Friday, May 25, 2007

واحد ...اتنين...الجيش العربي فين

تدوينة تانية في يوم واحد





تزامنت مشاهد من مخيم نهر البارد وصرخات فتاة محجبة بعد اصابتها في قدمها وبكاء سيدة طاعنة في السن


مع مشاهدة لحلقة الأوربت مع عمرو خالد بعد استلامه


جائزة النيويورك تايمز



مش هأتكلم عن ما نقل عنه عن استعداده لمصافحة ليفني وزيرة خارجية اسرائيل..لأني لا أعلم صحة التصريح



لكن لم يعجبني أبدا انبهاره الشديد بالموقف..لا اقول فرحه بالجائزة بشكل شخصي ولا اتهمه بذلك...لكن انبهاره بالموقف الذي وضع فيه والناس الذين كرم معهم



افتكرت الآية..ولله العزة ولرسوله وللمؤمنين


مين دول اللي هو منبهر بيهم..وايه الموقف اللي هو منبهر بيهم ده


ماذا يزنون عند الله


والله مش فلسفة ولا كرسي في الكلوب..... لكن اسلوبه ضايقني



أكيد دعوة الناس لعبادة لله هو اهم ركن في الاسلام-والله أعلم.......لكن يجب ان يكون بجانبه اشياء اخرى



اما نكون مظلومين وبنقتل ...وبتنهب اموالنا في الداخل والخارج...ويعتدى على نسائنا..ولا كرامة لنا في اوطاننا ناهيك عن الخارج...



وبلادنا وناسنا في أسوأ حال في كل النواحي....وارواح شعوبنا لا ثمن لها امام صفقات الكبار ...



متهيألي وقتها فيه حاجات اهم من الجائزة والموقف ده.....وفيه مشاعر مختلفة.....لا نتوقف عن الدعوة...بس ان احسسنا بجد بما يتعرض له الناس من حولنا بغض النظر عن حالنا الشخصي الطيب متهيألي مشاعرنا ستكون مختلفة معهم عن هذا الانبهار


هو فرحان انه جاله الفرصة يسمعوا له


لكن إذا كانت دولنا اقوى لكانوا سمعونا برضه...يمكن احسن من دلوقت حتى...ساعتها لن يكون من باب العطف


ومن باب هييييييييييه...هنقابلهم...وهيسمعونا


الرئيس السادات رحمه الله كان له كلمة....انه يفضل ان يكسب احترام العالم ويفقد تعاطفه...على ان يكسب تعاطف العالم ويفقد احترامه


بنقعد نكرر....متدين ناجح في الحياة...متدين ناجح في الحياة...طيب والحال السئ في بلادنا اللي بيسمح لعدد قليل بالنجاح مع وجود كفاءات كتير


ماذا عمن لا يملكون الفرصة بعد


هل هذه هي عبادة الوقت..وهل هذه هي اقصى الأولويات الآن


اظن عمرو خالد ربنا معطيه الآن ما هو أكثر من دعوة للتعايش...ويستطيع استغلالها في ما هو افضل...


إن اراد


*******************************************


والله وجيش لبنان طلع له كرامة


لا والله وطلعوا رجالة أهو ...كنت فاكر ان لبنان مافهاش غير حسن نصر الله ورجاله .....والحريم بتوع الفضائيات


لأ وبيقصفوا النساء والأطفال في المخيمات...يعني عندهم جوي



كان فين الجوي ده من سنة


ما هو الفلسطينيين هما الحيطة المايلة


ولا بز - لابد – من نزع سلاح المخيمات...والدفاع عن سيادة لبنان


السيادة اللي اتمرمطت السنة اللي فاتت


كانوا فين واسرائيل بتـ...لبنان الصيف اللي فات


دلوقت الأولوية لسيادة لبنان.....واراقة الدم العربي لازمة الآن ومش مشكلة


لكن اما حماس تقتل كلاب وعملاء فتح يبقى حماس متصارعين على السلطة وانتهازيين وبراجماتيين ودعاة فتنة


وهنية راجل محترم بيقوم بمسؤولياته وهو منتخب من شعبه


صحيح انه لا حول له ولاقوة بس بيحاول يدافع عن مواطنيه اللي برة.....ولو بلسانه



مش زي واحد صاحبنا كل ما يتمرمط ناس من بتوعه- المفروض يعني انهم بتوعه- يتكلم عن العلاقات الأخوية التي لن تهتز بسبب حوادث فردية - يومية


هو ده اللي جيوشنا فالحة فيه.......أسد علي وعلى الأعداء...خـ......


