كي-جي-وان إضراب

عندي اكتر من ست الاف كلمة عايزة اقولهم بس مليش نفس اكتب


احنا فعلا نستاهل ضرب الجزم

نستاهل ان مبارك الواطي الحقير وعصابته الوسخة يركبوا على قفانا

حقارته اللي ظهرت واضحة اكتر ما هي واضحة .....معندوش اي مانع يحرق مدينة زي المحلة بأهلها......وعشر مدن زي المحلة....ويعتقل شباب وبنات......بل وامهات يدافعن عن الحق وعن الآداب العامة .....في سبيل انه يفضل قاعد

وبكل بجاحة يتكلم عن القنوات الشرعية....القنوات الشرعية اللي خير دليل عليها انتخابات غدا

مش هأقول الاسطوانة اياها بتاعة شعب سلبي وهي حقيقة وان كانت والحمد لله بدأت تتغير


لكن مستحيل نجتمع على شئ ضد الحكومة

عارفين....عندي احساس ان حتى لو فتحوا باب الانتخابات الرئاسية على مصراعيه....لن نتفق على شخص وكله هيقعد يفتي ومبارك هيكسب


انا مبقوق قوي من اللي قالوا اضراب وماحدش عزمنا

هو عيد ميلاد
!!!


ما يقولوا مش متبنيينه بس بندعو انصارنا للاشتراك بما يرونه صحيح ومناسب...يسيبولهم حرية الاختيار ...حاجة كده زي اللي حصلت ايام انتخابات الرئاسة
!!!


يعرفوا الناس بخطوات الاضراب...يفكر مبدعيهم ومفكريهم في التدريج وتعليم الناس خطوة خطوة

مش ضروري تنسب لهم رسميا....مجهودات فردية مع الصمت الرسمي

يمكن خافوا ان تلصق بهم تهم التخريب

لكن مش بالطريقة دي


فليقل خيرا او ليصمت


لكن مش مشاركين عشان ما حدش دعانا



وتيارات تانية اسلامية برضه تانية ترجع لنغمة : هو كله على الحكومة


آه كله على الحكومة


الحكومة اللي بتحارب اي تغيير سلمي


الحكومة التي تهدم اتجاهاتها وافعالها اي فعل اصلاحي


الحكومة اللي بتقفل مصانع وشركات اي شخص نضيف طالما ماقدمش فروض الطاعة والولاء......او لو لم يكن نصرانيا خايفين لا يتم اتهامهم بالاضطهاد


الحكومة اللي طردت او وقفت المصلحين والدعاة حتى من لم يمس السياسة منهم


الحكومة اللي بتملك الآليات كلها ....الجيش والشرطة والاعلام والتعليم والاراضي والمواني والاقتصاد - الغاز اللي بيقولوا بنوده سرية


اصل احنا ولاد كــــــ.......ندفع الضرائب زي الجزم ...جباية .....الاكل عليه ضرايب..المواصلات..السيارات...المساكن


وزي الجزم بعد ما تدفع الضرائب على كل ذرة وكل عنصر في اي حاجة بتشربها وتاكلها وتستخدمها ........تدفع ضراب بعد كل ده على ترخيص الاستعمال والسكن.......تاني


وبعد كل ده ...مالكمش دعوة يابهايم بالغاز...ده ورث ابونا


احنا وصلنا لمرحلة لابد التغيير فيها يبقى من فوق



لانها بتتصلح من ناحية وتخرب من عشرة



نرجع ونقول...مفيش حاجة بنجتمع عليها



العصيان المدني هو طريق الحل....طالما فقدنا الامل في الجيش والشرطة وان يتم التغيير عن طريقهم..او على الاقل تحييدهم


كنا بنقول الجيش والشرطة من مصر برضه ومسيرهم ربنا يهديهم


لكن من حماستهم الواضحة في قمع اهل المحلة واضح ان مفيش فايدة الان على الاقل ..... هم نتاج لنظام عفن معفن قاعد على قلبنا ولا عايز يرحل وبيستخدم البهايم دول في قمع الناس


وكل بهيم فيهم ما بيبصش غير تحت رجله........اضرب موت الناس وانا عبد المأمور

ان شاء الله تحشر مع المأمور اللي انت عبده


اعوذ بالله



العصيان المدني هو الحل

واما ييجي حد يعرف الناس ايه معنى عصيان...تجربة كده خفيف خفيف

نقول مالوش لازمة والشعب سلبي


والله الذي لا اله الا هو الدعوة للعصيان وعدم العمل هذا اليوم في اماكن كثيرة اعرفها جت من اشخاص عاديين جدا


على خير وطيبة وتدين فطري.... ولكن ليسوا ذوي نشاط او اتجاهات


ونجحت الدعوة وطبقت


اللي حصل ده كان خطوة كويسة جدا ومفيدة جدا...بيعلم شعب سلبي ومعندوش اي فكرة عن الاعتراض...



بتديله كي جي وان ايه معنى الاعتراض



في سياق ده يبقى العصيان المدني نجح ...ويوم امس حقق هدفه ولا داعي لتحبيط المحبطين



مطلوب الآن تعريف الناس ايه هو عصيان المدني وكيف ممكن يتم التصعيد.......بالراحة وبالكياسة


الظروف الآن اكثر ظروف مواتية لان المشاكل وصلت للاكل.......للمم......الناس عندها استعداد الان وبدأت تفهم المصيبة اللي بتحصل من زمان وهما مش حاسين........دلوقت اكتر من اي وقت


سنة 54 للاسف اخطأ الهضيبي رحمه الله ولم يزح عبدالناصر في الوقت المناسب


على الرغم من معرفته واحساسه بنواياه الحقيرة


احنا بقى سنة 2008...اخوان او لا اخوان.....هل نضيع الفرصة وندخل في دوامة 50 عاما اخرى


المفروض ما يبقاش فيه تحرك بخطوة سريعة غير محسوبة


لكن اضراب 6 ابريل لم يكن اكبر من حجمه


وممكن جدا البناء عليه




عموما لكل جواد كبوة........ لعلها تكون سقطتهم الأخيرة

الواحد بيصعب عليه ان تكون دعوة مثل هذه يرى فيها الأمل المنتظر وتخطئ خطأ مثل هذا

او احباء يخطئوا مثل هذه الاخطاء

ومن منا لايخطئ...صغيرا او كبيرا

وطبعا الجماعة الليبراليين والعلمانيين والملحدين ما صدقوا سقطتهم وده يزيد النفس ألم


يا رب ارحمنا

************************************

تحديث

رد مكمل للموضوع

للأسف انا كاتب الموضوع على اساس ان الناس متابعة


الاخوان حاجة من اتنين او كلاهما

اما خافوا ان يحصل تخريب - وقد حدث - ويتم الصاقه بهم ووقتها هتكون فرصة لاستئصالهم وهتكون ضربات امنية عنيفة موجهة ضدهم ومبررة جدا وحتى المحاكم العسكرية هتكون للشعب التايه في لقمة عيشة شئ طبيعي ومنطقي

او انه فعلا من تجاربهم السابقة مع المعارضة - كفاية واخواتها - راوا انهم يستغلون الاخوان على غير نهج الاخوان وعلى غير اهدافهم - اختلاف ايدلوجي ونظرية مصلحة وده بنسبة تسعين في المائة حقيقي

لكن ارجع واقول رأيي الشخصي ولا املك لا نفسي انه برضه لم تكن الطريقة الصحيحة لا للحديث ولا لمعالجة الامور

لان العصيان المدني نفسه فكرة صائبة تماما لكن محتاجة تحضير جامد وتمهيد جامد

وايران تحررت من حكم الشاه بعصيانات تحولت الى ثورة.....لكن مات فيها حوالي 80 الف شخص

ياترى عندنا استعداد لفقد عشر هذا العدد مقابل ان نصل يوما لمستوى ايران...ووقتها نكون افضل حتى باذن الله

هو ده السؤال

يمكن حتى لا نحتاج لكل هذا العدد...في تقديري ان تم بشكل صحيح...بإذن الله ولا حتى واحد على الف منه ....النصر باذن الله هيكون سريع وسهل جدا

فقط ان اجتمعت الكلمة وتم الامر بشكل صحيح

قَالَ رَجُلاَنِ مِنَ الَّذِينَ يَخَافُونَ أَنْعَمَ اللّهُ عَلَيْهِمَا ادْخُلُواْ عَلَيْهِمُ الْبَابَ فَإِذَا دَخَلْتُمُوهُ فَإِنَّكُمْ غَالِبُونَ وَعَلَى اللّهِ فَتَوَكَّلُواْ إِن كُنتُم مُّؤْمِنِينَ

وما ابرئ نفسي ان النفس لأمارة بالسوء الا ما رحم ربي

فكرت كتير النهادرة اروح المحلة وصعب علي المناظر اللي شفتها والكلام اللي سمعته

والست الفاضلة اللي انضربت امبارح عند الجامعة الامريكية وهي بتدافع عن بنات اخريات...ياترى ايه اخبارها حاسس انها اتنست

متغاظ اوي ومتضايق جدا

بفضل الله لا اقول الحمد الله اني لم اكن معهم شهيدا

احيانا وربنا يعلم بأتمنى اكون معاهم واضرب وانضرب

لكن لا ادري شيطاني ام انه حدسي - ونادرا ما يكذبني حدسي بفضل الله - يقول لي ان لا ....وانها خطوة خاطئة ...لم تحن بعد

يا ترى انا صح واللا غلط....اسأل الله ان يهديني على الطريق الصحيح

عزائي الى الآن اني اظن اني متحرفا لقتال ومنحازا الى فئة الى ان يشاء الله