Saturday, April 28, 2007

أنص فرقع تيتي

عدنا


كان فيه زحمة مهام..فيه وقت بس ما كانتش مدية اي دماغ للكتابة والصياغة


عايز ابعبع في 6745 حاجة مش عارف لغاية دلوقت هاحطهم في تدوينة واحدة واللا هاقسمهم


ياللا اكتب وربنا يسهل


*************************************************

وقعت تحت ايدي الفترة اللي فاتت مجموعة من الافلام العربي في وسط مجموعة من افلام الاكشن اللي بحبها


كل واحد فيهم يستاهل تعليق...بس فيه واحد فيهم يرفع الضغط بجد



عن العشق والهوى....بتعجبني كلمات اغنيته اوي قلت اشوف الفيلم بطريقة الـ
sampling & hold
اللي اخترعتها وبتخلص اجدعها فيلم في نص ساعة + انها بتفلتر الفيلم


قلت يمكن يطلع فيلم معقول القصة كأغنيته



القصة ايه بقى...طبعا مش حافظ الاسماء فهديهم اسماء من عندي


ركزوا معايا- يبقى قابلوني اذا فهمتوا حاجة
((((:


حمادة-دودي...بيحب سوزي اللي اختها ميمي شغالة شغلة مش ولابد...قوم صاصا-اخو حمادة- يثبت له ان ميمي اخت سوزي مش تمام..بلاها سوزي ..يسيبها ويمشي


حمادة يقايس يتجوز تيتي...وتيتي بتحب حمادة من زمان ..لكن صاصا أخو حمادة بيحب تيتي هو كمان من زمان..ومن باب ضحيت هنايا فداه ....اشهد عليه يا لــــيـــــــــل...آآآآآآ...ما علينا...يقوم صاصا يحل لهم مشاكلهم ويصالحهم كل ما يتخانقوا


حمادة لسه متضايق من موضوع سوزي...على الناحية التانية سوزي تتعرف على كرع وتتجوزه...مدمن مخدرات لكن بيحب سوزي طحن ... في النهاية يخش مصحة ويتعالج ويوعدها انه ما يرجعش تاني للمخدرات


حمادة تيجي نيني تشتغل عنده..هي كمان ما بتحبش جوزها حاحا...حمادة وميمي نظرة فابتسامة فموعد فلقاء فخطيئة-واخد بالك من خطيئة - فجواز....جته نيلة في ذوقه...تيتي-مرات حمادة- شكلا وموضوعا احسن منها بكتير ...لكنها الرمرمة ..هنتلكم في الموضوع ده في الآخر



وفي مواجهات عاصفة ومشاهد ذروة زي ما بيسموها بتوع السينما...يواجه حمادة تيتي بجوازه..تنهار تيتي..تكلم صاصا...صاصا يواجه حمادة...تخدعه مشاعره ويتكلم...حمادة يزعل ....يتقهر....يقوله كنت بتبص لها-تيتي- ازاي ....كنت بتبوسها ازاي - كأخ طبعا يا ولد منك له ..عيب


لأ دكر ياض يا حمادة...يبوسها - زي أخوها والدين يسر - مش مشكلة لكن يفكر فيها لأ...وطبعا احاديث لان يطعن احدكم بمخيط خير من ان يمس امرأة لا تحل له ولا "الحموالموت-قريب الزوج " لا تناسب الحداثة ودقة قديمة وبلاش تعصب وتطرف



حمادة يعيط...سوزي تكتشف ان كرع لسه مدمن وبيخونها ...حمادة يقابل سوزي..سوزي تفتكر انهم هيرجعوا لبعض..حمدة يغلط ويجيب سيرة نيني-بتاعة الخطيئة - سوزي تزعل ..مش مشكلة فيه سونة في آخر الفيلم


نسيت اقولكم ان ميمي-اخت سوزي- اتجوزت عرعر المنتج المحترم اللي شايف-مجرد شايف- ان ميمي اما تتجوز هتتوب وتبقى ست كويسة...بدون حتى لا مقدمات توبة ولا انه شايف منها اقبال وفعل طاعات حقيقي وليس مجرد بدايات او كلام...حتى بدون اي شئ....آه يا شراييينييييي



في النهاية...حمادة-الحمار مع الاعتذار للحمار- يطلق تيتي مراته .....جته ستين نيلة...حد يطلق تيتي


انا لو من صاصا..اروح اتجوز تيتي علطول واسيبني من البأف أنص....آآآآ ..حمادة


بس


حد فهم حاجة
((((:




الخلاصة - الـ
conclusion


1-
حمادة معندوش مخ ...حد يطلق تيتي...غبي...جته نيلة...شكلا والأهم موضوعا...لكنه كما قال النبي صلى الله عليه وسلم عما شاهده ليلة الاسراء...رأى رجالا ونساء امامهم لحم طيب ولحم خبيث ..يأكلون الخبيث ويتركون الطيب..فسأل من هؤلاء...قيل له ..هؤلاء الزوتاني والزناة...يكون الرجل عنده امرأته حلالا طيبا فيتركها ويأتي الفاحشة مع امرأة اخرى..وتكون المرأة عندها زوجها حلالا طيبا...فتتركه وتاتي الفاحشة مع رجل آخر...او كما قيل



2-
حمادة و نيني اساسا محكوم عليهم بالاعدام-زناة محصنين -مين اللي قال كده- زمان النبي بلغنا ...اليومين دول الحاج محمد بن أبويا سويلم


3-
الحمو الموت


4-
ميمي اتجوزت جوازة حلوة وطز في الاخلاق والقيم ...صحيح كل بن آدم خطاء والمجتمع هو اللي بيعمل كده...بس برضه ومن يتق الله يجعل له مخرجا...مش خرب الدنيا وبعدين تروق وتحلى..ممكن تحصل في الحياة وممكن ميمي تبقى فعلا ست فاضلة..وممكن لأ

مش ده النموذج اللي يدوه للناس في عمل اعلامي



مصير الفيلم طبعا بعد العرض الأول
shift+delete
(:

**************************************************

أحمد السقا - حمادة



عن فيلم تيتو ...تعليق منه على النهاية اللي اعترض عليها ناس كتير-اتقتل


كان بيقول لازم يتقتل لانه قال في الفيلم-تيتو-انه عمل كل حاجة غلط في الحياة- الا خيانة صاحبه...فكان لازم يتقتل في نهاية الفيلم عشان العظة والقدوة وكده يعني


قصة الفيلم كانت رائعة....واقعية ممكن تحصل ....فيها توازن بين الصالح والسئ...صحيح بعيدة عن الدين او باشارت للدين من بعيد لكن كان معقول


الراجل ده زمان ما كنتش بطيقه لغاية اما شفت له فيلم تيتو وعدة لقاءات حديثة معاه...اتغيرت فكرتي وحسيت انه اتغير.....اتمنى اقابله يوم ولو صدفة واتصاحب عليه


الله يكرمك ما تعمل افلام زي كده تاني

**********************************************************

بشكل عام الافلام دلوقت احسن بكثير من عشرة عشرين سنة فاتوا ...يمكن عشان اتربيت في جيل افلام التمانينات وبدايات التسعينات اللي كانت افلامها في منتهى السوء كمضمون وقصة ...دلوقت افضل ...لسه فيه حاجات سيئة بس فيه قصص كويسة برضه


وممثلين ممتازين ....ان احسنوا اختيار ادوارهم...يغنموا ويؤجروا ان مثلوا قصص كويسة وهادفة تصلح الوعي شوية

اذكر منهم..احمد السقا(تيتو)-كريم عبدالعزيز(ابوعلي)-مصطفى شعبان(مافيا)-احمد عز (ملاكي اسكندرية)...ملاكي اسكندرية بالذات المشهد الأخير فيه يتدرس....على الرغم من المؤاخذات الشرعية على الافلام طبعا-اللي هما ما بيفكروش فيها اساسا..ولكن سنجد انها برضه افضل من زمان بكتييير


***************************************************************

يروى أثر عن السيدالمسيح عيسى بن مريم عليه وعلى نبينا افضل الصلاة والسلام


انه مر ومجموعة من تلاميذه على جثة متحللة ..فطفق التلاميذ يقولون ..ما انتن رائحته..ما ابلى ثيابه...ما ابشع منظره


فقال المسيح عليه السلام ... ما اشد بياض عينيه


نظرة للجانب الجميل في اي موضوع .. وفي اي شخص


*************************************

فاضل لي 6744 موضوع

6745-1
(:

Tuesday, April 10, 2007

تاج القيادة

تاج من صديقي ما علينا ...من انت من القادة



عملت الاختبار خمس مرات وآدي النتيجة




















هتلر 2+صدام 2 +1 اينشتاين= عند الغرب شخص اسلامي-او بيحاول يعني - صارم حاسم يؤمن بالعدل اللي بتحفه الرحمة وتحميه القوة - الجملة دي معلقة معايا اليومين دول
(:



اللي كان نفسي اكونه هو ابراهام لنكولن


لكن من القادة الحاليين لا يزال الباشمهندس اللي في الصورة تحت هو مثلي الأعلى





وبالمناسبة هو كمان شبهوه في الغرب بهتلر...واضح ان القطعية دي عندهم معناها هتلر
(:

لأ واللذيذ في الموضوع ان ما علينا كمان طلع هتلر وصدام
(:



بامرر التاج لـ

ديبوس-اتوقع له مصير مماثل
علا عثمان- اتوقع انها هتبقى غاندي
رفقة عمرمش عارف هي مختفية ليه
اروى الطويل
بلال
محمود سعيد
بينو

Sunday, April 08, 2007

مين كبير القعدة ج2.........دعوة للتعايش

طيب...ما عرفتش اوصل لغاية دلوقت مين كبير القعدة


المشكلةالأكبر ان بقى فيه كبير للقعدة ...مش هتبقى في مين كبير القعدة....المشكلة...طيب اما يبقى فيه كبير...هيعرف يسيطر على كل دول ازاي



مجرد طرحت اسم كداعية وكشخص ممكن يعمل دور محدد...كمية خلاف مهولة ظهرت


امال اما يبقى فيه كبير


اذا كان متشدد.... قد ياخد الناس بالشدة وينظر لهم جميعا كمفرطين ...يطبق الشريعة بشكل مباشر ممكن يكره الناس في عيشتهم وفي دينهم



اذا كان معتدل...برضه العامة والليبراليين والمتثيقفين هيقولوا عليه متشدد



اذا كان ليبرالي ولكن ذو نزعة اسلامية...حاجة كده اقرب للسادات...بعض طوائف السلفييين - اقول بعض - او المتشددين هيقولوا عليه مفرط وغير ملتزم...بل البعض ممكن يكفره ويقتله




عايز اقف شوية عند حتة السادات

صحيح هو اللي عمله ما كانش خالص لوجه الله...وكان فيه جانب سياسي كبير


لكن برضه نجد ان الراجل والله اعلم كان فيه نزعة دينية من الداخل...وكان احسن الوحشين


يمكن كان بيمن في كلامه كثير من ناحية انه اعطى الحريات وانه ما بيسجنش حد عشان رأيه...حتى ان عوقب وابعد من مكانه لكن كان مدي حرية اكثر من سلفه...لكن ده كان واجبه كحاكم...مش فضل منه


كون ان من كان قبله كان ديكتاتورا مع الجميع...فما يبقاش تفضل منه انه ما يكونش زيه


اللي عايز اقوله ان تعامل الجماعات معاه - واستثني من ذلك الاخوان المسلمين وعلى رأسهم الاستاذ عمر التلمساني- لم يكن بالشكل الصحيح



السادات ايضا اخطأ ....ان كان السادات اكثر تقى واكثر حنكة ..واكثر معرفة بالدين...كان اولى به في موضوع المعاهدة ان يقول لهم...انا الحاكم وانا ولي الأمر وعليكم طاعتي وان كرهتم مني شيئا ... ومن خرج عن بيعة اميره مات ميتة جاهلية...لا ان يوقل لهم ال سياسة في الدين ولا دين في السياسة



ولكن دلوقت نقول ان الافضل انهم كانوا اطاعوه وناقشوه بالحسنى وناصحوه لا اقول يوافقوه ولكن يقبلوا منه الصالح ويناصحوه في السئ...لا ان يهاجموه هو وزوجته على المنابر بالشكل العنتري كما كان يحدث



قدر الله وما شاء فعل



كان افضل من غيره ... ان قارنا موقفه في الصدام الشهير مع التلمساني على الهواء نجد ان التلمساني تصرف كما يجب مع الحاكم المسلم الذي فيه من الخير وفيه من الميل وان كره منه شيئا ...والسادات رده لم يكن سيئا



ولكن مثلا في موقف عبدالمنعم ابو الفتوح في الاجتماع الطلابي كان هجوما شديدا على السادات ....قد يصلح هذا الاسلوب مع حاكم مسلم ملتزم كامل الالتزام من عينة الخلفاء الراشدين...ولكن في ظرف مثل هذا ومع رجل مثله ينظر ايضا للموضوع من جانب الكبير والصغير سنا لم يكن مناسبا ما حدث


الافضل ان يعرض وجهة نظره نعم ولكن بصورة اكثر هدوءا واعتبارا ان من امامه ليس عمر بن الخطاب وليس عمر بن عبدالعزيز ولكن رجل مسلم في قلبه خير وفي قلبه ميل ايضا ....فنخرج منه الخير ولا تثير فيه العزة بالاثم كما حدث ......كدعاة وليس قضاة


قرأت ذات مرة ان قيادات جماعة الجهاد في مصر اجتمعت مع التلمساني وعرضت عليه مآخذهم على النظام الحاكم في مصر وعلى السادات-ولم تكن الجماعات الجهادية فقط- التلمساني لم ينكر هذه المآخذ ولكن لم يوافقهم في اسلوبهم في التعامل مع هذه المآخذ ونصحهم بالاهتمام بالبناء والتربية


واثبتت الأيام صحة وجهة نظر عمر التلمساني....وسمحت هذه الجماعات لنفسها ان تكون آداة في يد غيرها....رحمه الله رحمة واسعة واسكنه فسيح جناته

لا اظن ان هذه مصر التي ارادها السادات بعد المعاهدة



ليه بقول الكلام ده وايه علاقته بالموضوع ....... فلنفرض ان من تولى حكم مصر بعد مبارك - عسى ان يكون قريبا وربنا قادر على كل شئ - ولكن قد يكون من نفس عينة السادات او افضل قليلا


صحيح نتمنى ان يكون مسلما ملتزما ولكن اقول قد


(طبعا بره الكلام ده خااالص جيمي ....جيمي كل مؤهلاته انه ابن بابا)




او ان يكون ملتزما وتقيا - يا رب - ولكن يرى ان الامور لا تؤخذ فجأة والدين لا يفرض كله بين يوم وليلة ولكن بكيس وتأني وهذا هو الأفضل وما اراه صحيح تماما



اخشى ما اخشاه وقتها ان يتعامل معه الجميع كل من منظوره....من يراه متشددا ومنحنيا للجماعات الاسلامية...ومن يراه مفرطا متهاونا.....ومن يراه كافرا....وتخرب


يا ريت ان كان صالح وكفء نجتمع معه على كلمة سواء .... نناصحه ونساعده ونطيعه فيما ليس هو معصية بواحا...ونعينه وان كرهنا منه شيئا طالما ليس حراما

تاج

جالي تاج من الاخت رفقة عمر والان تاج -ضمني-آخر من الدكتور المحارب


استعنا على الشقا بالله
(:


التاج الأول


السؤال الاول هل كنت طالب شاطر فى المدرسه


كنت شاطر والحمد لله...حتى نهاية مرحلة المدرسة


في ابتدائي كنت دائما الأول ...لغاية آخر سنة خبت وطلعت التاني


في اعدادي....شرحه...لغاية آخر سنة برضه خبت وطلعت الخامس او السادس


في ثانوي وعيت الدرس وتلافيت اخطاء السنوات النهائية في ابتدائي واعدادي + ان توفيق ربنا في ثانوي كان عالي بشكل خرافي ولله الحمد والمنة...مع اني لم ابذل مجهود كبير لكن ربنا وفقني جدا


الفرق بيني وبين اوائل الجمهورية في الدرجات كان يعد على اصابع اليد الواحدة حتى دون جمع درجات المستوى الرفيع


اما الجامعة...ومع ان ناس كثير في العائلة والمحيطين كانت متوقعة لي اني ابقى من الكادر الجامعي ...للأسف نزلت جدا عما هو متوقع.....جبت جيد جدا نعم كتقدير عام كل السنوات تقريبا....لكن لم احقق الامتياز مرة واحدة مع اني كنت بحاول بشدة


اكتشفت بعد ما دخلت الكلية-هندسة- ويمكن اكتر بعد ما تخرجت واشتغلت اني اخترت المجال الخطأ ومعرفتش اكتشف قدراتي الأفضل ودي كانت غلطة كبيرة مني ...اني مش من النوع المبتكر في البحث العلمي


لاني مؤمن ان لكل انسان نقطة تميز...ان وفق في اكتشافها واستغلالها ممكن يكون افضل اهل عصره فيها


صحيح اللي غرني اني كنت شاطر في الرياضة والفيزياء وباحبهم جدا...لكن ما ختش بالي ان مواد زي التاريخ او الأحياء لم تكن تأخذ مني اي مجهود



باحب قوي اناقش الدكاترة من الاصدقاء او الاقارب وباسترجع بسهولة مناهج الأحياء او المعلومات الطبية العامة


زائد- ودي اقوى نقطة - ان شايف مهنة الطب فيها جانب انساني عالي اوي


عشان كده افضل الزواج ان شاء الله في المستقبل من دكتورة ...مش ضروي بس اتمنى هذا




السؤال التاني

ايه اكتر مادة حبيتها واكتر مادة كرهتها فى المدرسه وفى الجامعه

هو انا كنت باذاكر كل حاجة عموما ..... بس كنت با
أفضل الرياضة والفيزياء في المدرسة


مواد زي الفلسفة والمنطق كنت باكره اسمع اسمها...باحس انه واحد عايز يعض قفاه ومصر على كده :) ...كنت شايف علم النفس افيد بكثير


الجغرافيا كنت باحب اقراها ...لكن طريقة تدريسها وامتحاناتها المعتمدة على الحفظ في نظامنا التعليمي المتخلف كانت بتخليني اكرهها

العربي كنت باكرهه في المدرسة...حبيته في الكلية بعد ما بدات اهتم بالقرآن وحسيت اد ايه العربي جميل


الرسم كنت لا احبه بسبب خطأ من المحيطين بي في العائلة وضعوا بيني وبينه حاجزا-عشان كده ياريت محدش يحبط اولاده او اخواته الصغيرين بكلام لا اساس له - وايضا لانه كان اجباري وداخل في المجموع ودي المفروض قدرات مش مادة دراسية...وهو من اسباب تأخر ترتيبي في المرحلة الاعدادية...نظامنا التعليمي المتخلف


في الكلية....مواد بعيدة عن التخصص....
Thermo-dynamics
fluid mechanics
heat transfer
مواد من قسم ميكانيكا


والموجات-waves & antenna

وكنت باكره المجالات
-fileds-
وكنت شايفها زي الفلسفة -كلام هلامي وتخيلي


قبل ما خش الكلية ما كنتش اتخيل ان فيه حاجة ممكن ما افهمهاش او ان فيه غلطة ممكن اكررها


بعد ما خرجت منها اقتنعت ان فيه حاجات لغاية اما اموت عمري ما هأفهمها
(:




السؤال الثالث كنت عايز تطلع وانت صغير


يووووووووه...اتغيرت كثيـــــــــــر


زمان اوي كنت حابب اطلع ضابط جيش مشاة او طيار .......خاصة ان في قريب اوي لي كان ضابط جيش وكنت ومازلت احبه جدا


فيما بعد مهندس او ضابط فنية عسكرية - بعد ما لبست النضارة وفكرة الطيار راحت - وكنت على وشك تقديم اوراقي للكلية الفنية العسكرية لكن رجعت في كلامي - كان من غير استخارة مع الاسف



دخلت كلية الهندسة وكنت حاطط الهندسة الميكانيكية او هندسة الطيران رغبة اولى...بعد اعدادي هندسة حطتهم رغبة اخيرة بسبب الرسم الهندسي ....انا مش كويس في الرسم+ان السكشن بتاعي كان بيشرف عليه دكاترة الله يسامحهم


وطبببعا اشتغلت في مجال تاني خاااالص ....بس ربنا كان معايا برضه....ربنا كريم جدا وقدير جدا


حاليا نفسي ابقى من مستشاري الأمن القومي يوما ان شاء الله.... بس مش ناوي آخد خطوة في المجال ده-بشكل رسمي يعني - الا اما النظام يتغير بنظام اكثر عدالة على الأقل ......مش شرط يكون اسلامي صرف لكن يكون وطني حقيقي وذو مرجعية اسلامية واكثر عدالة وصدقا في النوايا


ويشترك مع نقطة الجانب الانساني وظيفتي ضابط الشرطة او الجيش...لكن كان مستحيل اني كنت اكتسب الجانب ده في كلية الشرطة مثلا خاصة اني كنت مراهق متعب وعنيف فكان اسلوبهم هيغذيني اكثر في هذه الجوانب


عامة...احمد الله سبحانه وتعالى على ما انا فيه وما متبته اعلاه ليس بطرا ولا كفرا بنعمة الله ابدا


فان كان هناك تقصير فانا الذي اتحمل مسؤوليته


فيه اية في القرآن
لَقَدْ خَلَقْنَا الْإِنسَانَ فِي أَحْسَنِ تَقْوِيمٍ * ثُمَّ رَدَدْنَاهُ أَسْفَلَ سَافِلِينَ



الانسان ممكن ينجح في اي حاجة طالما اخلص نيته لله واجتهد فيها ...فان بدل وغير في اي منهما يكون نقصان النعمة شيئا فشيئا...وربنا يثبتنا ويصلح حالنا جميعا



التاج التاني



تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها


زمان..وانا صغير
(:

كانت قراءة رجل المستحيل وملف المستقبل تحديدا


مرحلة متوسطة-المراهقة

قراءة التاريخ وخاصة الاسلامي والحمد لله ربنا حباني بالقراءة السريعة زي الدكتور


حاليا
الكمبيوتر ثم الكمبيوتر ثم الكمبيوتر



معلش دوشتكم وصدعتكم....تقدروا تعتبروها "بعبعة" شخصية زي تدوينة وانا صغير



بما ان معظم اصدقائي مر عليهم التاج فامرره لتلاتة

علا عثمان
اروى الطويل


وبأمرره ككمين للواد عمرو عزت :)...صديقي اللدود واستاذي ... عشان حاسس انه ما بيعديش هنا...اما نشوف
(سمايل مسرور السياف)

وماحدش يقوله
(:
(سمايل مسرور السياف تاني)

Thursday, April 05, 2007

هو مين كبير القعدة ......ولا مؤاخذة

عندي ييجي ستين موضوع عايز اتكلم فيهم..وفيه تاج بعتته لي الأخت أحلام ..ان شاء الله هاجاوب عليه بس الوقت هيخليني أتأخر شوية



ربنا يسهل


موضوعنا بقى



هو مين الكبير هنا بقى ولا مؤاخذة


كان فيه كلمة كان قالها عياش في نقاش كده بعد تعديل المادة 76 العام الماضي وقبل انتخابات الرئاسة انه يخشى من تفرق كلمة القوى السياسية انه مبارك برضه هيظل الرئيس بعد تغيير المادة

وقد كان


ليه..لأن ما فيش كبير واضح الناس تلتف حوله...سواء في مصر او في العالم الاسلامي او العربي

اما انه يكون شخص ممتاز ولكن غير معروف جماهيريا فالناس لا تتحمس من الاساس لانها لا تعرفه فلا ترى فيه النموذج ..او انه معروف جماهيريا لكن فيه عيب كبير ظاهر


اذا استعرضنا الشخصيات الموجودة على الساحة هنلاقي تقريبا في كل شخصية شئ يجعل انه لا احد يجتمع الناس كلهم عليه


وانا هنا مش باتكلم على قيادة مصر بس..ولكن قيادة مصر ومنها لقيادة العالم الاسلامي كله


مهدي عاكف...عصبي قليلا بتخلي الناس تفهم كلامه غلط...الكاريزما مش موجودة عند العامة اوي ...على الرغم من انه قيادي وتنظيمي ممتاز .....المشكلة الأكبر كبر سنه واحنا عايزين واحد أصغر كي يستطيع تحمل المشقة والمناهدة


محمد حبيب...مش هاتكلم عنه حفاظا على حسناتي
باختصار ....بيلين كثير في اوامر ربنا..والخوف ان الموضوع يسيح-على رأي واحد صاحبنا- منه ان تولى هو


خيرت الشاطر..ممتاز وينفع جدا ان شاء الله بس غير معروف جماهيريا...عايز تمهيد قوي وده يمكن اللي اتكلمت عنه في موضوعي عمرو خالد


يوسف ندا.....ممتاز جدا جدا ولكن برضه نقطة انه غير معروف + كبر سنه حاليا

دي شخصيات الاخوان المعروفة .. اتمنى ما اكونش نسيت حد

اكيد فيهم شخصيات كثير اخرى تصلح ...لكن برضه نفس النقطة..غير معروفين فالناس لا تتحمس لانها لا ترى احدا


نيجي للشخصيات خارج الاخوان


عمرو خالد.... كان في فترة من الفترات في الطريق لان يكون...عنده نقطة الجماهيرية...لكن ناس كتير تختلف عليه واظن كان واضح قوي كمية الخلاف في موضوعيه في المدونة....بالاضافة ان الموضوع ده لا يوهب لمجرد الجماهيرية ..الموضوع عايز شغل وجهود وخبرات تكتسب عن طريق النضال الحقيقي

بالاضافة الى انه لا يبدو عنده الرغبة في التحرك في هذا الاتجاه...للأسف ..لكن مجرد عدم الرغبة تجعله-من وجهة نظري - غير صالح - فان كان تواضعا فهو تواضع غير محمود هاهنا.... وان كان خوفا او خشية ...فيبقى غير صالح ...هذا ليس عيبا فيه ولكنها قدرات مؤهلة


دكتور المسيري..... معرفش عنه كثير لكن حواره المصور بالفيديو مع سيد القمني معجبنيش فيه لينه والكلمة اللي قالها في آخر الحلقة .....اتخيل الزعيم مهذب ودمث الخلق لكن صارم وقوي الشخصية يستطيع ان-يشكم-اللي قدامه وقت اللزوم بالحجة اولا وهي الأهم وبقوة العرض والاسلوب ثانيا
زي ما ابوبكر - المعروف بلين-عمل مع عمر بن الخطاب في مناقشة حرب الردة


في موضوع انه "يشكم" اللي قدامه - مثلا كان فيه حوار آخر لعصام سلطان القيادي بحزب الوسط مع واحد من روز اليوسف مش فاكر اسمه في برنامج العاشرة مساء منذ زمن......حاول وقتها بتاع روز اليوسف انه ياخده بالصوت...فكانت وقعته سودة ...صوت عصام سلطان كان جايب آخر الاستديو ...ده بالاضافة طبعا لقوة حجة وثقافة وسعة اطلاع عصام سلطان الدينية والدستورية

النقطة هنا مش نقطة حوار في برنامج...ولكن اتجاه وشخصية
بالاضافة الى ان فيه نقطة وهي عدم رؤيته- دكتور المسيري يعني - او رؤيتهم بشكل عام -هذا النوع - لحتمية تطبيق الشريعة كاملة

وبرضه ارجع واقول غير معروفين فالناس لا تتحمس لانها لا ترى احدا



المشير ابو غزالة-عمرو موسى- الجنزوري.....الصراحة مش فاهم هو فيه ايه وليه انسحب كما قيل قبل ان يبدا حتى في ايام انتخابات الرئاسة....ما ينفعش



عمر سليمان....شكله ينفع اوي اوي بس كونه انه جزء من النظام الحالي يضع حوله ستين دائرة حمرا..ولا اظن انه كجندي-قائد -مخلص انه قد يصطدم بالنظام ده ابدا


طبعا بقية الجماعة - قنديل-جورج اسحاق..الجماعة اليساريين و و و و حتى من قد يسمون انفسهم اسلاميين يساريين....اختلاف ايديوليجي جامد..على اقصى تقدير يقولون القرآن حلو جميل...الرسول صلى الله عليه وسلم كان شخصية عظيمة...يا سلام...يا سلللاااااااااام ...صلي لنا على النبي...صلليلنا كمان مرة على النبي ...زيد النبي صلاة.....حط بقى القرآن على الرف علشان لا يناسب الواقع التاريخي ...وما تناسش تمسحه عشان ما يتتربش


طيب الشخصيات العالمية

اساس فيه تابو خاطئ عند المصريين انه يقعدج وينجعص...وازاة البيرة او سيجارة الحشيش في بقه او الشيشة في بقها ويقول : لا يحكمني غير مصري........يا عيني


يا واد انت يا بتاع المصري ... ايه الحلاوة دي


ده طبعا مخالف للدين اولا.....زي ما مصري ممكن يحكم غير مصريين ...غير مصري ممكن يحكم مصر طالما توفر فيه صفتي التقوى والكفاءة

ثانيا من قال ان المصري هيجيب التايهة....مصر بقالها ستين سنة بتتحكم بمصريين...وفي النازل والحمد لله ...حققت معدلات فشل غير مسبوقة...مفيش منحنى واحد يوحد ربنا في صعود


ثالثا....تاريخيا مصر من بعد ايام الفراعنة عمرها ما اتحكمت بمصريين وكانت ماشية كويس في اوقات كتيرة...صحيح كانت ماشية مش كويس في اوقات تانية بس كان علينا وعلى غيرنا..طب ويا ترى ليه المصريين ما ثاروش وقتها ..كانوا فين


اللي قاد مصر ايام التتار كان خوارزمي.....بالمناسبة هو برضه اللي قتل اقطاي بعد ما استفحل شره وشر رجاله على العامة من المصريين كناو فين المصريين....اللي قاد مصر ايام الصليبيين كان كردي...اللي دخل الاسلام مصر بأمر الله كانوا عرب ..اللي قتل كليبر كان سوري...محمد علي-مع الخلاف عليه - اللي عمل نهضة كبرى في مصر كان الباني...لكن الله لم يصلح عمهل الفاسد وانقلب عليه وعلى مصر فيما بعد


فيعني ممكن يكون مصري وممكن ما يكونش

والنعرة دي بيغذيها برضه اما من يلبسون قميص اقباط مصر من الجماعة العلمانيين أوالملحدين...او الأقباط انفسهم ...وبيتبعهم العامة



تلاقيهم مثلا طالعين يتكلموا انهم لا يقبلون بالمادة التانية...طب انتم شريعتكم ما فهاش حكم ولا نظام دولة ولا شريعة...هي تعاليم انسانية...لكن احنا ديننا فيه بالنص الصريح..عايزنا نغيره عشان خاطركم

ومش بعيد بعد كده يطالبوا بحذف نصوص من القرآن او عدم ذكرها على الاطلاق

يعني هو التحريف اللي انتم متربيين عليه...عايزينا احنا كمان نغير في ديننا ونحرف فيه



نرجع للزعماء
فيه مين .....مييييين.....متهيألي هما حسن نصر الله ونجاد و ومهاتير محمد ..الباقيين اصفار كبيرة على الشمال حتى وان كانت بعض دولهم تعيش في رخاء وافضل مننا


مهاتير محمد..يا ريت...بس سنه

فيه برضه راجل محترم وان كان نصراني لكن وطني الى اقصد حد......اميل لحود



حسن نصر الله ونجاد...دول بعدين


*******************************************************


ايه اللي طلع الموضوع ده في دماغي


كنت بافكر كده...يا ترى دلوقت لو شفت البوليس بيجري ورا حد ...هل هاساعدهم


في الاحوال العادية المفروض...لكن دلوقت ايش ضمني انهم مش ظالمينه


وايش ضمنني انه مثلا حرامي بيسرق للحاجة الشديدة....وللظروف الزفت اللي احنا فيها واللي الدلولة مسؤولة عنها


صحيح اذا شفت الحرامي بيسرق فبان الله هامنعه ويمكن اديله الطريحة...لكن لا اظن اني هاسلمه للشرطة


وايش ضمنني انه مش واحد من المعارضين السياسيين

وايش ضمنني انه مش واحد غلبان ماشي في الشارع في حاله وهما بيفتروا عليه
اما شفت الفيديو اياه بتاع البنتين اللي كانوا شكلهم مش ولا بد وبيضربوا في القسم

يا ترى مين ادى الحق للي بيضربهم انه يعمل كده

هل هو احسن منهم...اشمعنى ...دول اغلبهم- الشرطة - اسوأ خلق ربنا


وفيه منهم اللي بيشرب وبيشم بل وببيزني وبيتربح من وظيفته وبيعذب ناس مالهاش ذنب...فيه وكلنا عارفين وهما عارفين

وماحدش يقول هما الشرعية...لأ..هما مش شرعية...هما حكومة جاية بالقهر وقوة العسكر وتزوير الانتخابات


هل الدولة صلحت كل حاجة ووفرت كل حاجة بحيث انتفت اسباب الانحراف


انا لا ادافع عن الانحراف او ادعو لتركه...لكن باتكلم عن القسوة اللي شفناها وبنشوفها وعن التجاوز في العقوبة


سيدنا علي بن ابي طالب قال في عبدالرحمن بن ملجم الذي قتله ...امر ان لا يضربوه ولا يسبوه والا يهينوه.....وان يطعموه ويحسنوا معاملته.....فان مات-سيدنا علي يعني- فيضربوه ضربه بالسيف كالتي له ومات بسببها.....وان عاش فامره الى سيدنا علي اما يقتص منه او يعفو عنه

ده واحد قتل الخليفة المسلم العادل ابن عم رسول الله ورابع العشرة المبشرين بالجنة



لكن القسوة وتصوير الضرب يكون من مرضى نفسيين ومجرمين حظهم انهم لابسين بدل الشرطة



الإسلام....هو رحمة.......تحميها القوة......ويحكمها العدل


**************************************************


نرجع ونقول ..مين الكبير

نصر الله واحمدي نجاد

برضه ما ينفعش

الايمان بالعقيدة الشيعية لوحده خلل عقلي- وليس حتى خلل فكري- وارى انهم اغبى من النصارى

النصارى ان فكرنا فدينهم جالهم كد+انه يتفق مع ما كان يضل به الشيطان الامم الأخرى...اذا مات الرجل الصالح-عيسى عليه السلام هنا- اتخذوه اله او ندا او قربة للاله


صحيح ذوي العقل والبحث المخلص عن الحق سيكتشفون الحقيقة والأصح


لكن الشيعة عندهم دين ومنهج قوي يؤمنوا به ويخلصوا له...لكن يكرهون المذهب الآخر ويضمرون له...ومشكلتهم كلها في آل البيت وحب آل البيت الذي يدعونه وقليل منهم صادقون مع ان الطرف الآخر لا يكره آل البيت ولاينقص من قدرهم



اتذكر مرة كنت في الروضة النبوية الشريفة وبجانبي اثنان يبدوا انهم كانوا من شيعة العراق.....سمعتهم يقولون...والله حرام اللي بيعملوه الجماعة السعوديين مع رسول الله-كان الحبيب علي الجفري قال قبل كده برضه ده سوء ادب مع رسول الله- انهم يحجزون الناس عن التمسح بالقبر


قام التاني رد عليه وقال...ربنا يفك اسره-على رسول الله يعني


كنت عايز اقوم ارقع زغرودة في الروضة النبوية الشريفة على الفكاكة دي
(:



ومشكلتهم خلافة آل البيت..مع ان رسول الله اصررررررر ان يكون ابا بكر هو امام الصلاة في مرض موته ..حتى عندما حاولت نساؤه ان يكون عمر هو الامام.....غضب عليهم وقال فيما معناه "يأبى الله ورسوله الا ان يكون ابي بكر

وكان مستشاريه ورفقاؤه دائما هما ابي بكر عمر...وعثمان بن عفان اجتمع عليه المسلمون واول من بايعه هو علي بن ابي طالب

ولا ننكر فضل علي رضي الله عنه


الاسلام ليس فيه هرقلية ولا كسروية..الله سبحانه وتعالى لم يرد حتى ان يكون للنبي ولد ذكر على قيد الحياة...وبنته الواحدية التي ماتت بعده ماتت بعد ستة اشهر فقط..افلا نفهم هذه الاشارات الالهية


الخلافة والزعامة والقيادة تكون للافضل والافضل فقط...مع وجود التقوى المناسبة...وليس شرطا ان يكون اتقاهم




ارجع لموضوعي

لكن ان اخدنا بالظاهر من الشيعة...والظاهر من الأمور عموما والله اعلم بما يخفى عنا ........نرى القادة كما نتمنى ان يكونوا ...ونرى عزة الاسلام والايكمان بتأييد ونصر الله كما يجب ان يكون


حسن نصر الله وحرب لبنان...كلام كبير و على اعلى مستوى...تحرك في وقت كان الجميع فيه نياما وفلسطين تضرب بعد عملية عسكرية بحتة للمقاومة انتفت فيها حجج ضرب المدنيين التي ليس لها اساس ايضا....تحرك الشيعة لتخفيف الضغط..كان ممن المفترض ان يتحرك الباقي للدفاع عن لبنان ولو حتى بالقول والمساعدة الرمزية التي كانت لتكون قيمة جدا وقتها ....ولكن تحركت الاسنة لجلد لبنان واستباحة دمها.......ومن قلب ارض محمد صلى الله عليه وسلم


وفي الموقف الأخير- بتاع البحارة- تألق سياسي وعزة اسلام على اعلى ما يكون


لففهم ....وقال لا افراج...وجيب الاعتذار....ولن نسمح بهذا.....خلاهم يعيطوا ويهذوا....ويبربروا لا مؤاخذة


وفي النهاية...هما دول اللي بتعيطوا عشانهم...اذهبوا فانتم الطلقاء...عفونا عنكم...في قمة الموقف


نفذ روح الشريعة كما يجب ان يكون..العبرة ليست بالنصر العسكري وعدد القتلى والأسرى من الجانب الآخر......العبرة بنشر تعاليم الدين والهدف الأسمى لرسالة محمد صلى الله عليه وسلم ...وهو دعوة الناس لديننا وما فيه من رحمة


متهيألي ناس كتير اذا كانت مكانه كانت اعدمتهم بلا تردد....وده يوضح ان لسه بردي علينا اوي وان القادة قادة وبياخدوا وقت طويل في التربية


وامتى ياخد قرار زي ده.........وامتى ياخد القرار التاني بالاعدام




وكرم ظباطه أيضا-على رأي بلال- راجل بيفهم- ولم يعتقلهم او ينقلهم او يشردهم بدعوى الاساءة لدولة صديقة وضرب المصالح العليا وتهديد الأمن القومي الإيراني وضرب السلام الاجتماعي



لكن ...هل يا ترى يعي الغرب هذا الموقف ويصلح من شأنهم...الأغلبية منهم لا أظن ان هذا سيحدث وسيعودوا للعناد والكبر..لون يستمعوا لصوت العقل


سنة الله في ارضه...ولن تجد لسنته تبديلا


لكن اخشى ما اخشاه انه في النهاية لن يصلح الله عملهم-كشيعة-لان الله لا يصلح عمل المفسدين....ولانه لا يمكن ان تقوم نهضة اسلامية على غيرمنهاج النبوة

والأخبار اللي جاية من جوه المجتمع الايراني...كمجتمع وتعاملات والتزام...لا تبشر بخير في المستقبل مع الاسف



هل يا ترى نرى من هو مثله يوما ولكن على العقيدة الصحيحة التي جاء بها محمد صلى الله عليه وسلم

بإذن الله




*******************************************************

نرجع ونقول مين الكبير


لكنا لسه رافعين الراية البيضا


Wednesday, April 04, 2007

نجاد افرج عنهم

أفرج عن الخمستاشر بحار

بعيدا عن نظرية المؤامرة


واني اذا - اذا يعني - كنت مكانه الأغلب مش هاعمل زيه


لكن الـــــــــــقــــــــوي إذا قــــــــــدر عـــــفــــــــــــا


عسى ان يكون فيما فعله ذكرى وموعظة لأولي الألباب من البريطانيين ومن الغرب عموما



POWER OF BELIEF