يا ترى الجيش ده ماغضبش كده ليه من حكومته التي لم تسلحه في الحرب الماضية


كان فين صاحب العمة الكبيرة مفني لبنان اللي دلقوت بيتكلم عن مصلحة الدولة


مش فيه اية في القرآن..واعدوا لهم ما استطعتم من قوة


وبيتكلم عن المحكمة الدولية...كانها منزلة من رب العالمين


يا خي عيب على عمتك


انا مش بتريق على لبنان واللبنانيين....الجيش المصري لن يكون احسن حالا


وامن الدولة الرهيب والمخابرات لا اظن انهم هيكونوا احسن حالا اما يحصل اعتداء خارجي


هما بس بيتشطروا علينا



وقت الجد الموضوع محتاج رجالة


واحنا مافيش رجالة عندنا في الجيوش....مافيش



ياخي أ.....


********************************************************************************







********************************************************************************


وتاني








وبالمرة........يا جمال قول لأبوك......الشباب بيكرهوك

11 comments:

belal said...

جميل دايما والله



..
يجعله عامر

أمــانــى said...

اولا ربنا يرحمنا ويرحمه ويصلح حاله وحالنا وحال المسلمين جميعا يااااااارب آمـــــــين

نيجى بقى للبنان وحماس اصل احنا العرب والمسلمين شاطريين قوى فى تقطيع بعضنا البعض ونغرق فى الدم للركب بس مع بعض اما بقى مع الناس التانية كلنا نبقى جبناء
لا اعرف لماذا تتهاون العرب و المسلمين فى قضية فلسطين والعراق لانهم امر مفروغ منه وانهم لازم يعيشوا كده طول عمره
انا من رايى قبل نزع سلاح المخيمات لابد من فتح ملف حق العودة ده اهم الملفات ورفع الحصار
والجيش اللبنانى مش عارفهم بالظبط ايه لو حضرتك عرفت بالله عليك يبقى قولى
كبر الخط واديك شلن

Alaa said...

اول زيارة لمدونتك
ما شاء الله
ربنا يباركلك
مجهود طيب و تستحق الزيارة بجد
:)

Anonymous said...

بلال وعلاء

جزاكم الله خيرا كثيرا


اماني

العرب بيتهاوناو في قضايا كتير...لكن ما بين بعضهم تقطيع للركب


ربنا ياخدهم كلهم..ال24 جثة..ما عدا اميل لحود ..والبشير

أمــانــى said...

على فكره فى تاج لحضرتك ياريت حضرتك تعمله ياما فى عريضة دعوى هتوصل بكره على باب المدونة هتلاقيها
وبخصوص الخط
حضرتك اختار
Compose
بدلا من
Html
وحضرتك هتلاقى امكانية التحكم فى الخط وكمان الالوان
تحياتى لحضرتك

Anonymous said...

لسه شايفه والله
(:

مع اني بخش عند حصرتك كل يوم او يوم بعد يوم...فيه مشكلة في جهازي

Anonymous said...

متفق تماما معاك بالنسبة للى قلتة
ربنا يوفقك

Anonymous said...

وربنا يوفقك يا اخ اسلام...ويهدينا جميعا...ويصلح خطأنا جميعا ان أخطانا

جزاك الله خيرا

ياسر سليم said...

نتشرف بدعوة سيادتكم والأسرة الكريمة لحضور إفتتاح المدونة الصاعدة بإذن الله .. كلماتى .. والعاقبة عندكم فى المسرات ..
حضروكم يسرنا ..
ودخانكم يضرنا ..

مـحـمـد مـفـيـد said...

يمكن اول مره ادخل هنا وأكيد هتلاقيني كتير لانها مدونه رائعه

أبو عمر - الصارم الحاسم said...

ياسر سليم

دعوة مقبولة...جزاك الله خيرا


محمد مفيد هنا..يا مرحب يا مرحب
(:


نورتني والله


الى لقاءات ان شاء الله

تحياتي
(: