Thursday, April 05, 2007

هو مين كبير القعدة ......ولا مؤاخذة

عندي ييجي ستين موضوع عايز اتكلم فيهم..وفيه تاج بعتته لي الأخت أحلام ..ان شاء الله هاجاوب عليه بس الوقت هيخليني أتأخر شوية



ربنا يسهل


موضوعنا بقى



هو مين الكبير هنا بقى ولا مؤاخذة


كان فيه كلمة كان قالها عياش في نقاش كده بعد تعديل المادة 76 العام الماضي وقبل انتخابات الرئاسة انه يخشى من تفرق كلمة القوى السياسية انه مبارك برضه هيظل الرئيس بعد تغيير المادة

وقد كان


ليه..لأن ما فيش كبير واضح الناس تلتف حوله...سواء في مصر او في العالم الاسلامي او العربي

اما انه يكون شخص ممتاز ولكن غير معروف جماهيريا فالناس لا تتحمس من الاساس لانها لا تعرفه فلا ترى فيه النموذج ..او انه معروف جماهيريا لكن فيه عيب كبير ظاهر


اذا استعرضنا الشخصيات الموجودة على الساحة هنلاقي تقريبا في كل شخصية شئ يجعل انه لا احد يجتمع الناس كلهم عليه


وانا هنا مش باتكلم على قيادة مصر بس..ولكن قيادة مصر ومنها لقيادة العالم الاسلامي كله


مهدي عاكف...عصبي قليلا بتخلي الناس تفهم كلامه غلط...الكاريزما مش موجودة عند العامة اوي ...على الرغم من انه قيادي وتنظيمي ممتاز .....المشكلة الأكبر كبر سنه واحنا عايزين واحد أصغر كي يستطيع تحمل المشقة والمناهدة


محمد حبيب...مش هاتكلم عنه حفاظا على حسناتي
باختصار ....بيلين كثير في اوامر ربنا..والخوف ان الموضوع يسيح-على رأي واحد صاحبنا- منه ان تولى هو


خيرت الشاطر..ممتاز وينفع جدا ان شاء الله بس غير معروف جماهيريا...عايز تمهيد قوي وده يمكن اللي اتكلمت عنه في موضوعي عمرو خالد


يوسف ندا.....ممتاز جدا جدا ولكن برضه نقطة انه غير معروف + كبر سنه حاليا

دي شخصيات الاخوان المعروفة .. اتمنى ما اكونش نسيت حد

اكيد فيهم شخصيات كثير اخرى تصلح ...لكن برضه نفس النقطة..غير معروفين فالناس لا تتحمس لانها لا ترى احدا


نيجي للشخصيات خارج الاخوان


عمرو خالد.... كان في فترة من الفترات في الطريق لان يكون...عنده نقطة الجماهيرية...لكن ناس كتير تختلف عليه واظن كان واضح قوي كمية الخلاف في موضوعيه في المدونة....بالاضافة ان الموضوع ده لا يوهب لمجرد الجماهيرية ..الموضوع عايز شغل وجهود وخبرات تكتسب عن طريق النضال الحقيقي

بالاضافة الى انه لا يبدو عنده الرغبة في التحرك في هذا الاتجاه...للأسف ..لكن مجرد عدم الرغبة تجعله-من وجهة نظري - غير صالح - فان كان تواضعا فهو تواضع غير محمود هاهنا.... وان كان خوفا او خشية ...فيبقى غير صالح ...هذا ليس عيبا فيه ولكنها قدرات مؤهلة


دكتور المسيري..... معرفش عنه كثير لكن حواره المصور بالفيديو مع سيد القمني معجبنيش فيه لينه والكلمة اللي قالها في آخر الحلقة .....اتخيل الزعيم مهذب ودمث الخلق لكن صارم وقوي الشخصية يستطيع ان-يشكم-اللي قدامه وقت اللزوم بالحجة اولا وهي الأهم وبقوة العرض والاسلوب ثانيا
زي ما ابوبكر - المعروف بلين-عمل مع عمر بن الخطاب في مناقشة حرب الردة


في موضوع انه "يشكم" اللي قدامه - مثلا كان فيه حوار آخر لعصام سلطان القيادي بحزب الوسط مع واحد من روز اليوسف مش فاكر اسمه في برنامج العاشرة مساء منذ زمن......حاول وقتها بتاع روز اليوسف انه ياخده بالصوت...فكانت وقعته سودة ...صوت عصام سلطان كان جايب آخر الاستديو ...ده بالاضافة طبعا لقوة حجة وثقافة وسعة اطلاع عصام سلطان الدينية والدستورية

النقطة هنا مش نقطة حوار في برنامج...ولكن اتجاه وشخصية
بالاضافة الى ان فيه نقطة وهي عدم رؤيته- دكتور المسيري يعني - او رؤيتهم بشكل عام -هذا النوع - لحتمية تطبيق الشريعة كاملة

وبرضه ارجع واقول غير معروفين فالناس لا تتحمس لانها لا ترى احدا



المشير ابو غزالة-عمرو موسى- الجنزوري.....الصراحة مش فاهم هو فيه ايه وليه انسحب كما قيل قبل ان يبدا حتى في ايام انتخابات الرئاسة....ما ينفعش



عمر سليمان....شكله ينفع اوي اوي بس كونه انه جزء من النظام الحالي يضع حوله ستين دائرة حمرا..ولا اظن انه كجندي-قائد -مخلص انه قد يصطدم بالنظام ده ابدا


طبعا بقية الجماعة - قنديل-جورج اسحاق..الجماعة اليساريين و و و و حتى من قد يسمون انفسهم اسلاميين يساريين....اختلاف ايديوليجي جامد..على اقصى تقدير يقولون القرآن حلو جميل...الرسول صلى الله عليه وسلم كان شخصية عظيمة...يا سلام...يا سلللاااااااااام ...صلي لنا على النبي...صلليلنا كمان مرة على النبي ...زيد النبي صلاة.....حط بقى القرآن على الرف علشان لا يناسب الواقع التاريخي ...وما تناسش تمسحه عشان ما يتتربش


طيب الشخصيات العالمية

اساس فيه تابو خاطئ عند المصريين انه يقعدج وينجعص...وازاة البيرة او سيجارة الحشيش في بقه او الشيشة في بقها ويقول : لا يحكمني غير مصري........يا عيني


يا واد انت يا بتاع المصري ... ايه الحلاوة دي


ده طبعا مخالف للدين اولا.....زي ما مصري ممكن يحكم غير مصريين ...غير مصري ممكن يحكم مصر طالما توفر فيه صفتي التقوى والكفاءة

ثانيا من قال ان المصري هيجيب التايهة....مصر بقالها ستين سنة بتتحكم بمصريين...وفي النازل والحمد لله ...حققت معدلات فشل غير مسبوقة...مفيش منحنى واحد يوحد ربنا في صعود


ثالثا....تاريخيا مصر من بعد ايام الفراعنة عمرها ما اتحكمت بمصريين وكانت ماشية كويس في اوقات كتيرة...صحيح كانت ماشية مش كويس في اوقات تانية بس كان علينا وعلى غيرنا..طب ويا ترى ليه المصريين ما ثاروش وقتها ..كانوا فين


اللي قاد مصر ايام التتار كان خوارزمي.....بالمناسبة هو برضه اللي قتل اقطاي بعد ما استفحل شره وشر رجاله على العامة من المصريين كناو فين المصريين....اللي قاد مصر ايام الصليبيين كان كردي...اللي دخل الاسلام مصر بأمر الله كانوا عرب ..اللي قتل كليبر كان سوري...محمد علي-مع الخلاف عليه - اللي عمل نهضة كبرى في مصر كان الباني...لكن الله لم يصلح عمهل الفاسد وانقلب عليه وعلى مصر فيما بعد


فيعني ممكن يكون مصري وممكن ما يكونش

والنعرة دي بيغذيها برضه اما من يلبسون قميص اقباط مصر من الجماعة العلمانيين أوالملحدين...او الأقباط انفسهم ...وبيتبعهم العامة



تلاقيهم مثلا طالعين يتكلموا انهم لا يقبلون بالمادة التانية...طب انتم شريعتكم ما فهاش حكم ولا نظام دولة ولا شريعة...هي تعاليم انسانية...لكن احنا ديننا فيه بالنص الصريح..عايزنا نغيره عشان خاطركم

ومش بعيد بعد كده يطالبوا بحذف نصوص من القرآن او عدم ذكرها على الاطلاق

يعني هو التحريف اللي انتم متربيين عليه...عايزينا احنا كمان نغير في ديننا ونحرف فيه



نرجع للزعماء
فيه مين .....مييييين.....متهيألي هما حسن نصر الله ونجاد و ومهاتير محمد ..الباقيين اصفار كبيرة على الشمال حتى وان كانت بعض دولهم تعيش في رخاء وافضل مننا


مهاتير محمد..يا ريت...بس سنه

فيه برضه راجل محترم وان كان نصراني لكن وطني الى اقصد حد......اميل لحود



حسن نصر الله ونجاد...دول بعدين


*******************************************************


ايه اللي طلع الموضوع ده في دماغي


كنت بافكر كده...يا ترى دلوقت لو شفت البوليس بيجري ورا حد ...هل هاساعدهم


في الاحوال العادية المفروض...لكن دلوقت ايش ضمني انهم مش ظالمينه


وايش ضمنني انه مثلا حرامي بيسرق للحاجة الشديدة....وللظروف الزفت اللي احنا فيها واللي الدلولة مسؤولة عنها


صحيح اذا شفت الحرامي بيسرق فبان الله هامنعه ويمكن اديله الطريحة...لكن لا اظن اني هاسلمه للشرطة


وايش ضمنني انه مش واحد من المعارضين السياسيين

وايش ضمنني انه مش واحد غلبان ماشي في الشارع في حاله وهما بيفتروا عليه
اما شفت الفيديو اياه بتاع البنتين اللي كانوا شكلهم مش ولا بد وبيضربوا في القسم

يا ترى مين ادى الحق للي بيضربهم انه يعمل كده

هل هو احسن منهم...اشمعنى ...دول اغلبهم- الشرطة - اسوأ خلق ربنا


وفيه منهم اللي بيشرب وبيشم بل وببيزني وبيتربح من وظيفته وبيعذب ناس مالهاش ذنب...فيه وكلنا عارفين وهما عارفين

وماحدش يقول هما الشرعية...لأ..هما مش شرعية...هما حكومة جاية بالقهر وقوة العسكر وتزوير الانتخابات


هل الدولة صلحت كل حاجة ووفرت كل حاجة بحيث انتفت اسباب الانحراف


انا لا ادافع عن الانحراف او ادعو لتركه...لكن باتكلم عن القسوة اللي شفناها وبنشوفها وعن التجاوز في العقوبة


سيدنا علي بن ابي طالب قال في عبدالرحمن بن ملجم الذي قتله ...امر ان لا يضربوه ولا يسبوه والا يهينوه.....وان يطعموه ويحسنوا معاملته.....فان مات-سيدنا علي يعني- فيضربوه ضربه بالسيف كالتي له ومات بسببها.....وان عاش فامره الى سيدنا علي اما يقتص منه او يعفو عنه

ده واحد قتل الخليفة المسلم العادل ابن عم رسول الله ورابع العشرة المبشرين بالجنة



لكن القسوة وتصوير الضرب يكون من مرضى نفسيين ومجرمين حظهم انهم لابسين بدل الشرطة



الإسلام....هو رحمة.......تحميها القوة......ويحكمها العدل


**************************************************


نرجع ونقول ..مين الكبير

نصر الله واحمدي نجاد

برضه ما ينفعش

الايمان بالعقيدة الشيعية لوحده خلل عقلي- وليس حتى خلل فكري- وارى انهم اغبى من النصارى

النصارى ان فكرنا فدينهم جالهم كد+انه يتفق مع ما كان يضل به الشيطان الامم الأخرى...اذا مات الرجل الصالح-عيسى عليه السلام هنا- اتخذوه اله او ندا او قربة للاله


صحيح ذوي العقل والبحث المخلص عن الحق سيكتشفون الحقيقة والأصح


لكن الشيعة عندهم دين ومنهج قوي يؤمنوا به ويخلصوا له...لكن يكرهون المذهب الآخر ويضمرون له...ومشكلتهم كلها في آل البيت وحب آل البيت الذي يدعونه وقليل منهم صادقون مع ان الطرف الآخر لا يكره آل البيت ولاينقص من قدرهم



اتذكر مرة كنت في الروضة النبوية الشريفة وبجانبي اثنان يبدوا انهم كانوا من شيعة العراق.....سمعتهم يقولون...والله حرام اللي بيعملوه الجماعة السعوديين مع رسول الله-كان الحبيب علي الجفري قال قبل كده برضه ده سوء ادب مع رسول الله- انهم يحجزون الناس عن التمسح بالقبر


قام التاني رد عليه وقال...ربنا يفك اسره-على رسول الله يعني


كنت عايز اقوم ارقع زغرودة في الروضة النبوية الشريفة على الفكاكة دي
(:



ومشكلتهم خلافة آل البيت..مع ان رسول الله اصررررررر ان يكون ابا بكر هو امام الصلاة في مرض موته ..حتى عندما حاولت نساؤه ان يكون عمر هو الامام.....غضب عليهم وقال فيما معناه "يأبى الله ورسوله الا ان يكون ابي بكر

وكان مستشاريه ورفقاؤه دائما هما ابي بكر عمر...وعثمان بن عفان اجتمع عليه المسلمون واول من بايعه هو علي بن ابي طالب

ولا ننكر فضل علي رضي الله عنه


الاسلام ليس فيه هرقلية ولا كسروية..الله سبحانه وتعالى لم يرد حتى ان يكون للنبي ولد ذكر على قيد الحياة...وبنته الواحدية التي ماتت بعده ماتت بعد ستة اشهر فقط..افلا نفهم هذه الاشارات الالهية


الخلافة والزعامة والقيادة تكون للافضل والافضل فقط...مع وجود التقوى المناسبة...وليس شرطا ان يكون اتقاهم




ارجع لموضوعي

لكن ان اخدنا بالظاهر من الشيعة...والظاهر من الأمور عموما والله اعلم بما يخفى عنا ........نرى القادة كما نتمنى ان يكونوا ...ونرى عزة الاسلام والايكمان بتأييد ونصر الله كما يجب ان يكون


حسن نصر الله وحرب لبنان...كلام كبير و على اعلى مستوى...تحرك في وقت كان الجميع فيه نياما وفلسطين تضرب بعد عملية عسكرية بحتة للمقاومة انتفت فيها حجج ضرب المدنيين التي ليس لها اساس ايضا....تحرك الشيعة لتخفيف الضغط..كان ممن المفترض ان يتحرك الباقي للدفاع عن لبنان ولو حتى بالقول والمساعدة الرمزية التي كانت لتكون قيمة جدا وقتها ....ولكن تحركت الاسنة لجلد لبنان واستباحة دمها.......ومن قلب ارض محمد صلى الله عليه وسلم


وفي الموقف الأخير- بتاع البحارة- تألق سياسي وعزة اسلام على اعلى ما يكون


لففهم ....وقال لا افراج...وجيب الاعتذار....ولن نسمح بهذا.....خلاهم يعيطوا ويهذوا....ويبربروا لا مؤاخذة


وفي النهاية...هما دول اللي بتعيطوا عشانهم...اذهبوا فانتم الطلقاء...عفونا عنكم...في قمة الموقف


نفذ روح الشريعة كما يجب ان يكون..العبرة ليست بالنصر العسكري وعدد القتلى والأسرى من الجانب الآخر......العبرة بنشر تعاليم الدين والهدف الأسمى لرسالة محمد صلى الله عليه وسلم ...وهو دعوة الناس لديننا وما فيه من رحمة


متهيألي ناس كتير اذا كانت مكانه كانت اعدمتهم بلا تردد....وده يوضح ان لسه بردي علينا اوي وان القادة قادة وبياخدوا وقت طويل في التربية


وامتى ياخد قرار زي ده.........وامتى ياخد القرار التاني بالاعدام




وكرم ظباطه أيضا-على رأي بلال- راجل بيفهم- ولم يعتقلهم او ينقلهم او يشردهم بدعوى الاساءة لدولة صديقة وضرب المصالح العليا وتهديد الأمن القومي الإيراني وضرب السلام الاجتماعي



لكن ...هل يا ترى يعي الغرب هذا الموقف ويصلح من شأنهم...الأغلبية منهم لا أظن ان هذا سيحدث وسيعودوا للعناد والكبر..لون يستمعوا لصوت العقل


سنة الله في ارضه...ولن تجد لسنته تبديلا


لكن اخشى ما اخشاه انه في النهاية لن يصلح الله عملهم-كشيعة-لان الله لا يصلح عمل المفسدين....ولانه لا يمكن ان تقوم نهضة اسلامية على غيرمنهاج النبوة

والأخبار اللي جاية من جوه المجتمع الايراني...كمجتمع وتعاملات والتزام...لا تبشر بخير في المستقبل مع الاسف



هل يا ترى نرى من هو مثله يوما ولكن على العقيدة الصحيحة التي جاء بها محمد صلى الله عليه وسلم

بإذن الله




*******************************************************

نرجع ونقول مين الكبير


لكنا لسه رافعين الراية البيضا


11 comments:

محمود سعيد said...

العنوان غير الموضوع
يالا مش مشكلة

على فكرة الموجودين الصالحين كثر جداً

بس النظام مش مدى فرصة لأى حد يظهر
يعنى لما خاف من عصام العريان
إعتقله
(وإحنا عارفين إستفتاء الجزيرة عليه)

بس أظن أن مصر مش عاوزة العقلية القديمة بتاعة القائد ديه دلوقتى خالص

مع أنها أسهل الحلول

أبو عمر - الصارم الحاسم said...

تصدق بالله...كنت داخل اغير العنوان ولقيت تعليقك

القلوب عند بعضها
(:



اكيد الموجود الصالح كثير...اللي حازز في نفساويتي ان وقت ما عوزنا واحد فيه كل الصفات بما فيها الشعبية ....مالقيناش


وقد يكون انه كان خارج عن ارادتنا برضه


اللي بيحصل حاليا ووالله مش كلام كبير...ملحمة حقيقية


احنا في اسوا حال وامفيش متنفس..اوما يبقى فيه بيتسد


ادي كل واحد بيحاول في ناحية وربنا يسهل للجميع


تحياتي

ma 3lina said...

الررررررررررررررحمة .. دا احنا غلابة
يعني أقول لك إيه يا صارم دلوقتي .. مش عارف ؟؟

الحكاية مش حكاية البوست طويل .. لأني كده كده حقراه إن شاء الله للآخر .. بس الحكاية المواضيع كتيرة ..

قسم البوست على مرتين .. على تلاتة .. طيب اعلق على إيه ولا إيه أنا دلوقتي ؟؟ .. اكلم على اللي اتفق معاك فيه ولا اللي اختلف .. أجاوب على الأسئلة ولا أوصف الغنيوة

طيب افتح لي مدونتك أحط 4 بوستات كتعليق بس على البوست بتاعك ده ..

طيب أنا عايز اقول رأيي دلوقتي .. أقوله إزاي ... ؟؟؟؟

أقول لك .. أنا مروح .. ومش حقول لك مين كبير القعدة .. سلااااااام

Anonymous said...

والله صدقني انا ما صدقت اقعد وعندي بال رايق واكتب ...فقمت بخييييييييييييييييييت زي ما انت شوفت



حاضر يا باشا....تؤمر


هأفرمل اسبوع كامل ان شاء الله ومش هانزل حاجة لغاية اما تقولي كل كومنتاتك على البوست...واخدة واخدة


ومستنيك وفعلا مش هانزل حاجة غير اما تعلق


احبك في الله
:)

ma 3lina said...

أحبك الله الذي أحببتني فيه .. وأنا كذلك أحبك في الله .. لكن اسبوع كتير قوي .. خليهم يومين بس

شوف بقى يا سيدي

هو مين الكبير هنا بقى ولا مؤاخذة

عاجبني طرحك لفكرة القائد اللي حيلم الناس حواليه .. بس فيه حاجة
ليه ما تكونش أنت الشخص دا .. او أنا .. أو أول واحد علق عندك .. أيوا محمود سعيد اللي بيسمع تامر ومش عايز حد يناقشه وبرغم كده لسه أملي فيه كبير جداً .. وح استناه .. هو واللي زيه .. بس وأنا مستنيه لازم ما علقش أملي عليه لوحده لازم أدور ع البدايل ..

وبعدين يا صارم شكله إيه القائد ده .. قصدي من الصفوة .. دكتور في الجامعة ولا رجل أعمال .. ولا من الحرافيش زي أدهم الشرقاوي وعلي الزيبق ..

الناس اللي قلت عليهم هما الصفوة .. والناس بتنبهر بالصفوة لكن مش بتلف حواليهم بقلبها .. لكن بطل الحرافيش هو دا اللي ناس تموت عشانه ..

فكرتك حوالين عودة عمرو خالد ممكن تتعدل شوية .. يعني ليه ما نخليهاش .. كل رجال الدعوة اللي سابوا البلد يرجعوا وياخدوا أماكنهم وسط الناس .. ابتداء بيوسف القرضاوي ووجدي غنيم وعمرو خالد .. كلهم بيفكروا إن كده أحسن لصالح الدعوة والإسلام وإنهم بيفيدوا الناس أكتر بمحاضرتهم وندواتهم اللي اتوفر لها جو الحرية بره واللي مش كانت موجودة في مصر
مع إن محاضرتهم وندواتهم ودروسهم مش هي اللي حتحرك الناس .. لازم يرجعوا ويقدموا النماذج والصور والتطبيق العملي للكلام .. هو دا اللي حيحرك الناس
كلهم يرجعوا
كلهم .. كلهم .. كلهم
لازم يرجعوا لمصر

ma 3lina said...

ذكرت في بوستك موضوع المادة التانية من الدستور ..
أنا نفسي بجد يشيلوها .. وبرفع صوتي للسادة المسئولين أرجوكم شيلوا المادي دي .. مش عايزها

ولو حيشيلوها وعايزني أروح ابصم بالعشرة .. أروح ..

ياااااااارب يشيلوها ..

المادة دي بقت عاملة زي السيف فوق الرقبة والشوكة في الزور .. كل ماحد يقول كلمة يقولوا عايزين نشيلها .. لو ما سمعتش الكلام يا ولد مش حفرجك ع التلفزيون ...

يافرحتي بمادة في الدستور ولا بتتطبق ولا بتتعمل وكل اللي مسبباه لخبطة للناس .. وكل ما حد يتكلم يقول لك دي دولة إسلامية ..
طيب بأمارة إيه ؟؟
يقول لك بأمارة المادة التانية من الدستور ..

يشيلوها لو رجالة .. المادة دي هي اللي بتحمي مراكزهم من تأويلات جماعات السلاح بكفر الحكام .. يعني مصلحتهم أولا .. ولو رجالة يشيلوها ..

ma 3lina said...

موضوع نجاد ..
متهيألي دا مش عزة دين اللي دفعته للقيام بأفعاله ومواجهته لأمريكا .. لأن معروف إن دين الشعية يقر بالتقية في غيبة الإمام .. ومش معقول يكونوا من أركان دينهم التقية وفي نفس الوقت يقفوا الموقف القوي دا أمام أكبر قوة في العالم ..

قصدي إن الوقفة مش نابعة من الدين
دي وقفة نابعة من القومية الفارسية .. نعرة إيرانية تدعو لعودة حضارة فارس من جديد ..

يمكن تكون مش مقتنع ..

بس أقول لك بص على الأصوات المطالبة بقوميات منفصلة عن الإسلام .. بدأت بمشروع القومية العربية وبعد كده اتخصصت أكتر وكل مجموعة دولة طالبت بمشروع خاص بها .. دول الخليج في مجلس التعاون والمغرب العربي حتى في مصر سمعنا أصوات تطالب بعودة مصر لحضارتها الفرعونية .. ثم .. المشاريع االأصغر كمطالبة الأقليات العرقية بحقوقها .. النوبة والبدو والأفارقة والبربر والأكراد ..

كلها أقليات ..

إيران لا تغرد خارج السرب .. وليست ملاك .. القومية الفارسية تبحث لها عن مخرج أيضاً .. وخرجت على ظهر التشيع على المذهب الإمامية ..

يعني ما ينفعش نقول إن أفعال إيران تعبر عن عزة الاسلام والايمان بتأييد ونصر الله كما يجب ان يكون
ولكن أظن أنها تعبر عن عزة فارس ومجد فارس ونصر فارس كما يجب ان يكون

ma 3lina said...

آخر حاجة والكومينت رقم خمسة على نفس البوست في سابقة تعد الأولى في عالم التدوين
;)
الفيدو المرفق رائع يا صديقي

بث خلاث أنا خلثت

سلااااااااام

الديب said...

طيب .. ماقولتش مين كبير القعدة من وجهة نظرك ؟؟

Anonymous said...

ما علينا

مش بقول ما علينا لكن بقول هاتكلم مع ما علينا يعني
(:


طالما مش عايز يقولي اسم حركي حتى...ابو عمر...ابو جهاد...هيثم...تامر...اي حاجة
:)


ما علينا


ليه ما يكونش القائد انا او انت او محمود او اي حد...ومين قال لا...ومين قال آه برضه


قد يكون...ايا من سيكون تسأل الله له التفويق جميعا...بس باتكلم بس على اليومين دول والمتاح فيهم


من اي طائفة...المهم ان يكون عالما بما يجب ان يفعله وكفئا وذو تقوى قبل كل شئ

ليه رجال الدعوة ما يرجعوش...يا ريت يرجعوا بس احيلك على تدوينة "لماذا



المادة التاينة...زمان قبل الدستور ما يتعدل كانت المادة التانية الحاجز امام مصائب كثير صدقني...انقاذ ما يمكن انقاذه عشان الامور ما تخربش اكتر ما هي خربانة...الغائها هيفتح الباب ادام حاجات كثير...والأام بيننا


لكن الحكومة الغتها فعليا وليس نصيا الآن...عشان ان كانت عملت ده ...كنت ساعتها هتلاقي الفالحين في الحقول بيتكلموا عن الحكومة الكافرة اللي بتلغي الاسلام...كان ده اللي هيتقال ساعتها...يبقى كان لازم التعديلات تمر...من غير ما العامة يصحوا



اختلف معاك في موضوع نجدا تماااااااااااما


صحيح هو مش البطل المنتظر...ومشكوك في نواياه


لكن نعرة مجد فارس اذا لاحظت فهي طلعت من علماء سلاطين الجزيرة وبتغذية امريكية......لا فض فوهم...لم يتكلموا عن غزو لبنان او العراق او دخول القوات الصليبية جزيرة محمد صلى الله عليه وسلم او ضرب ابرياء لبنان والدعوة للجهاد...لكن تكلموا عن ايران ومجد فارس والشيعة


نصيحة ليك ان بقيت يوما كبير القعدة
(:
ان تتعامل مع ايران في مرتبة اعلى من ان تكون دولة كافرة حليفة ومهادنة ولكن اقل من ان تكون دولة مسلمة على منهاج النبي صلى الله عليه وسلم

Anonymous said...

ديبوس


ما فيش كبير لغاية دلوقتي

تابع الجزء التاني