميل ومهيج واصابع أجنبية والهطل ده ... ووصلت ان سفير دولة أجنبية صديقة اتوقف في الشارع وتم اتهامه بانه جاسوس عشان الهبل اللي بيغرسه الاعلام الحكومي والمجلس العسكري وعكاشة وعمرو مصطفى


لو الشخص ده مخبر او جاسوس جاي ينقل الاخبار زي ما هيتخيل البعض احب اقول لهم بمعلوماتهم الضحلة ان فيه وسائل اسهل من كده مية مرة للتجسس..من الاقمار الصناعية التجسسية الى وضع اناس شكلهم غير مثير للريبة ويبانوا انهم من اهل البلد بالفعل ان لم يستعينوا بجواسيس من البلد اصلا وده وارد ..الى التجسس على اجهزة الامن والدفاع نفسها - وده بيحصل اكيد رايح جاي مننا ومنهم


لكن لأن ثورتنا ثورة احترمها كل العالم ...وكل منصف وكل حر في العالم شايفنا اخواته وشايفنا اصدقاؤه يجب مساعدتهم واحترم فينا دفاعنا عن مبادئنا وكرامتنا وحريتنا فبقت مصر قبلة احترام لكل هؤلاء....لكن الجهل والتخلف خلى عدد كبير يظن ان فيه مؤامرة صهيونية سلفية شيعية صربية ماسونية اتاتوركية خزعبلية على مصر بسبب النعيم والسوؤدد اللي كان مبارك معيشنا فيه ومن بعديه مجلسه العسكري وحاسدنا عليه دول العالم أجمعين


ارجع للميدان....بعد ما فضوا الميدان بسرعة مذهلة نتيجة للغاز بشكل اساسي....ظهر لي ان سيناريو 28 يناير هيتكرر في ساعات محدودة...الاخبار بدات تنتشر....الناس اصلا كارهة الشرطة واللي بيحصل ده نفس السيناريو...العدد بيكبر جدا والغضب بيزيد بشكل متصاعد

ثم انسحبت الشرطة فجأة من الميدان بشكل غريب

والانسحاب ده ليه تفسير من تلاتة عندي - نتفق او نختلف

اما بسبب كمية الغاز الرهيبة اللي ضربوها والتي لا يتحملها بشر واللي الهواء كان بيحملها الى الخلف في اتجاههم وجابها عليهم

او بسبب قراءتهم للوضع وان الغضب هيمتد لاحياء القاهرة كلها ثم مصر كلها ويمكن يحصل مهاجمة للاقسام مرة تانية بعد ظهور الشرطة بنفس طريقتها القديمة ...فخلي الناس محصورة في مكان واحد وبتتظاهر في الميدان احسن


او لان فعلا اللي بيحصل ده جزء من خطة متكاملة لاثارة غضب الناس وتجميع اكبر عدد ممكن في الميدان وسحقهم عشان يبقوا قضوا بشكل ممنهج على اهم موجة شبابية ثورية خاصة مع نوعية الناس اللي بتنزل - في قوامهم شباب 25 يناير و28 يناير


لاحظوا ان كل ده احنا بنتكلم عن يوم السبت 19 نوفمبر لغاية الساعة ستة مساء

بدا الناس ترجع للميدان والشرطة انسحبت لمدخل شارع الشيخ ريحان على شارع القصر العيني ومنتصف شارع محمد محمود ...والعدد بدا في التزايد على الرغم من دخول الليل

واتفرج بقى على الناس اللي في الميدان

كما قلت شباب يبدو عليهم ومن كلامهم انهم من موجة الثورة الاولى

وناس عادية جدا جدا....موظفين وعمال وطلبة اتكلمت مع بعضهم معرفتهم السياسية مش عالية خالص ...بعضهم يبدوا ممن يطلق عليهم حزب الكنبة....اغلبهم كلامه بيدور حوالين نقطة معينة : ان الوضع بيسوء ما بيتحسنش...المجلس العسكري ما بيحلش حاجة وبيبوظ البلد ومش عارف يديرها ويحل مشاكل الناس...الوضع ما بيتغيرش للاحسن كما يجب ان يكون...وكمان بقى الشرطة نازلة تضرب في الناس !!

الناس دي احترمتها جدا لانها وجهت غضبها من الوضع في الاتجاه الصحيح وفهمت السبب الحقيقي

المهم العدد بيزيد وقدرته بما يقارب 100 الف - 100 الف واحنا داخلين على نص الليل - والناس بدات تتجمع مجموعات بتتكلم وتهتف لكن الشرطة ما سابتش الناس في حالها..كل شوية يضربوا قنبلة او اتنين او يضربوا طلقة او اتنين خرطوش على الناس.. للامانة ما اقدرش اقول الاستفزاز بيبدأ منين...
من الناس واللا الشرطة...لكن الناس مش طايقة تشوف الشرطة قدامها وعندها حق - ودي هأجيلها بعدين بالتفصيل

المهم تصاعدت المواجهات على الاطراف لغاية حوالي الساعة اتناشر واحدة نص الليل انقلبت لمواجهات شاملة بين المتظاهرين والشرطة ...بشكل اساسي على مدخل شارع الشيخ ريحان

المعركة لم تكن في عنف معركة يوم 28 يناير بالليل في التحرير لكن كانت عنيفة برضه...الغاز كان بهدلة ومش نافع معاه حاجة

وشفت فيها بطولات وشفت فيها ناس تتاقل بالدهب...كبار وصغار...ملتحين وغير ملتحين...اغنياء ورقيقي الحال..من كل مناطق القاهرة لاني كنت مهتم اسأل وافهم الناس دي هنا ليه...من شبرا وامبابة والبساتين والسبتية وبولاق والزيتون والحدائق والهرم وفيصل والمهندسين ومصر الجديدة.....الخ

على اختلاف مستوياتهم الاجتماعية والثقافية....عشان الصور اللي بتصور لنا اي انسان بسيط انه بلطجي وما بيفهمش


ومن اعجابي باللي الشباب بيعملوه كتبت وقتها على الاستيتس عندي : خير اجناد الارض

خير اجناد الارض مش الشرطي الحقير اللي بيضرب اهله وشعبه وحارس للظلمة والظالمين وعايز يرجع فوق رقاب الناس وواخد الموضوع انتقام وثأر لكبرياؤه وتجبره فيما قبل الثورة

خير اجناد الارض هما الشباب المدني العادي الغير مدرب اللي بيخش في المواجهات دي لا يفكر في حياته وتسيطر عليه فقط فكرة دفع الظلم وانه بيحب ربنا وبيحب النبي صلى الله عليه وسلم وان ربنا ما بيرضاش بالظلم فهو الآن في سبيل الله


(طبعا الدراية الفقهية والمعرفية مهمة جدا جدا وخطر ان يدخل الانسان معركة زي دي دون نية ودون منهج اسلامي واضح لانه بكده ممكن يكون مأزور غير مأجور ويكون عمله هباءا منثورا وان نال الموت في معركة غير صحيحة فقد لا يأخذ أجر الشهيد بل قد يكون معاقب في الآخرة ... اسأل الله ان يصلح نياتهم ونياتنا أجمعين )


خير أجناد الارض اللي بينط جوه الغاز عشان يجيب القنبلة ويحدفها بعيد عن اخواته المتظاهرين

خير أجناد الارض اللي بيخش بصدره على الخرطوش والحي عشان يرمي طوبة هي وسيلة مواجهته السلمية - نوعا - ضد جنود الظالمين

والانكي الشخص الشجاع الكريم ابن الأكرمين اللي كان ماشي - مش عارف ازاي - وسط الصفين... المتظاهرين بحجارتهم والجنود بخرطوشهم وحيهم وقنابلهم وعمال يلوح بعلم مصر رايح جاي رايح جاي رايح جاي طول التلات ساعات دول

وانضم له فيما بعد شخص آخر يحمل علم مصر برضه على سارية طويلة



خير اجناد الارض هو شاب صنايعي لقوا في جيب جثته وصل شاش وقطن بقيمة يوميته للمستشفى الميداني

*******************************

في النص أخدت جنب اريح من الغاز وكنت بشوف الفيس بوك على البلاك بيري...ولقيت واحد - وهو صاحب مجموعة صناعية كبيرة ومعروفة - محطوط على قائمة اصدقائي وبيقول بلطجية وهمج في التحرير يريدون الخراب والدمار

بلطجية !!!!!

دول بلطجية ؟؟؟؟؟

ياللي قاعد على الكنبة في بيتك بمنتهى البساطة حكمت ان دول بلطجية وهمج ؟؟؟؟؟؟

مع كل اللي حكيته ده ما استحملتش ...دخلت بصراحة شتمته جامد جدا وهزأته...وعملت له بلوك

ومش نادم على ده

المتظاهرين ...والناقدين لهم خليط من عدة انواع...فيهم الغني والفقير المتهلم ومحدود الثقافة...المخدوع واللي بيتسهبل...صاحب القضية وصاحب المصلحة

لكن أكيد شخص بسيط الحال بسيط التعليم يحمل في عقله وقلبه معرفة فطرية بالحق والباطل والحلال والحرام ...افضل من ملياردير او واحد هاي كلاس متأفف وبيقول جتهم القرف خربوا البلد ...خربوا البلد كسبت مليون بس مش عشرة مليون زي زمان...اوووف خربوا البلد وهو سايق عكسي وبيكسر الاشارة وبيبني مخالف


ما بقولش ان الكل ملائكة والكل شياطين وفيه ناس مثلا في محلات وسط البلد بيخسروا فعلا من وقف الحال ....لكن هل الدنيا دار راحة وخلاص...واللا الاصل في الدنيا هو الابتلاء والثبات الحق والعمل لهذا الحق بحق وتحمل تبعاته

قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ وَاللّهُ لاَ يَهْدِي الْقَوْمَ الْفَاسِقِينَ


وتاخد كام وتموت...تاخد كام وتعرض نفسك للخرطوش والغاز والعمي والشلل والقتل والسحل والضرب والذبح

***************

الغاز والخرطوش عايز اوضح فيهم شوية حقائق

بالنسبة للخرطوش...غير اني شفت الاصابات وسمعت الطلقات وسمعت البلي بيرزع في الحيطان والعواميد حواليا وشفت جنود وضباط الشرطة وهما بيصوبوا البنادق على مستوى الراس والصدر...وحسيت بالخرطوش اما جه في ضهري وانا بجري من قنبلة غاز....لكن لم ينفذ من الجاكيت


واتجاه الطلقة كان واضح جدا جاي من ناحية الشرطة طبعا طبعا...وهأحكي اكتر عن اتهامات ان ناس من المتظاهرين كان معاها خرطوش التدوينة الجاية ان شاء الله

فاللي بيستهبلوا وبيستعبطوا ويطلعوا يقولوا مفيش خرطوش وكله صوت عليهم من الله الغضب واللعنة في الدنيا وفي الآخرة

الغاز بقى واللي بيقولوا انه مجرد كان منتهي الصلاحية وهو هو نفس النوع بس جديد

اولا جديد ليه ؟ واشتريتوا ليه اصلا ؟ هو كان نفع مثلا ايام 28 يناير (حد هيستذكى ويقول لي ما هو نفع المرة دي ...قدام ان شاء الله هأحكي ان خلاص شفرته اتحلت ولا هينفع بعد كده ان شاء الله)

لكن خلاص...عندكم فلوس...وبتشتروا جديد...امال فين كلام عجلة الانتاج والوضع الاقتصادي والافلاس وعجز الميزانية ؟؟؟؟

فين كلام ان مفيش عربيات بوليس كفاية وما فيش تسليح كفاية لمطاردة المجرمين ومواجهة حالة الانفلات الامني المريعة ؟؟؟

بـ 500 مليون أسلحة مكافحة شغب بعد الثورة يا ظلمة يا فسقة !!!!!!!!!

ما الفلوس موجودة ايه وبتطلع وقت ما تحبوا !!!!!!!!!

هي فعلا قنابل جديدة انتاج مارس وابريل ومايو 2011

لكن برضه تركيب جديد

لان وسيلة المواجهة اختلفت...ايام 28 يناير كنا بنستخدم الخل والبيبسي وكان بينفعوا الى حد كبير

المرة دي الخل والبيبسي بيزودوا تأثيرها وده دليل على ان التفاعل الكيميائي المرة دي اختلف

وبقت وسيلة المواجهة هي المواد المضادة للحموضة كالابيكو جيل...او الخميرة ...او اقنعة الغاز الحقيقية

وايضا تأثير الغاز مميت....لا اقول بسميته وشايف انه اللي بيقولوا انه سام ده كلام مبالغ جدا جدا....لكن اذا وقعت في وسطه وما طلعتش فأنت ميت لا محالة لان رئتيك ستنهاران - وده حصل فعلا في بعض الوفيات

وقد يكون هناك عدة انواع...وقد يكون هناك انواع استخدمت تسبب شلل العضلات وان كنت شخصيا لم ارها...لكن ما تعرضت له شخصيا على مدى ايام هو مرحلة خليط بين المسيل للدموع واسلحة الحرب الكيماوية...ده مش مجرد مسيل للدموع وفقط

وده محصلش ايام يناير...وغاز يناير كان بيسبب سعال آه لكن مش لدرجة انهيار الرئة والموت

محرم دوليا ؟....اظن بشدة ولا اظن ان فيه اي دولة محترمة تجرؤ على استعمال الغاز ده ضد مواطنيها ...ومتهيألي الحاجات دي بتتصنع فقط لدول العالم المتخلف والانظمة الديكتاتورية - غير استخدامها في الحروب طبعا وده معناه ان المجلس العسكري يرى انه في حالة حرب مع شعبه...ومع الثوار اللي هما كانوا السبب في انه بيحكم البلد دلوقت والمفروض لفترة مؤقتة

وده برضه يعني ان الولايات المتحدة ضد الثورة فعليا بدليل انها قبلت بعد الثورة ان تصدر لنظام الحكم في مصر قنابل مثل هذه على الرغم من التصريحات الدبلوماسة الانيقة المشيدة بالثورة ...وهما بيجزوا على سنانهم من الغيظ والخوف مما سيفعله بإذن الله تغير الانظمة الحاكمة بمصالحهم وبأمن ابنهم البكر الكيان الصهيوني - هآجي للموضوع ده بالتفصيل فيما بعد ان شاء الله

***************************

ارجع للميدان

المهم استمرت المعركة

كما قلت كانت مشاركتي محدودة...لكن انتقلت للمشاركة الكاملة اول ما سمعت سارينة سيارة مكافحة الشغب بتستعد للهجوم...قلت ما بدهاش بقا


لكن بفضل الله لم تستطع هذه السيارة التحرك وبدا المتظاهرين التأقلم على التعامل مع نوعية الغاز الجديدة ومحاولة تقليل تأثيرها عن طريق رميها في اتجاه الهواء المناسب ...محاصرتها ....الالتفاف حولها

واستمرت الشرطة في ضرب قنابل الغاز حتى وان هدات الجبهة أحيانا وبداوا في ضرب قنابل الغاز بشكل متعمد على مجمع التحرير ...والقنبلة أحيانا بتطلع مشتعلة يعني هتولع حريقة...فكان واضح انهم يريدون احراقه واتهام الثوار بذلك - بيفكركوا الكلام ده بحاجة ؟ هنجيلها في وقتها ان شاء الله

وبدأ امام مسجد عمر مكرم بالتحدث في الميكروفون ومطالبة قوات الامن بعدم ضرب قنابل على المجمع او على اي مبنى حكومي ومطالبتهم بالانصراف من الميدان وتركه للمتظاهرين السلميين ولا حياة لمن تنادي

المهم استمرت المواجهات لغاية حوالي الساعة 4 فجرا وبدا الانهاك يبدو على قوات الشرطة ونقص الذخيرة في حين ان خير اجناد الارض - الثوار - مكملين ما شاء الله

ثم انسحبت الشرطة من شارع الشيخ ريحان ومن محمد محمود

انسحبوا لقرب الوزارة وهدأت الامور نسبيا وبدا الثوار في تنظيم انفسهم في الميدان...وخدت جنب واتوضيت وصليت الفجر جماعة مع بعض الشباب

من نافلة القول اني اقول ان مفيش محل او مبنى اتلمس من ناحية الثوار - كالعادة

وان المواجهات العنيفة في الليلة دي كان اغلبها عند المجمع العلمي نفسه ومع ذلك مفيش طوبة اتحدفت ولا شعراية من ناحية الثوار ناحية هذا المبني - ولا اي مبني - مع اننا ماكناش نعرف هو ايه ده اصلا




كانت ليلة من اجمل ليالي عمري...مسكين من لا يحضر هذه الاحداث ويرى هؤلاء الاطهار ويتعامل معهم

شعور ماكنتش حسيت من ايام الثورة ذاتها

عايز اقول برضه ان اثناء الليلة دي...والله على ما اقول شهيد... شفت رجالة طاعنين في السن....فوق السبعين والتمانين...فيهم اللي مصر يقف قريب معنا على الرغم من امطار الغاز...وفيهم اللي مش قادر يمشي اصلا لكن عايز يتقدم للصف الاول والشباب اللي ما يعرفهوش بيمنعوه بالعافية وبالمحايلة انه يخش وبيستعطفوه ان يبعد عن المنطقة دي ويقعد في الميدان اذا مصر يشارك معانا ولو بشئ


بلطجية.....هه
:(



هنا- قرب نهاية الليلة - قريت تعليق لصديق لي على الفيس بوك على الموبايل...تعليق اثلج صدري جدا...ان المجلس العسكري حضر العفريت - الثوار والمتظاهرين - ومش هيعرف يصرفه

وبدا ان خطة المجلس العسكري في تجميع الثوار والقضاء عليهم ظنا ان عدد قليل بس هو اللي هينزل...ومن ثم الاستفراد بباقي القوى السياسية ومن ثم ترتيب اوضاع البلد على ما يريده هو...هذه الخطة فشلت في اول طلعة

لكن هما لسه عندهم موجات تانية ...وتناحة واصرار بلا حدود...واساليب ملتوية كتير



يتبع ان شاء الله احداث يوم الاحد 20 نوفمبر ومجزرة وقت صلاة المغرب